DIS 2020 paqvam lIng lam 'aj Se'vIr malja'

2020 paqvam lIngmeH DIb © DoQ DeSDu'. Hoch lIngmeH DIb luQanlu'.

chaboy

«HIqIm, chaboy, SIbI' Daqvamvo' maHaw'nIS jay'.»

pa' bebDaq wovtaH wovmoHwI'mey qutlh. DenIS qa'vIn HIvje'vo' 'et tamghay butHa''e' lIngbogh bIH. raS QoHtaH poS ro'Daj. merIy buStaH. merIy'e', DenIS buSHa'taH. luvnup SIQlaw'taH. qImmoHmeH tuS'eghmoH DenIS. ghIq mu'tlhegh jatlhpu'bogh jatlhqa'pu'.

jangDI', «ghgh» neH jatlh.

«jISagh, chaboy. majaHnIS. DaH. Dat chaHtaH ghan'Iq yaSpu''e'. nuqop chaH DaneH'a'? pIjHa' vengHommey machDaq beylI'mey luHejlu'ta'. 'ej SIbI'Ha' HejwI'pu' bopbogh De''e' lughojchoH. cha' HejwI' tu'lu' wejHa' 'e' luSov. Hung HaSta tamey nuDDI' chaH, ghaytan latlh De' lughoj: be' ghaH wa' HejwI''e' 'ej loD ghaH latlh HejwI''e'. ghIq ghaytan latlh De' luloychu': parmaqqaypu' chaH cha' HejwI'pu''e' nejlI'bogh. ghIq latlh De' luloychu': vengHom Sung chaHbe' HejwI'pu''e' 'ej taw'a' retlhDaq mebpa'mey qachHom lamDaq ratlh HejwI'pu'. ghIq qaS nuq? bIghHa'Daq wIqemlu'! vaj DaHjaj matlheD 'e' vIchup. vabDot qaq povam.»

tlhaqDaj nuD.

tup puS ret neH qaSpu' Sochvatlh wa'maH vagh rep.

DaH raS QoHqu'choH ro'Daj. tamtaHmo' merIy, moghqu'choH. 'ach pay' jatlhqangchoH parmaqqayDaj 'e' tulmo', tamchoH je DenIS. SIbI' pagh jatlh merIy. puq chonnaQDaj woH 'ej nujDajDaq QIm luDuDlu'pu'bogh vev. ghIq Dechbogh Qe' nuD. loghjaj 'oH jajvam'e'. Waffle House Qe'vamDaq SaH Hutvagh. jawlu'. joSlu'. nIQ Soplu'. De' chu' ghItlhmey laD qabDu' puS. wa' De' chu' ghItlh laDwI' buS merIy. wIjwI'Hey ghaH 'ej nIteb raS tIqDaq ba'taH, De' chu' ghItlhDaj laDtaHvIS. De' chu' ghItlhDaj tenwal wa'DIch laDlaH: wej beylI' HejwI'pu' ngu'ta' ghan'Iq. mon merIy.

«maHejchu'ta', qar'a'?»

«wej. Huch wIghaj 'a wIqoplu' 'e' wIjunnIS» jatlh DenIS. wuSDu'Daj jojDaq tlhIch naQ lan ghIq meQ. por pur ghIq merIyvaD tlhIch naQ nob. 'oH tlhap ghaH, pagh jatlhtaHvIS. buSHachmeyDaj paQtaH. qechmeyDaj luS yabDaj 'e' yaj DenIS vaj tamtaH 'ej SujQo'. ghIq buSHach qellI'bogh ngu'laH pay' 'e' tlhoj ghaH.

«'a bIyonbe', qar'a'?»

qar 'e' ghaSmeH nachDaj tlhIn tav merIy. «not» jatlh. monqu'choH.

tochDaj lo'taHvIS, nIH mInDaj yach DenIS. tlhIch naQ tlhapqa' 'ej pe'vIl tlhIch purqa'. nguy. raS SumDaq ba' be', puqloDDaj je 'e' tu'. wejmaH ben boghpu' SoS 'ej loS ben boghpu' puq 'e' noH DenIS. puqloDDaj SopmoH 'e' nIDqu' be'.

«naH tlhagh neHbe'!» jatlh puq, jachtaHvIS.

jatlh SoS «yISop, puqwI'! nom bISopnIS! tugh yaHwIj vIjaHnISchoH ghIq qaStaHvIS pem Hoch nIjIH vavnI'oy, SoSnI'oy je. chaH Datlhej 'e' DatIv qar'a'?»

