DIS 2021 paqvam lIng lam 'aj Se'vIr malja'

2021 paqvam lIngmeH DIb © DoQ DeSDu'. Hoch lIngmeH DIb luQanlu'.

vengHom joS

QorwaghwIj HurDaq SIStaH. tuD 'ej raw chal. tujtaH juH qachwIj qoD—qerjIqwIjDaq qul tu'lu'. pa' jIQamtaHvIS, juH qachwIj 'em vIbuStaH. Du'Hom mach vIghaj. nenchoH lI'lIymey vIpochta'bogh. bIH muptaHvIS chal bIQ 'onroSmey, jImon. vutpa'vo' ghoS wab Ham. Dargh.

vutpa' qerjIq yorvo' pubmoHmeH runpI' buy' vIwoH 'ej nagh rotlh yughbogh runpI'Daq bIQ tuj vIqang. bIQDaq Qenvob vIlan. runpI', wa' tu'lum je vItlhap ghIq no'laS pa' vIchegh. qerjIq retlhDaq quS tunqu'Daq jIba'. HoSchoHtaHvIS Dargh, qul vIbejtaH. rut DojwI'mey tlhojlu' 'e' qaSmoHlaH qul'e' 'e' vIHar. vaj vay' vIghojmeH qul vIbuSqu'. muvongqu'mo' qulvam 'ej muchurHa'qu'moHmo' qo'rIn DIr quSwIj tIn, mumer rep tagha' tlhaq vIqelqa'DI'. qaSpu' wa'maH vagh tup. runpI'vo' tu'lumDaq Dargh vIqang. vIwaH.

«va» jIjatlh, jImonHa'taHvIS. «tlhoy wIb jay'.»

jIjIm 'ej jItlhutlhqa'. Dargh lo'Ha'lu'chugh, batlh vanglu'. raSHom SumDaq tu'lumwIj vIroQ. paq vItlhap. vIpoSmoH. maghpub ngaj 'oH. Doghbej lut. 'InglanDaq Oxford DuSaQ'a'Daq HaDlI' be' vaw, buDwI' qIHDI'. wej lut bertlham vIlaDchoH 'ach wejHa' qaSbejbogh wanI'mey vIloy. muSHa'qu'chuqchoH. ghIq qaSbej Qugh. muSHa'be'choH. ghIq muSHa'chuqbej 'e' luwuq 'ej tay' rIntaH. ghaytan reH 'InglanDaq ratlh neH 'e' wuq be'. buDHa''eghmoH 'e' 'Ip loD. lI'Ha'bej lutvam 'ach mubelmoH 'oH ... laDmeH 'eb vIjonlaHDI'.

wa' Hogh ret vItagh 'a vaghmaH tenwalmey neH vIlaDta'. pIch ghaj Qu'wIj. rut muyutqu' Qu'wIj. jIbup 'ej bIraSIw vIDabchoH vIneH jIQub. luvnup Dogh 'oH: 'opleS 'utlh vImojta'DI', bIraSIwDaq bIQ'a' HeHDaq jIleSchoH. na'ran rurbogh naH HIq vItlhutlhtaH qaStaHvIS pov Hoch. ram HuchwIj vISuD. ghInjaj, jaj wa' je ngem vIleng 'ej QIt portughal Hol, bIraSIw Sung Holmey je vIghoj.

ghu'vam vIqel 'e' qaghlu': juH qachwIj 'et lojmIt mup vay'. loQ jISup. qIvwIjDaq paq vIlaDchoHbogh vIDut. teHbe' ... jIQub. jIHu'. lojmIt vIghoSchoHpa', tu'lum retlhDaq maghpubwIj Dogh vIlan. lojmIt vIpawDI', QIt 'oH vIpoSmoH; bItwI' vIDa. pa' Qam pInwI'.

---

«Ha'rIS bu'!... qaH, qatlh naDev SoHtaH?»

«pIpoQ, SengSev.»

pe'vIl jIrech. jIjatlh «leSmeH jajwIj 'oH jajvam'e'.»

«jISov 'ach Qatlhqu' ghu' … bIyaj HeS Daq wIpawDI'.»

jIQuchHa' 'e' vIghaSmeH pe'vIl jIrechqu'qa' tlhonDu'wIj neH vIlo'taHvIS. jInuD'eghmeH nachwIj vIlavmoH. nIvnav'e' vItuQtaH.

jImonHa'. werqu'choH QuchwIj DIr. tu Ha'rIS bu'. chunwI' Da 'e' nID. pIch ghajbe' 'e' lIl 'e' nID. vumlaH pagh latlh HeS panwI' 'e' lIl 'e' nID. 'a vIt vISov: muSuch, HeS panwI' nIv jIHmo'. jImIybe'. teH neH. Dochmey leghbogh pagh latlh vIlegh jIH. meqvetlhmo', not bIraSIw vIDabchoH. ghaytan not 'utlh vImoj. ghaytan not machbogh maghpub Dogh vIlaDmeH yap poHwIj.

jIlajmeH jIghugh neH. jItuQchoHmeH vagh tup vIlo'laH 'e' chaw' Ha'rIS bu' 'e' vItlhob. ghu'vam laj 'ej 'et lojmIt tlhopDaq loS jIlengrupchoHtaHvIS.

jIcheghDI' Hoch vIpoQbogh vIghaj. yopwaH qIj, yIvbeH SeQ je, QujmeH 'echletmey 'IH cha'bogh mong Ha'quj'e' je, wep qIj je, cha' 'Italya' qo'rIn DIr yughbogh waqmey'e' je vItuQtaH.

«Ha'» jatlh pInwI'. puH DujDaj wIghoS 'ej wIyong. nguSDI' chu'ta'. chung. nItebHa' HeS Daq wIjaH.

---

vengvo' malenglI'. SIbI'Ha' nuDech Du' yotlhmey, ngem Hop je.

«ghochmaj vISov DaH 'e' Dachaw'qang'a'?» jIjatlh, QuchwIj vIyachtaHvIS. ghughbogh tangqa' wIjuS.

jatlh Ha'rIS bu' «vengHom 'oH. wIlbur 'oH pongDaj'e'.»

«vISovlaw' ... vengHomvetlh botlhDaq magh yotlh, tu'HomI'raH ngevwI'mey je tu'lu' qar'a'?»

qel bu' nach. jang; jatlh «qar. 'ach 'eQ chatHam yoS vengHom mach HochHom DarIchpu'!»

«'ach wIlbur vengHomDaq ghItlhmeH janmey 'IHqu' ngevbogh tu'HomI'raH ngevwI' le''e' tu'lu' 'e' vIqaw.»

«qatlh ngoDHomvetlh DaSov? boSwI' SoH'a'?»

qel nachwIj. «HIja' 'ej ghobe'» jIjatlh. jIHagh, wov'onmeywIj ngo' vInaw'taHvIS. «naH jajmeywIj vItI'meH 'ej latlh boSwI'pu'vaD vIngevmeH ghItlhmeH janmey vIje'. wa'vatlh vISuqta' 'ej wa'vatlh vISuqHa' 'e' vInoH.»

pe'vIlHa' Hagh pInwI'. SeDmeH rutlh mup. jatlh «ghItlhmeH janmey DatI'meH Daje' ... ghu'vetlh vIjalmeH jInIDqu'nISbe' 'e' vIchID.»