«ghobe'!» SopQo' loDHom. tagha' nujDaj poSmoHmeH ghapqa'Daj 'eS 'uch SoS. 'a noSmoHta' neH. pe'vIlHa' Hagh DenIS. wa' tup qubbID merIy, qechmeyDaj Qob je lIj 'e' luqaSmoH SoS, puqloDDaj je. 'a ghIq nargh merIy ghop. tlhIch naQ nIH. tlhIch pur ghIq pa' bebDaq qabDaj Qeq.

veqlargh ghaH Qub DenIS, qeHtaHvIS. nItebHa' maSeng 'ej maHeS reH 'e' qap 'ej not gher'ID qel. SengHa' not 'e' nID.

ben law' DenIS ngelpu' merIy, SengwI' ghaHmo'. poymar ghaH. yIn wanI'mey tIvqu'mo', rut pe'vIl HaghchoH veqlarghna' rurtaHvIS. 'ej qabqu'mo' qechmeyDaj, QaQ bIH.

DaH DenISvaD way'ar neH 'oS merIy. Qob.

ra' DenIS. «nab Da'oghlI'bogh yIngu', merIy» jatlh.

por purqa' merIy 'e' bej. tomtaH nachDaj. yonmoH tlhIch qu'. SoQchoH mInyoDDu'Daj. QIt tomHa'choH nachDaj. poSqa'DI' mInDaj, DenIS buSHa'chu'. tIpqan jengva' DungDaq tlhIch naQ lan 'ej poH 'Iq qubbID tIpqan QeyHa' teqmeH tlhIch naQ QoH, SIqwI'Daj lo'taHvIS.

DenISvaD tlhIch naQ nobHa' 'ej jabwI' rIt.

«nuqneH?» jatlh jabwI'.

jatlh merIy «HIvje'meymaj tItebqa'. qa'vIn wIneH.» mon. 'ach montaHvIS buQwI' rur; naHHa'wI' qa'.

jang jabwI'. «lu'» jatlh. bItmoHpu' merIy monmeH Ho'DoS.

«De' chu' ghItlh vISuq, cheghtaHvIS ghaH» jatlh merIy, mejpu'DI' jabwI'. DeSDaj SIch DenIS. ba'nISmoH. jatlhnISmoH. meqnISmoH jay'! 'a tlhoy nom vIH merIy. wejHa' raSchaj, raS tIq je chuq bID lIDta'. De' chu' ghItlh laDlI'bogh wIjwI'Hey'e' chollaw'lI'.

quSlabDajDaq tlhe' DenIS. quSlabDaj Dub 'uchchoH.

Sutlh wIjwI'Hey, merIy je 'e' bej ghaH. tagha' De' chu' ghItlh tenwal wa'DIch, mIllogh lutmey tlhaQ tenwal je SuqmeH cha' tlhIch naQmey mechta' merIy.

QIt chegh, popDaj qengtaHvIS. raSDaq cha' tenwalmey Suqta'bogh roQ 'ej ba'qa'.

mIllogh lutmey tlhaQ tenwal woH 'ej laDchoH.

«va, HeSwI' QIv SoH 'e' Datlhoj'a'? qech Dojmey Da'oghtaH 'a gher'ID DaDIghmeH Dup DaqelQo'! bIba'taH neH 'ej bItamtaH neH 'ej De' chu' ghItlhlIj DalaD neH! 'ej qay' pagh bIja''egh 'a teHbe'ba'!»

jangQo' merIy. Bruce Rocket, Spaceman buS; paq'a' laDbogh maqlegh'e' rur.

nguyqa' DenIS. chegh jabwI'. HIvje'meychaj teb ghaH.

«tlho'» jatlh DenIS. mu' rap jatlh merIy 'ach DachtaH. DaH Garfield, Odie je bopbogh mIllogh lut laDlI'.

qaStaHvIS lupmey puS qa'vIn buStaH neH DenIS. 'oHvo' 'oqHa'taH SeS. ghIq nom HIvje'Daj woH 'ej qa'vInDaj bID tlhutlh; pe'vIl bI'chu'. qa'vInDaj nIHmeH paw vay' 'e' Har ghaH tlhoS 'e' Har vay', wanI'vam leghpu'chugh. chayqa'Daj meQ qa'vIn tuj tlhutlhpu'bogh. logh'obDaj qIp.