«vaj» jIjatlh. DaH jISaghqa'. «wIlbur vengHomDaq—vengHomvam 'IHqu'Daq— qaSpu' nuq? QI'tu'Homvam qalmoHpu' nuq?»

tamchoH Ha'rIS bu'. monHa'choH je. poSchoH nujDaj. ghIq SoQqa'. ghIq poSqa'. tagha' jatlhta':

«ghInjaj magh yotlhvetlh 'IH DarIchpu'bogh luSuch 'e' lutIv qorDu'mey.»

«'e' vIpIH, qaH.»

«'ej povam, SISchoHpa', magh yotlhDaq SaH qorDu'mey law'. magh yotlhDaq puq qoS lopno' lulop puqpu', qaytu'pu'chaj je.»

«HeS choja' 'e' vIloS, qaH.»

ghangwI' DungDaq raw. pe'vIlHa' pur Ha'rIS ghIq purHa'. jatlh «qoS SIQbogh puqvaD qoS bom lubomtaHvIS SaHwI'pu', Dach puqvetlh vav 'e' tu' puq SoS. rInDI' bom, loDnalDaj nejchoH be'. tu'be' vaj yotlhvo' ghoSchoH … ghIq tu' jIlDaj. magh yotlh botlhDaq Sor tIn tu'lu'. 'ej 'oHvo' tlheptaH loDnal. jIblu'ta'.»

latlh nuv jIHchugh, ghaytan jIDuq—ghaytan loQ poSchoH nujwIj mumerqu'mo' De'vetlh. 'ach ghIjqu'bogh jorchanmey 'Iq vIleghpu'. jIngen. Human qolqoSna' vISov jIH. HeSmey turlaHbogh Humanpu' vISovchu'. jIDuqHa'taH. mumerbe' De'vam. jIjatlh: «jIb'eghta'be' chay' 'e' luSov wIlbur vengHom ghan'Iq yaSpu'?»

jang pInwI'; jatlh «HIHar: chatHam yoS ghan'Iq HeS Qatlh pojmeH loH lurItta'DI', SIbI' vIghel. DuH 'e' luchID 'a HoH'eghta' 'e' luHonqu' muja'. SorDaq nompuq lutu'.»

«nompuq?»

qel Ha'rIS nach. «weSjech» jatlh. «yopwaH SuD weSjech ghegh 'oH. qoS SIQbogh puq Do'Ha' vav yopwaH nuDlu'ta'DI', yopwaHDaj vIrghlu'be' 'e' tu'lu'.»

«Daj. vaj SaHwI'pu' yopwaHmey lunuDlu''a'?»

«HIja'. pagh yopwaH vIrghlu'pu'. Haw'law'ta' chotwI'ma'.»

«yotlh lumej SaHwI'pu' wejHa' 'e' chaw''a' vengHom ghan'Iq?» jIjatlh. loQ jIbaw'Ha' 'ach mubaw'qa'moH pInwI' jangDI': «ghobe'. mej Hoch, Hoch lunuDta'DI' tlhoS 'e' luchaw' yaSpu' 'a pa' Hoch ratlhmoH 'e' vIpoQ. ghaytanHa' DaH QuchHa'qu' chaH, SISmo'.»

jIjIm. «jar loS chal bIQ 'oH chal bIQvam. qu'Ha'.»

---

law'choH juH qachmey. puSchoH Du' yotlhmey vaS. wIlbur vengHom wI'el. Dorpa' vagh tupmey, wIlbur vengHom botlh magh yotlh wIpaw. yotlh HeHDaq cha' ghan'Iq puH Duj jojDaq puH Duj verghta' Ha'rIS bu'. mayongHa'. nughom ghan'Iq pInHey. jatlh «tagha'! tugh mej SaHwI'pu'vam Do'Ha' 'e' bochaw'qang'a'?»

qejqu'ba'. ghaH tlhopDaq ghItwIj vISIchmoH. 'uchpu' 'ej tavpu'. jIjatlh «SengSev 'oH pongwIj'e'. yoS ghan'Iq le' vItoy'.»

qaS poHHom ghIq jangruplaw' vengHom ghan'Iq pInHey. naHHa''eghmoH tagha' 'e' wuq. loQ monHa''eghmoH 'ej jatlh «vernan 'oH pongwIj'e'. wIlbur vengHom ghan'Iq vIvu'.»

jatlh Ha'rIS bu' «cheloSmo', tlho' law' wIghaj. HeS HaDmeH mIw ngajmoH 'ej ngeDmoH mIwvam—»

vIqagh: «qubbID ngajqu' neH HeSvam vIchovnIS 'e' vInID 'e' vIlay'. DaH HeS Daq vIleghnISqu' 'ej HeS ngoDmeyHey vIyajnISchoH. wejHa' qaSpu'bogh wanI' potlh muDelta' Ha'rIS bu'. HeS Daq vIlegh vIneH. 'op SaHwI'pu'vaD jIjatlhnISba' je. SIbI'.»

muqel vernan. Ha'rIS bu' qel. ghIq qel nachDaj. jatlh «tlha'.» tlhe' 'ej magh yotlhDaq maghoSchoH.

nachwIj vIQaDmoHtaHmeH namyaSwIj vIpep. ghan'Iq pIn 'emDaq jImoD. ngugh magh yotlhvo' ghoSlI' yopwaH lam, yIvbeH vIrghlu'pu'bogh je tuQtaHbogh loD'e' 'e' vItu'. tIq rolDaj chIS, jIbDaj chIS je. tutlh poSDaj DeS. «'Iv ghaH?» jatlh Ha'rIS. «lopno' jeSwI' ghaH'a'?»

«ghobe'» jatlh vernan jangDI'. «'eD 'oH pongDaj'e'. juH HutlhwI' …» muchol 'ej tlhuptaHvIS mujatlh «'enteD lo'wI' … rut wIqop HeSHommey Sarmo' … 'a chotwI' ghaH 'e' vIHonqu'. vabDot Sumbe'law' qaStaHvIS lopno'.»

'eD vIbuSchoH 'ach ngugh magh yotlh botlh Sor vIlegh; SIbI' vInuDchoH. 'oH retlhDaq cha' jo'ley' tIn lucherlu'ta'. jIHvaD ghu'vam QIj vernan mayIttaHvIS «wa'Daq SaH qoS lopno' SIQwI'pu'—SISchoHDI', chaH DIQan wIneH. 'IQ 'ej yIQ je wIneHbe'ba'. latlhDaq lom wIlanpu' 'ej pa' pojmeH mIw wIturlI'.»

QuchwIj vIyach. loQ mupuQmoH De'vetlh. jIjatlh «wejHa' Sorvo' lom boteqbejta''a'?»

«HIja'. qorDu'vaD nIv ghu'vam. vengHom HochvaD nIv vabDot 'e' wItu'. qaStaHvIS poH nI' vengHom botlhDaq SorDaq tlheptaH Heghpu'bogh loD 'e' wIjun wIneH. bIyaj 'e' vItul … vengHommajDaq Qatqu'pu' pol maqverSon. wIjwI' yuDHa' ghaHpu'. Hoch jaj wa' chIrghDaq SaHbe' 'ach Qun, yIn je, qorDu'Daj je muSHa' net HonlaHbe'. be'nalDaj Do'Ha' … puqloDDaj Do'Ha' … polvaD nurDaj wIchoq wIneH.» jIQuchHa' 'e' tu' 'e' vI'Ir, jatlhmo': «yIbaw'Ha'Qo': HeSvam Segh'e', maHenHa'bej 'ach mapo'Ha'be'. HeS Daq, tlhepbogh lom je cha'bogh mIlloghmey'e' DIqonta' pol porgh wIjotlhta'pa'.»

«reH nIv HeS Daq munbe'lu'pu'bogh» jIjatlh. 'ach jIqapbe'. vIbHa'laH pagh. pagh pan bepmeH mIw ben law' 'e' vIghoj. jIjatlh «weSjech 'ay''e'? Sorvo' boteqpu''a'?»

wej luteqpu' 'e' ghaSmeH nachDaj tlhIn tav vernan. ngugh Sor wIpawta'mo', weSjech 'ay'Daq SIqpu'.

«maj. vaj nompuqvam wInuDjaj» jIjatlh. namyaSwIj vIpepHa'—Sor qargh bartIqmey tIq bIngDaq Dach chal bIQ. Qechjem'a' 'ay' 'eSDaq 'oHtaH weSjech'e'. vIleghchu'meH jI'ung. loQ joqmoH SuSHom. buqwIjvo' mIllogh qonwI' vIlelta'. wa'maH mIlloghmey vIqonta'. mIllogh qonwI' vIQemta'DI', latlh buqvo' qoch'uq pogh chang'eng vIlelta'. weSjech vIlISchoH jIyepqu'taHvIS. «Sor toSHa'taHvIS chotwI', yopwaHDaj vIrghpu' yub. weSjech DuQ yub 'ay'vam yor.» 'ay'Daq jIqay. leghmeH 'ung vernan. «vaj?» jatlh ghaH. jIjIm; jIjatlh «ghaytan moD, vIHtaH gho 'e' yajmo'.» Hagh vernan. jatlh «vIHtaH gho?! motlh vIHbejtaH gho vay' chotlu'ta'DI'! ghu'vetlh jallaHmeH wIgh ghaHnISbe' vay''e'.»

vernan mu'mey vIbuSHa'. qamDu'Daj retlhDaq maghDaq betgham Doq tu'lu' 'e' vItu'. 'Iw … jIQub. nom mIllogh vIqon—wanI'vam tu'law' pagh. jI'ungHa' 'ej DungDaq qabwIj vIQeq. loQ wa' bartIq qarghDaq wa' Daq langDaq Dach yub. Daqvetlhvo' tlheppu' pol maqverSon jIbmeH tlhegh.

---

cha' meyrI' jo'ley'mey Sum vIqel.

«lom ngaSbogh jo'ley' yIngu'» jIjatlh.

poS jo'ley'Daq SIq vernan. vIchol. vI'elta'DI', SIbI' lom'e' vIbuS. jo'ley' botlhDaq letbaQ baS raS jenDaq QottaH. yopwaH bID Doq, yIvbeH SeQHa' je, beSbal mIv je tuQtaH. loD motlh rur. tIn SomrawDu'Daj. wIjwI' ghaHbejpu' jIQub. HoSqu'law'. raSvo' Hu'choH 'ej jo'ley' mejrup tlhoS 'e' vIHar 'ach Heghbejpu' 'e' woq mongDaj: 'oHDaq jaQbogh vem Doq tu'lu'. pa' 'oHpu' tlhegh'e'. teqlu'pu' 'ej raS SumDaq 'oHtaH. vIchol 'ej vInuD. qarghqu'be'. ngemDaq jo'ley'Daq ghIQ neHchugh vay', tlheghvam Segh qenglu'bej. yopwaH buqDaq tlheghvam qenglaHbej vay', ghaytan 'oH tu'taHvIS pagh. vabDot nom vay' HoHlaHpu'mo' chotwI' tlheghvam lang'e' lo'taHvIS, loQ jIyay'. lom vIchol. DeSDaj qargh vIbuS—loDvam chotmeH HoSqu'nISbej chotwI'.

qabDaj vInuD. banbe' 'oH. jIyepqu'taHvIS, loQ nachDaj vIpep. 'achlerDaj vIHot. pa' vem jaQ tu'lu' je. 'oH jaQ law' mong 'et vem chenmoHpu'bogh tlhegh jaQ rap. 'ach pImlaw'. Qungbe'. 'achlervo' ghopwIj vIteqpu'DI', poghwIjDaq 'Iw tu'lu' 'e' vItu'.

jo'ley' qoD tajvajDaq quS ru'Daq ba' pojwI'. qIvDu'DajDaq SaH De'wI' tIS. De' qonlaw'lI'. vItlhob «'IwDaj DapojchoH'a'?»

«ghobe'» jatlh.

vIra': «yItagh.»

veQ ngaSwI' SumDaq qoch'uq poghwIj vIwoDpu'.

---

jo'ley' vI'elHa'. vernan, Ha'rIS je vIghomqa'. «DaH jantorpu'vaD jIjatlhrup» jIjatlh.

jo'ley' cha'DIch wIghoS. 'oH tlhopDaq SaH toba'qo purlI'bogh loD. mI'meH yopwaH bID qIj, etalla Degh cha'bogh yIvbeH SeQHa' je tuQtaH. 'IvtIHDajDaq wepDaj tlhaymey baghpu'. langqu' qabDaj, DeSDaj je. tutlh mongDaj; jISovbejbe'pu' 'a lung rur DIrDaj tutlh 'e' vIHar. jIcholDI', wuSDajvo' tlhIch naQ pepHa'. naghDaq chagh 'ej pe'vIl gho'.

«por Dapur 'e' Damev 'e' vIHar, jan» jatlh vernan. monqu'; tInbogh Ho'Du'Daj wanHa' 'ang. 'eQ qID tlhaQqu' ja'pu' 'e' Da. jang por purwI': «jInIDlI'. tugh jImevbe'chugh, ghayan muchot He'len.» ghIq ruHchoH. maHvaD jatlh «HIvqa' veqlargh. jIlachba' ... motlh qay'be' qIDvam Segh 'a jajvam wanI'mey luqellu'DI' ...» Saghqu'choH. loQ yIQchoH mInDu'Daj.

qoghwIj chol ghan'Iq pIn 'ej tlhuptaHvIS mujatlh «jan DerpIn 'oH pongDaj'e'. pol maqochna' ghaH. wIjwI' ghaH je—jIlpu' chaH.»

qel nachwIj. jan vIghel; jIjatlh «He'len'e', be'nallI' ghaH'a'?»

«bangwI'» jatlh. qevpobDajvo' mIn 'onroS teq. poSDaj ghop 'ang 'ej pe'vIlHa' qewwI'Daj ghISmoH. Dach Qeb. loQ mon. «not matlhoghchuqta'. 'ach matay'bejtaH. puqloD wIghaj—jeq 'oH pongDaj'e'. juppu' chaH jeq, pol puqloD je—bernI' ...» jatlh pay' 'e' mev. ghIq buqDajvo' arlboro tlhIch naQ 'aplo' lel. wuSDu'Daj jojDaq latlh tlhIch naQ lan 'ej meQta', jeltaHvIS ghopDu'Daj.

chol vernan 'ej volchaHDaj 'uchchoH. «jISov» jatlh. «DaH vav weSbej puqvetlh. 'ach nItebHa' wIQorghbej. meqvetlhmo' nIv vengHommey mach: maQanchuq.»