«'eQ SenglIj'e' Da'agh» jatlh merIy. tlhaQ wanI'vam 'e' Harlaw'. «bIlugh: ta'mey vIturbogh vIqelqu'be'. vabDot jIvangpa', jImeqQo'. jIvang neH. 'ach jISuDrup. Qob vIlaj. chaq gher'ID qab vISIQ 'e' vIlaj. jIjaq, jIHeSDI' pagh loD vI- …» jatlh pay' 'e' mev. gheDDaj nuDqu'lI'bogh rur. tagha' jatlhqa': «… pagh porghlIjvo' SutlIj vIvIrghDI' bI'IHqu'mo'.» wuSDaj 'eS chop.

joqqu' DenIS tIq. tu.

jatlhqa' merIy: «SenglIj'e': tlhoy gher'ID Daqel. bImeqtaHvIS 'ej gher'ID DaqeltaHvIS, wuq jaqwI'pu', vawwI'pu' je—ghantoH: jIH—ghIq nIDev chaH 'e' Dalaj neH; qovIj matlh Darur. SabDI' Hoch, latlhpu' DapIch. jIngoy'Ha' choja'.» pay' punchoH 'ej tamchoH ghoghDaj. Qoychu'meH loQ roDaj tlhIn lavmoH DenIS. «chaq bIlugh. 'a jIwIv jIH'e'. jIngoy'Ha' 'e' vIwIv. qar'a'? jISuD 'e' vIwIv jay'. SoH'e', nIDev latlhpu'. bIHoSghajHa'. qavup.»

mu'tlheghDaj van merIy. tlhepQe'Daj tlhIn ghup DenIS. mIllogh lutmey tlhaQ qImqa' merIy. De' chu' ghItlh tenwal wa'DIch woH DenIS. wolHa'moHta' 'ej raSDaq beQmoHta'.

'oHDaq mu'meyvam laD:

FORT BEAUREGARD GAZETTE

DIS 1989 jar 2 jaj 15

per bIngDaq 'oSwI'pu' ghom Qang 'e' cha' mIllogh. mIlloghvam retlhDaq mu'meyvam ghItlhlu':

wej beylI' HejwI'pu' ngu'ta' ghan'Iq

De' ghItlhHom bI'reS laDta':

parmaq lop jaj Fort Beauregard beylI' wa'DIch luHejta' cha' qabDu':

wa'Hu'—jar 2 jaj 14—Fort Beauregard beylI' lu'el cha' HeSwI'pu'. beylI' toy'wI' buQmeH HIch Qachta' 'ej qabDu'chaj So'meH Richard Nixon qab 'oSbogh qab jechmey'e' tuQta'. porghchaj tu'qom So'meH qImroq bIr wepmey qargh tuQta' HejwI'pu'vam …

ghuy'cha' Qub DenIS. wepmeymaj …

«ghItlhHomvam yIqIm» jatlh. merIy mIllogh lutmeyDaq tenwal wa'DIch lan.

«nuq? Bush? Qang bopbogh De''e' vISaHb—»

«yItbogh nobmeDvetlh vIrIchbe' 'e' DaSovchu' jay'! maH'e' nubopbogh ghItlhHom vIrIch, chaboy.»

tenwal woH merIy 'ej laDchoH. Hagh. «parmaq lop HejwI'pu' nupong. 'IH qar'a'? vengHommeyvam mach De' chu' ghItlhmey vI- …»

«mevyap! wepmeymaj vIrIch, toDS—» mev'egh. QuchDajDaq ghoS wa' SuynIj 'onroS.

«bImev'eghta', bIDo'.»

nachDaj tlhIn tav DenIS. «reH latlh qabDaq qul tuj law'Hoch tuj puS. jI- … wepmey bopbogh mu'tlhegh yIqIm neH.»

«qay' nuq?» jIm. ghIq qa'vInDaj tuj bID tlhutlhchu'; pe'vIl bI'chu'. loQ Doj wanI'vam 'e' tu' DenIS. ghIq tav'egh. buS'eghqa'moH. jatlh:

«merIy! Daqmaj yIqel! jorjaDaq maHtaH jay'! naDev qImroq bIr wepmey qargh ghaj nuv 'ar? qerjIq rur Daqvam muD'e'! qaStaH jar cha' 'ej jajvam cha'vatlh vagh gheH jay'! novpu' chaH beylI' HejwI'pu''e' tugh 'e' tlhoj ghan'Iq. vabDot wejHa' per 'echletmey nov ghajbogh puH Dujmey nejlI' ghan'Iq 'e' vInoH. ghaytan wejHa' mebpa'meyDaq nunejlI' … chaq wejHa' mebpa'meymaj vu'wI' luyu'ta' 'ej meb tameyDaj nuDta'. mach vengHomvam. nom nuSam. SIbI' matlheDnIS. nuqopta'mo' pagh, maDo'.»