«Qanchuqbe'ba' Hoch» jIjatlh. mubuSmeH tlhe' vernan. muqeH 'e' vIjem. cha'logh pe'vIlHa' jan volchaH QoH, ghIq jo'ley' 'el. wItlha' Ha'rIS jIH je.

buy' jo'ley' qoD. chuS je. jo'ley'vam tIn law' latlh tIn puS 'ach naDev nuvpu' joj Dach 'olQan. Dat 'eDtaH puqmey ngIj. jach 'ej nItebHa' reH. ngojbe'law' wa' puq neH: tajvaj HopDaq SoSDaj qIvDu'Daq ba' 'ej SaQtaH. SaQtaH je SoSDaj. bernI' ghaHlaw' puq'e'. wep qargh, yopwaH bID SuD tuQtaH be'.

pe'vIl be'vaD jatlh vernan: «maqverSon!» ghIq ghaH cholchoH. vItlha'. be' wIcholmeH jo'ley' qochwI'pu' vItolta'. ghaH tlhopDaq jIjoD. «SIQpu'wI' be'nal SoH'a'?»

qel be' nach. qevpobDu'Daj nguvmoH muylIS HurghmoHmeH rItlh. Doqqu' mInDu'Daj. ngugh pe'vIl jach puqloDDaj. jav ben boghpu' 'e' vInoH 'a wejHa' ghu'vam yaj. not vavDaj leghqa' 'e' yajlaw'. loQ tamchoH puq 'e' vIloS. volchaHDaj vIQoH. pagh vIjatlh. qaytu' weSpu'bogh puqvaD nuq jatlhnISlu'? jISovbe'mo', pagh vIjatlh 'e' neH vImaS.

tamqa'DI', SoSDajvaD jIjatlh «nuq 'oH ponglIj'e'?»

«beqqa'.» puj ghoghDaj.

«SengSev 'oH pongwIj'e'. chatHam yoS ghan'Iq vItoy'. HeSmey le' vIpan. jajvam law'bej wanI'mey qab DaSIQpu'bogh 'e' vISov vaj nom neH qaghel vIneH.»

jIH 'emDaq SIq. jatlh «wejHa' mughelta' vernan.»

«'e' vISov» jIjatlh. «'a jIHvaD bIjatlhqa' 'e' Dalajchugh, HeSvam vIyajmeH ngeDchoH Qu'.»

Qub beqqa'. ghIq qel nachDaj. SIbI' vIghel; jIjatlh «wejHa' HeSvam ngoDmeyHey vIQoypu' 'a jIHvaD wanI'mey Daqawbogh DaDel mu'meylIj tlhIn Dalo'taHvIS vIneH. wanI'mey Daqawbogh HIja'. Hoch vIQoy vIneH.»

pe'vIl tlhuH beqqa'. ghIq tagh: «lopno' tIvtaH Hoch … reH puqpu'—chaHvaD Qujmey vu'lI' be'nI'wI', SuSan. tlhutlh 'ej jaw qaytu'pu'. ghIq reHtaH puqpu' 'e' vImev, tugh chab wISopchoH vIneHmo'. vaj Hoch cholmoHmeH lopno' jeSwI'pu' DIrIt. QIt Sor retlhDaq wa' DopDaq raSDaq qevchoH Hoch. chabDaj tlhopDaq bernI' vIDev. Hoch vIbommoH. qoSlIj DatIvqu'jaj … qoSlIj DatIvqu'jaj … 'ach qaSpu'DI' bom bID, Dach pol 'e' vItlhoj. loQ jIQeH, puqma' qoS lopno' qImHa'law'pu'mo'. jIlImchoHbe'—qatlh jIlImchoH? qaSbejpu'bogh wanI' vISovbe'.» yev beqqa'. tochDu'Daj tlhInDaq qabDaj lan. loQ SaQ jatlhqa'pa': «'ej—'ej rInDI' bom, tochDu'chaj yo Hoch. weQHommeyDaj meQHa'ta' bernI'. me'DajvaD chab pe'meH taj vInob.»

«be'nI'lI', qar'a'?»

«HISlaH—SuSan ... Hu'ma ... chab quHchoHtaHvIS, loDnalwI' vInejchoH. ghom'a'Daq Dachlaw' vaj magh yotlh vImejchoH—chaq malja'Hom Sum jaHpu' 'e' vI'Ir. pagh chaq puH DujmajDaq nob lIjpu'mo' nom puH Daj cheghta' 'e' vIQub.» 'ach chuq tIq vIlIDta'be' bey vIQoypu'DI' ... Sampu' jIlyen, jIlma'. maDo' luSambe'mo' puq 'e' vI'Ir 'ach ... n-nom ... nom pol lulegh nenwI'pu' HochHom. puqpu' mInDu' So'meH ghopDu'chaj lo'ta'. Sor vIleghDI' ... pol lom vIleghDI' ... jI- ... pay' jItlhuHlaHbe'. jIDej. jIjach 'e' vInID 'e' vIqaw. 'a ... 'a ... pagh wab vIlInglaHlaw' ...»

ngugh volchaHDaj vIQoH. jIjatlh «jIyaj ... jI- ... ghIq qaSpu' nuq?»

«ghIq ghan'Iq rI'pu' vay'. 'Iv?»

qaghpu' vernan; jatlhpu' «'olSon. puH Duj tI'wI' ghaH. Sovchuq ghaH, pol je. pa' ghaH—» tlhe'. jIb qIj, loch qargh je ghajbogh loDDaq SIq. qel nachwIj. beqqa' vIghelqa'pu'. jIjatlh «beqqa' ... povam qaSpu''a' wanI' taQ? waS'a' vay'? Hoghvam, jarmey vorgh je jaS vangchoH'a' pol? vay'vaD Huch wel'a'? ghoHchuq'a' ghaH, latlh vengHomngan?»

qaSpu' pagh taQwI' 'e' ghaSmeH pe'vIl nachDaj tlhIn tavtaH beqqa'. jatlh «ghobe'! ghobe'! motlhchu' povam. pIm, lopno' wIqaSrupmoHmo' neH! 'a vabDot motlh wanI'vetlh 'e' vIDam ... pIm 'a motlh … qoS lopno' Qu'mey DIturta' ... chab wIvunta'bogh wISuqta' 'ej puH Dujmaj bernI' nobmey DIlanta' ... magh yotlhDaq Hoch wIqemta' ... wa'maH rep tagh lopno' 'ej pawchoH lopno' jeSwI'pu'.»

«pol yutlaw''a' vay' qaStaHvIS lopno'?»

yutlaw' paghHey 'e' ghaSmeH nachDaj tavqa' beqqa'. ghIq jatlhpu' ghaH «chab wISopmeH Hoch vIrItpa' 'olSonvaD jatlhlI' 'ach motlh ... jup QaQ chaHbej. ghInjaj, jaj wa' je motlh ghotI'mey wam chaH.» qelqa' nachwIj. jIHu'.

'IvtIHDu'wIj vI'uchchoH. bu'vaD, wIlbur vengHom ghan'Iq pInvaD je jIjatlh «'olSonvaD majatlhnISba'.»

---

jo'ley' wIchIqqa'. 'olSon wIchol. SumDI', ghaH vInuD. qIjqu' jIbDaj, lochDaj je. lochDaj'e', nujDaj Hoch So'. qevpobDu'Daj 'ay' 'eSDaq rolHom tu'lu'—Hu' puS rol taj lo'law'pu'. SutDaj'e', ngo' 'ej ghIH 'ej Qop. yIvbeHDaj SeQHa'Daq tlhagh 'oDtu', watrIn 'oDtu' je tu'lu'. Doq yopwaHDaj; Qaj wuS rur. 'oHDaq 'oDtu' tu'lu' je 'ach vIrghlu'be'chu'. lojmItDaq SumtaH ghaH. bItlaw' 'e' vInoH—jellaw' ghopDaj. loQ Doq mInDu'Daj 'a ghu'vamvaD ngoy'be' mIn 'onroSmey nom 'e' vIloy: He' ghaH; qa'nabIS rur.

«'olSon» jIjatlh. ghItwIj vISIchmoH. 'oH 'uchpu' 'olSon 'ej tavpu'. «SengSev jIH. ghan'Iq DarI'pu', rI'ta'pa' latlh muja'pu' beqqa'. teH'a'?»

jIm 'olSon. qel nachDaj. jatlhmeH nujDaj poSmoHpu'DI', nujDaj pIw qabqu' vIlarghlaH. jatlh «teH. chIch wa'DIch jIHbe'. qaSpu' neH. DujwIj vIlob neH 'e' vI'Ir. ghan'Iq lurItpu' je latlh 'e' vIHar.»

«'ej SuSovchuq SoH, pol je?»

«HIja'.»

«nItebHa' ghotI' bowam qar'a'?»

«teH. ghInjaj, jaj wa' ghap. Hoch Hogh DIwambe' 'ach—»

«'ej bernI' qoS lopno'vaD DurItpu' pol qar'a'?»

qelqa' 'olSon nach. jatlh «povam jIHvaD Do QIn ngeHpu'. jIjeSlaHbejbe' vIja'pu' 'a puH Duj tI'meH yaHDaq ghanHa' Hoch 'ej pagh Qu' pav vIDIghnIS net jalchugh jIjeSbej vIja'pu'. wa'maHvatlh wa'maH vagh rep jIpaw 'e' vInoH. majawtaH. Sor 'emDaq matlhutlh 'ej majoS 'ej por wIpur. motlh.»

«Sumob'a' qaStaHvIS poHvetlh?»

«HIja' ... ghobe'. rut nutlhej latlh loDpu'. rut pa' maSaH ghaH, jIH je neH.»

«jumlaw''a' ghaH? motlhHa''a' vangmeH Ho'DoSDaj'e'?»

«ghobe' ... motlhlaw'. Huuu—» ngugh chu'law'bogh buSHach qellaw' 'olSon. jatlh «lujop 'ej luway' ghaH, bIl gherSen je muja'.»

«bIl gherSen?»

qar pongvam 'e' ghaSmeH qel 'olSon nach. ghIq mu'meyvam chelpu': «maqleghma' ghaH.»

«nuqDaq ghaH?» jo'ley' qoD vInuDmeH loQ jItlhe'.

«SaHbe'. ghaytan chIrghDaq ghaHtaH. ghInjaj pa' qeq bomwI'pu'.»

nuboQta'mo' 'olSonvaD tlho' vI'agh. ghIq vernanvaD jIjatlhpu' «nuqDaq ghaH jIlyen'e'?»

«loS, loS, loS!» jatlh 'olSon. «Sumejpa', jIHvaD tlhIch naQ tunobqang'a'?»

ghaHvaD ghItDu'wIj chIm vI'ang. jIjatlh «por vIpurbe'. 'ach mapawDI' jo'ley' HurDaq tlhIch naQ purlI' jan DerpIn. ghaH'e' yItlhob.»

mon 'olSon 'ej jan DerpIn muvmeH jo'ley' 'elHa'. vernan'e', Ha'rIS'e' je, jIH'e' je, jIlyen wIghoS.

---

«toH! toH! toH!» SaQqu'taHmo' jIlyen, yajmeH Qatlh Qu'. mergh 'InDoghmeyDaj 'ej mu'tlheghmey naQ jatlhbe'. «... Sa-ameH ... wa'Dch ... pa'tlhepneH ... vabDot v-v- vIHtHb-be' ...»

«jIyaj ... jIyaj» jIjatlh. jIQIltaHvIS, vIbaw'qa'moH 'e' vInIDqu'. «jIblu'pa', pol Daleghpu''a'?»

«...j-jI- ... jIpawD-DI' ... ghItDa-aj v-v-tav ... lopno'mo' jISSSey vIj-ja'pu' ...»

latlh De' Sovbe' jIlyen nom 'e' vItlhoj. Do' ghaH retlhDaq ba'taH SuSan, beqqa' be'nI'. SaQbejtaH 'ach jottaH. Doq paH bID tuQtaHbogh 'ej beqpuj rur yIvbeHDaj.

«SuSan» jIjatlh. «pol DaSovqu''a'?»

«vISov … be'nI'wI' loDnal ghaH … Hoch ghInjaj bernI' vIjIH, chIrghDaq bomwI' ghomvaD qeqtaHvIS beqqa' 'ej ghotI' wamtaHvIS pol … pol vIparHa'pu'. loD QaQ ghaH. 'a pIjHa' matay' jIH ghaH je neH. juppu' maH qaja'chugh, vaj jIyuD.»

«qaStaHvIS lopno', puqpu'vaD QujmeH Davu'lI' qar'a'?» qel nachDaj. «pol Daleghqu'pu''a'?» leghqu'pu'be' 'e' ghaSmeH nachDaj tav. vIghelqa'; jIjatlh «chab DaquHta' qar'a'?» «HISlaH.» «SoHvaD quHmeH taj nobpu' 'Iv?»

muqaghpu' vernan «SIQpu'wI'ma' jIblu'ta', SengSev. DuQlu'ta'be'.»

vIbuSHa' ghIq SuSanvaD mu'tlheghwIj vIjatlhqa'. jangDI' SuSan, jatlh «jI- jISovbe'. raSDaq neH 'oHtaH neH. pol Hergh balHom retlhDaq 'oHtaH 'e' vIqawlaw' … Huu …» poSchoH mInDu'Daj. «Huj. mabomchoHDI' raSDaq 'oHtaHbe' 'e' vIqawlaw' …»

qel nachwIj. jIHu' 'ej cha' tlhejwI'pu'wI'Daq jIQeq'egh.

mujatlh vernan «DaH mayev 'e' Dachaw''a'? wejHa' nuvpu'vam DIghelta' wejHa' 'e' DaSov.»

«DaH Hoch SaHwI'pu'vam DItlhabmoHlaH. wa' latlh wIyu'nIS neH.»

«'Iv?»

«bIl gherSen'e'.»

«maqlegh?» tlhobpu' Ha'rIS.

«maqlegh» jIjang. loQ jImon.