DenIS 'emDaq wab pun lIng vay'. wab pun mung SovmeH tlhe' DenIS. pa' Qam ghan'Iq yaS. DeghHomDaj bochmoH tamghay'e' butHa' lulIngtaHbogh pa' beb wovmoHwI'mey. tIn lochDaj, chorDaj je. qoghDaj lu'uchtaH HoSghajlaw'bogh ghopDu'Daj. qoghDajvo' tlhep HIch vaH SIbI' 'e' tu' DenIS.

«pagh torSIv yI'ogh; penepQo'. Hoch'e' vIQoypu'» jatlh. «Hoch'e'. Qe'vam bo'elDI' 'ej SujawchoHDI', Sa'IjchoH. Sujum SIbI' 'e' vISov, Saleghpu'DI'. jum Sutraj, jatlhmeH Ho'DoSraj je. 'ej Sutlhup; QuSwI' borur. 'ej—toH! wa'Hu' neH beylI'vetlh Hejlu'ta' vaj SaDaqchoH.»

pItlh. qaStaHvIS nIQchaj Hoch, gher'IDchaj lurIchtaH merIy, DenIS je 'ej tagha' HeSmeychaj gher'ID luDIgh. nuq luta'laH? jeylaHba' neH chaH. nachDaj tlhIn tav DenIS. jatlh'egh «ghuy', DenIS, Sengvamvo' bIHaw'laHbe'.» ghIq ghan'Iq yaSvaD jatlh: «lu', yaS, ma—» 'ach ghaH qagh merIy. nom Hu' parmqayDaj. quSlabDajDaq Qam.

tlhe' DenIS. HIchDaj tlhIn QIqta' merIy. ghe'chu'pu'. jotHa'. naS. Ha'DIbaH rurchoH. vay' butHa' rur. taQ. rewve' chop 'ej ghughugh. poSqu'choH mInDu'Daj. yaSDaq HIchDaj bach. qIpta'. yaS QIDta'. pum yaS.

«chay'?!—» jatlhchoH DenIS. 'ach ngugh quSlabDajvo' Sup merIy. ghan'Iq yaS rIQvo' ngaQHa'moHwI'mey nIHta' ghIq DIlmeH yaH ghoSchoH. raSchaj, DIlmeH yaH je chuq lIDtaHvIS, Hoch juSbogh buQ. tagha' qa'vInchaj 'ey jabta'bogh jabwI'Daq QeqchoH.

«Huch 'aplo' DapoSmoHbe'chugh, vaj bIHegh jay'!» jatlh, jachtaHvIS. veqlargh ghaH …

lob jabwI'. Huch 'aplo' poSmoHpu' 'ej merIyvaD Hoch Huch ngaSbogh nobpu'. cha'vatlh Da'larmey lutu'lu'.

Huch Suqta'DI', DIlmeH yaH DoHchoH. QIt Qe' 'elmeH lojmIt chol.

«chotlhej'a', DenIS?» tlhob, nIQ SopwI'pu' yay'Daq HIchDaj QeqtaHvIS.

lupHom qubbID meq DenIS. ghIq: «ghobe'. not qatlhejqa', maw'wI' 'Igh.»

Seng yap DIgh 'e' wuq. maw' merIy 'ach lugh: wIvmeyDaj tlhIn turnISchoH. nIteb HeSmeyDaj gher'ID DIghnIS.

«nuch'a'! DaynguH DaHutlh!» jatlh, Qe' mejtaHvIS. lojmIt veghta'DI', chalDaq HIchDaj Qeq 'ej wejlogh bach. ghan'Iq yaS puH Duj lojmIt poSmoHmeH ngaQHa'moHwI' nIHta'bogh lo'ta'. ghIq yongta' 'ej SeDchoH. tugh tlha' cha' ghan'Iq puH Dujmey.

qa'vInDajDaq Qeq'eghqa' DenIS. 'oy'mo' bep Sumbogh ghan'Iq yaS rIQ 'ej tlhup latlh nIQ SopwI'pu' tlhoS 'e' buSHa'chu'. chach Duj rItmeH ghogh HablI' lo' jabwI'— «QIDta' HejwI'! chach Duj'e' DaH yIngeH!»

mIllogh lutmey tlhaQ SummoH DenIS. HaghmoH Garfield, Odie je, Bruce Rocket je bopbogh lutmey. ben 'ar lut tlhaQ laDpu'? qawlaHchu'be'.

DaH tlhab.

pItlh