---

qoS lopno' jeSwI'pu' tlhabmoHta' vernan yaS. jo'ley' wImejDI', jan, 'olSon je vIchol. «loQ jIleSnIS» jIjatlh. porchaj vIpur 'e' vItlhob. jIHvaD meQtaHbogh tlhIch naQ nobpu' 'olSon. 'oH vItlhapDI', 'amerI'qa' 'ev chan 'ev puHmey beQ Sung cha'bogh 'er'InDaj'e' vIqel. ghIq vIpur. toba'qo tlhIch vIbItlhqu'be'mo' loQ jItuS 'ach tlhoy jItuH'eghmoHbe'pu'. 'olSonvaD tlhIch naQ vItatlh. ghIq vernanvaD, bu'vaD je SawlayHom vIlo' 'ej nItebHa' chIrgh wIjaHchoH mayIttaHvIS. Hopqu'be'. magh yotlh tIng DopDaq 'oH.

«bImaw' 'e' DaSov'a'?» jatlh vernan, letlh wISaltaHvIS 'ej lojmIt wIcholtaHvIS. «loQ ghoHchuq bIl gherSen, pol maqverSon je. vaj nuq? rut qaS! vengHom machDaq maHtaH. veng tInDaq maHtaHbe'! mach roghvaH. rut ghoHchuq nuvpu'. HoHchuq 'e' 'oSbe' ghoHmeH wanI'!»

«jISov, yaS. jISov.» chIrgh lojmIt jI'ev vI'uchchoH 'ej vIluH.

DIn vIvegh 'ej chIrgh qoD vI'el. chIrgh nIt 'oH. pagh latmey tu'lu'. chumHa' Qorwaghmey. Sor Hap quSlabmey letDaq pagh ngogh tun tu'lu'. chIrgh 'o'Daq tlhep Sorpuq me'cheD. poSDaq SuS may'ron raS'e' chu'lI'bogh jIb Hutlhbogh rorwI' tu'lu'. 'oH retlhDaq QamtaH ghom mach. SaH wa'maH nuvpu' neH. pIlmoHbogh van bom lubomlI'.

«bIl gherSen yIngu'.»

jIb HutlhwI'Daq SIq vernan. mop chIS tuQtaH 'ej loQ HIDtaH QuchDaj. SuynIjmo', boch nachDaj yor. quSlab wIyqapmey jojDaq bomwI' ghom vIchol. van bom luvan 'e' vIloS. ghIq jIjatlhpu':

«'IHqu'bej. wa'leS pagh Qu' vIDIghnISbe' net jalchugh, Sa'Ijqa'meH naDev jIlengqa'bej.»

muqel bIl. Saghqu' qabDaj. mutlhej vernan yaS 'e' tu'DI' jatlh «pol Hegh wanI' bop'a' SuchmeH wanI'HomlIj?»

«bIlugh» jIjatlh. «Hegh wanI'Daj'e', nuq DaSov?»

«murI'pu' beqqa' qaSDI'. Do'Ha'qu' ... loQ ghaHvaD jIjatlh.» QIt rech, SuS may'ron raS leQmey qeltaHvIS. «vIbaw'qa'moH 'e' vInID 'ach tlhoy tIw. bIyaj qar'a'? motlh, Heghpu'DI' 'Ipnal. 'ej beqqa''e', toH … pagh latlh wuv neH. HoStaH 'e' Sov Hoch neH. Seng bamDI' beqqa', nIteb DIgh neH. DaH ... toH, ghaytan wegh'egh neH 'e' vIpIH.» bomwI' ghom qel bIl. Hu'. jatlh «wa'leS wa'maHvatlh rep naDev pepaw. ngugh nom nItebHa' maqeqqa'. pepaSQo'!»

bomwI'pu'Daj rItHa'pu'DI', chIrgh lutlheD chaH 'e' vIloS. tlheDDI' QavwI', bIl vIghelqa'. jIjatlh «pol maqverSon DaghoH 'e' vIyaj.»

qel bIl nach. «—'ach vIqeHbe' 'e' vI'Ip. vabDot maghoHchuq qa'Daj vISaHmo'.»

wanHa'choH Huy'wIj. QIj bIl; jatlh «pIjHa' chIrghmaj Such. naH jajmeyDaj reH paq'a' laD neH. vabDot boghpu' bernI', Hoch Hogh jaj wa' naDev SaH. 'ej DaH … DaH ghotI' wam 'e' maS; QIStoS QIn'a' QaQ 'Ij 'e' qa'. Qun'a' voqHa' 'e' vIHaj je. vabDot be'nalDaj HarHa'moHpu' 'e' vIHaj. 'op wen bomwI' ghommaj muvHa' ghaH. not jIHvaD meqmeyDaj QIj.»

«vaj pol DajeSqa'moH 'e' DanID qar'a'?»

«qar» jatlh bIl. «Soj ngevwI'Daq vIghomDI' pagh Du'Daj vIjuSDI', vItungHa' 'e' vInID. wa' jaj Qay'pu'. jIHvaD jachpu' 'ej muQIHqu'pu'. jISeHHa''eghpu' je 'e' vIchID. jIjachpu' je. jIQeHpu' je.» ngugh tuHqu'choH bIl gherSen. «muqeHHa' joH'a' QaQ 'e' vItullaH neH. 'ej Heghpu'pa' qa'Daj watlhqa'moHta' pol 'e' vItullaH je.»

ngugh SIbI' jIghuj. vernanDaq, Ha'rISDaq je jIQeq'egh. yochuq tochDu'wIj. jIjatlh «ngoy'wI' vISov.»

Duqlaw' vernan. monqu' pInwI'.

---

chIrgh Hur vIjaH tlhoS jIqettaHvIS.

mutlha'taHmeH moDqu' cha' latlhpu'. wIlbur vengHom ghan'Iq pInvaD jIjatlh «SuSan—beqqa' be'nI'—juH qach Quv DaSov'a', vernan?»

«SuSan?!» jatlh vernan, tlhoS jachtaHvIS. «'a vabDot wej ghaH wIghelta'!»

«juH qachDaj Quv DaSov'a'?»

«vISov. vISov. Hopqu'be'.»

jIjatlh «maj. vaj pItlha' bu', jIH je.»

magh yotlh wIchIqta'. puH Dujmeymaj DIyongta' 'ej SIbI'Ha' pa'vo' maghoSchoH.

---

SuSan juH qach wIpawta'. juH qach ngo' 'oH. DIS 1930 rav DIS 1940 'aqroS mutlhlu'ta' 'e' vInoH vIleghDI'. nItHa' reDDaj nguvmoHbogh rItlh chIS'e'. beb tI'nISqu'lu'ba'. 'oH tlhopDaq cha' puH Dujmey luverghlu'ta'. puH DujDaj yongHa' vernan. vaHDajvo' HIchDaj QIq. Ha'rIS bu' puH Duj vIyongHa'ta'DI', ghopwIj vIpep. jImonHa'. «nuHlIj yIQem, yaS» jIjatlh. «naDev 'utbe'.»

cha' puH Dujmey luverghlu'ta'bogh vIqel. jIjatlh «puH Dujmeyvam ghajwI'pu' tIper.»

Civic qIjDaq SIq vernan; jatlh «SuSan puH Duj 'oH puH Dujvetlh'e'.» ghIq ar chISDaq SIq; jatlh «beqqa' puH Duj 'oH puH Dujvam'e'.»

jIDuv. juH qach lojmIt vIpawDI', vImup. DorDI' tup bID, poSmoH SuSan. DeSDu'DajDaq ghaHtaH QongtaHvIS puq'e'.

«yaS!» jatlh SuSan. «'eQ juHwIj vIcheghta' … Hu'mI … tughelqa' boneH'a'? chay' SaboQlaH?»

volchaHDaj vI'uch 'ej jIjatlh «wejHa' juboQqu'pu'. 'eQ ngoy'wI' vIpIHqu'bogh Dawoqpu'!» jIghuj. bu' puH Duj vIyongqa'. «Ha'! Ha'!»

«nuqDaq majaH??» jatlh vernan jachtaHvIS 'ej puH DujDaj yongqa'taHvIS je.

«maqverSon juH!»

---

maqverSon Du' tlhopDaq chungHa'DI' Ha'rIS bu', SIbI' lojmItwIj vIpoSmoH 'ej juH qach 'et lojmIt vIjaH jImoDqu'taHvIS. SoQ puH Duj vergh lojmIt. juH qach qoDDaq wov pagh wovmoHwI'. juH qach tlhopDaq pagh puH Duj tu'lu'.

lojmIt vIpawDI', pe'vIl 'oH vImup. jIH 'emDaq paw je vernan 'e' vIQoylaH. tlhovqu'. jatlh «vengHomwIjDaq Dat juDev vay' Dapumpa' 'e' DaHech'a' jay'?»

«ghobe', ghobe'» jIjatlh. «tlhoS rIn HeSvam panmeH mIw.»

lojmItDaq SIq ghan'Iq pIn. jatlh «Dach 'e' vIHar. ghaytan loDnalDaj nol nabchoH beqqa' ... SuSan wIghelpu'chugh DachmeH meqna' wIghojbejp—» ngugh vIqaghmeH nIHwIj SIqwI' vIpep. jIjatlh «wabvetlh DaQoy'a'?»

SIHchoH Huy'Du'Daj. ghIq Qoylaw'pu' je.

«bIQ?»

jImon.

lojmItvo' jIqetqa'. bep vernan 'a qetqa' je ghaH. juH qach 'em wIjaH 'ej pa' ...

«beqqa' maqverSon, jan DerpIn je» jIjatlhpu', cha'vam vIleghpu'DI'. QalmeH DoQmIv'a' machDaq chaHtaH. ghepchuq 'ej 'epchuq. nutu'DI', SIbI' 'uchHa'chuqpu' chaH.

«n-nuq?» jatlhpu' jan. «qaStaH nuq?!»

«chaq maHvaD ghu'vetlh DaQIjqang SoH'e', jan» jIjatlh. ghIq pagh jatlhDI' ghaH, jIjatlhqa': «ghobe'? pagh lut Da'oghlaH'a'? maj vaj poHmaj wIlo'Ha'nISbe'; vIt'e' vIja'.» jItlhe'. DaH pawlI' Ha'rIS bu', cha' wIlbur ghan'Iq yaSpu' je.

jIjatlh «Sutay'laHmeH pol maqverSon bochotpu'.» poSqu'choHchu' vernan nuj. «nuqjatlh??» jatlh.

qel nachwIj. «teH» jIjatlh.

«bImuj!» jatlh beqqa', jachtaHvIS. «nepwI' SoH! nepwI' chaH Hoch venganpu''e' net Sov! HatlhDaq yuDHa'lu'!»

«bImuj, beqqa'. naDev yuDHa'be' Hoch. qaStaHvIS wa' DIS naQ loDnallI' DatojlI'. qapIchchu'be' 'e' vIchID. pol DanayDI', loD pImqu' ghaHbej. wIjwI' Qup ghaH. tul. pIl. ghaytan wontoymey ghaj. 'ach QIt QatlhchoH yInraj. puq DaboghmoHpu'DI', ghaytan puSchoH Huchraj. Dulegh neHbe'choH ghaH 'ej ghaH DaleghchoH DaneHbe'choH SoH. SIbI'Ha' puqra'vaD neH Sutay'. DachtaH qar'a'? SaHqu'bogh vav ghaHbe' qar'a'? ghInjaj, jaj wa' je jupDaj, 'olSon, tlhejtaH 'ej nItebHa' ghotI'mey wam. De' veb vIloy neH 'a jIlugh 'e' vIHar: ram cheghDI' chech 'ej SoH, puqloDra' je qImHa'chu'. Qong neH neH.

«vaj wa' ben bang Datu'. loDnallI' latlh jup: jan, jIlra'. 'IH. naHHa'. loQ buD. pol Dop ghaH qar'a'? 'a ghorgh SughomlaH? SoS, wIjwI' be'nal je SoH. chay' poH DaSuqlaH? lojmItjaj 'oH jaj pup'e'! ghInjaj po qeq chIrgh bomwI' ghom. qaStaHvIS qeqmeychaj bISaH wejHa' bIl gherSenvaD 'e' Dalay' 'ach qay'qu'be'. qaStaHvIS 'op qeqmeH mIw bIDach. bI'reS bIlvaD bInepnISpu': bIropmo' pagh Dubotmo' latlh wanI' Qatlh bIja'. ghIq bomwI' ghom DamuvHa' rIntaH 'e' yajchoH bIl. 'ach loDnallI'vaD bIneplaHbejtaH. be'nI'lI'vaD bIneptaH je. qaStaHvIS qeqmeH mIwmeyqoqlIj, juH qachDajDaq bernI' DaratlhmoH.

«Sunga'chuqchoH SoH jan je. SumuSHa'chuq SIbI'Ha' 'e' botlhoj. Sutay'laHchu'meH 'Ipnalpu'ra' botlhoghHa'nISbej 'ej bIyuDHa'nISchoH 'e' boSov 'ach ghaytan Qatlhqu' Qu'vetlh. nuq luQub latlh vengHomnganpu'? vengHommey machDaq joS law' law' rewve' law' puS. jan, wej be'nallI'vaD meqvam DarIchpu'. 'ach beqqa' ... polvaD meqvam DarIchbejpu'. qechvam parqu'pu' qar'a'? tIwqu'. maghpu' maqochDaj tlhIn tlhoS 'e' HarQo'. vabDot ghaHvaD jatlhQo' qaStaHvIS bernI' qoS lopno' Hoch.

«ghaHvaD meqvam DarIchpu' 'ej latlh mIw Daturta' je ... teH ... ghaHvaD tlhoghHa'meH yu'muD Danobta' je qar'a'? juH qachlIj 'ellu'chugh, ghaytan vogh yu'muDmeyvetlh DISam 'e' vIHar.»

De'vam lutembe'DI' ngoy'wI'pu'Heyvam, jIpIlHa'qu'choH. mu'IQqu'moH lutvam Do'Ha'. 'ach jIQIjchu'meH jIjatlhqa': «'ach tlhoghHa'meH yu'muD qI'Qo' pol. 'oy'qu' Qay'wI'Daj. vabDot pol ghomqa'Qo'. bernI'vaD jottaH 'e' nID 'ach tIwqu'bej. bIqap 'e' DanID, beqqa'. DameqmoH 'e' DanID 'ach Du'IjQo'. tagha' bIpuQpu'. vaj pol DarI'. 'ej nItebHa' bochot qaStaHvIS bernI' qoS lopno' bonab—ngugh Daq rapDaq chaHtaH Hoch juppu'ra''e'. 'ej SaHmeH meq QaQ ghaj je pol, juppu' chaHmo' puqloDpu'ra''e'—»

ngugh paw wIlbur ghan'Iq toy'bogh porgh pojwI'.

joqqu'choH tIqwIj. ghaH vIjaH. jIHvaD nav nob. 'oHDaq tamlermey Sar pong, wa'chawmey je lughItlhlu'pu'. vInuDta'. ghIq vernanvaD 'oH vInob. «'IwDajDaq 'enteD puj tu'lu' 'e' tob pojvam … taghDI' lopno', pol HIqDaq vulmoHwI' taS puj DalanchoH, beqqa'. QIt chechchoH ghaytan 'e' luHar latlhpu' 'ach vIt boSov tlhIH'e'. QIt pol bopujmoH. nom bochotmeH tlhoy tIn. tlhoy HoS qar'a'? DuboQbej 'enteD bolo'ta'bogh. tagha' bommeH qevchoH lopno' jeSwI'pu', relqu' pol. ghaytan vIHqu'laHbe'. Sor Dop DopDaq pol Daq DajaH, jan. 'achlerDaj DaDuQ. chab quHmeH taj Dalo'ta'. ghIq mongDajDaq tlhegh Dalo'ta'. jIb'eghta' 'e' Har Hoch DaneH. SumISqu'moH 'e' bonab. 'ach Sor DatoSHa'DI', yopwaHHeylIj vIrghpu' Qechjem'a' jeqbogh yub ghegh. ghu'vam DatlhojDI', ghaytan bIlImpu'—»

DoQmIv'a'Daq Hu' jan. loQ mon. muvaqmeH jatlh «ghIq nuq? rewve'vo' yopwaH chu' vIlelta''a' ghIq yopwaH vIrghlu'pu'bogh vImeQta''a'?»

«ghobe'! jIDoghbej ngervetlh vIchupchugh» jIjatlh. DoQmIv'a' vIchol. 'oH retlhDaq yav nIlDaq bIH jan Sut'e', beqqa' Sut'e' je. jan wep vIwoH. chISchoHchu' jan qab DIr; Ho' Say' rur.

«DaHjaj 'IvtIHDajDaq wepvam'e' DatuQtaH qaqIHDI', qar'a'? 'a bIbIrbe''a'? DaHjaj pov SIStaH 'ej jo'ley'vetlh HurDaq bIQamtaH.»

«jI- ... chay' ...?»

jIqap. «loQ bIjel bIbIrmo' qar'a'?» jIjatlh. ghIq wep vInuD. 'ay' vIrghlu'pu'bogh vISamta'. ghan'Iq yaSpu'vaD 'oH vI'ang.

tagha' HeSDaj chIDchoH jan; jatlh «bIlugh! bIlugh! vIHoHta'! 'enteD yap tlhutlhpu'DI', Sor 'em vIjaH. quqtaHvIS wanI'vetlh, latlh jeSwI'pu' yutmeH rItlI' beqqa'. pol 'achler vIDuQ ...»

DIS 'e' bot 'e' nID beqqa'. «bIjatlh 'e' yImev, petaQ!» jatlh. 'ach jatlh 'e' mevQo' jan:

«jeSwI'pu' qevmoHmeH mIw nI'moHqu' beqqa'. Do' muleghpu' pagh. muQoylaH pagh, chuSmo' ghom. SuS tu'choHlu' je. ngejrunwIjDaq quHmeH taj vIQaDmoH. Sor vItoSchoH bomchoHlu'DI'. toSwI' QaQ jIH ... nom jIvIH ... pol vIpepmeH loQ Qatlh Qu' 'a Do' jIQapta'. jIQapta' rInpa' qoS bom. ghIq ghom vImuvpa', jIDach 'e' tu'pa' vay'. raSDaq quHmeH taj vIlan poQpa' SuSan.» mu'Daj Qav jatlhDI', qamDaj lurghDaq qabDaj Qeq. jIHvaD jatlhpu' «'ach chotwI' jIH chay' 'e' Daloy?»

«tlhIch naQlIj ...»

«nuqjatlh?»

«jo'ley' vIpawDI', arlboro tlhIch naQ 'aplo' Daghaj. 'ach 'olSonvaD meran Sprt tlhIch naQ Danobpu'. 'amerI'qa' 'ev chan 'ev puH beQ Sung cha' tlhIch naQ munobpu'bogh 'er'In. chotwI' SoHbej 'ach chotwI' neH SoHbe'. HejwI' SoH je. maqochlI' Dachotta'DI', buqDajDaq tlhIch naQ tu'lu' 'e' Dajem 'ej DanIHpu'. wanI'vam vIloy tlhIch naQ Segh cha'DIch DapurlI' 'e' vIleghDI'.»

Duq beqqa', jan je. vernan vImerqu'la' je. logh'obDajDaq DeSDu'Daj tlhIn chIqmoHpu' Ha'rIS bu'.

jIghuj. «yaSpu', cha'vam tIqop. bu', Ha'.» vernan ghIt vItavqa'. ghaHvaD jIjatlh «latlh Seng bopanlaHbe'bogh boDIghqa'chugh, ghoSovmoH neH.» ghIq HochvaD jIjatlh «DaH jImejnIS. leSmeH jajwIj 'oH jajvam'e' net nab. juH qachwIjDaq muloS maghpub Doghqu'.»

---

matam jIH, pInwI' je veng wIcheghtaHvIS. nItlhpachDu'wIj vIbuStaH 'e' vImevlaHbe'law'.

jIjatlh «puqvetlhvaD veb nuq?»

Qub Ha'rIS. ghIq jatlhpu' «chaq QorghchoH me'Daj.»

pe'vIlHa' qel nachwIj. «chaq» jIjatlh. «'ach SoS qa'laHbe'ba' me' ... vav qa'laHbe'ba' wov'on neH.»

«bIlugh.» ghIq muqel pInwI'; jatlh «pIch DaHutlh 'e' DaSov 'e' vItul.»

«jISov ... jISov. vaj qatlh mujoy'taH yabwIj? qatlh chotwI' vIrur 'e' vIjem? wa' puqvo' vav vInIH 'ej latlh puqvo' SoSDaj—yIntaHbogh qaytu'Daj'e'—vInIH qatlh 'e' vIjem?»

«motlh. 'ach pagh Dachotta' 'e' yIlIjQo'.»

jIjangQo'. jIDIv jIH 'e' vIjem 'e' vImevbe'. 'ach mutungHa'qa' pInwI' 'e' vIjun vIneHmo' jItamtaH.

juH qachwIj wIpawta'. Hurgh chal. SIS 'e' mev 'ach yIQtaH muD. chungHa'wI' chu' Ha'rIS. jatlh «DaHjaj bIvaQqu'pu'. yIjaH. yIleS. jajvam wanI'mey tIlIj. latlh taHmeH to' tu'lu'be'.»

vIyajpu' 'e' vIghaSmeH qel nachwIj. juH qachwIj lojmIt vIpawDI', jItlhe'. HopchoHbogh Ha'rIS bu' puH Duj wovmoHwI'mey vIbuS qaStaHvIS lupmey puS. vIleghlaHbe'DI', lojmItDaq jIQeq'eghqa'. ngaQHa'moHwI'wIj vIlel. juHwIj tuj vI'elqa'.