DIS 2020 paqvam lIng lam 'aj Se'vIr malja'

2020 paqvam lIngmeH DIb © DoQ DeSDu'. Hoch lIngmeH DIb luQanlu'.

'ub

wab HevwI' vIlIS. DaH rISHa'choH chaDvay' 'ej De' chu' muchwI' ghogh vIQoychoHchu'. pun 'ej Sagh 'ej 'IQlaH'. qa'wIj qolqoS chIw.

«'ej De' woqta' 'amerIqa' SepjIjQa' logh tum. tera' ghoStaH chunDab. nuyorgh veng juch 'ej tera'Daq Hoch yInwI'pu' HoHbej. jaj Qav 'oH jajvam'e'. Qunra'vaD pejatlh. bangra' tIrI'. qaytu'lI' tIrI'. tugh nItebHa' Hegh wIDIgh. rIn.»

rIn jabbI'ID.

qa' pagh rurbogh wabHom Ham.

wab HevwI'wI' vIchu'Ha' 'ej puH DujwIj tlhop vIqel. taw'a'Daq jISat. jIH tlhopDaq Hutvagh tu'lu'. «va» jIjatlh'egh.

qatlh DaHjaj jIvumpu'? qatlh povam pInwI' vIrI'be' 'ej jIvumQo'? qatlh ghaHvaD jIneppu'be'? tera' rop bIr vISuqpu' vIja'laHba'pu'.

ngugh jI'IQqu'choH. QIpwI'na' jIH. 'ej not pInwI' vI'omqang. reH jIpab qaStaHvIS yInwIj Hoch. not jIbIv. not jI'om—reH jIpab. nIv'a' yInwIj jIlobqangqu'mo'? chal vIqel. 'op rep pIq 'engmeyvetlh vegh chunDab 'ej Hoch vISovbogh Qaw'. puH DujwIj vIbuSchoH. ela chu' 'oH. wa'wen Hu' puS je vIje'ta'. qaStaHvIS loS DIS Huch vIvI', tagha' vIje'laHpa'. nap 'oH; lo'mey Hoy Hutlh 'ach puH DujwIj'e' 'oH jay'. tugh Qaw'lu' je. wejSaghan nem tu''a' latlh mut roSqa'tej? mutmaj Deq HaDmeH lo''a'? 'ej nuq jatlh mut veb? maval 'e' Har'a'? machul 'e' Har'a'? qoH'a' maH 'e' Har'a'?

puH Dujmeychaj yongHa' latlhpu' DaH 'e' vIleghchoH. puH DujwIj tlhIn vIyongHa' 'e' vIwuq 'ej taw'a'Daq jIqetchoH. tlhoS mupummoH latlh Haw'wI'pu'. maH DungDaq novpu' lutu'lu'chugh, nuq luQub? qorvIt DIrur ghaytan 'e' luHar. latlhpu' vIyuv 'ej jIH'e' muyuv chaH. jImoD 'e' vInID. SIbI' juHwIj vIcheghnISba'. Do'Ha' tlhoy HoS latlhpu'. jItang. jIpum.

Qo' jIQub. juHwIj vIcheghnIS! 'IpnalwI' ... puqwI' ... ngugh tlhoS qabDu'chaj vIleghlaH. chorwIjDaq jIQottaHvIS nachwIj vIpep 'e' vInID. jIH tlhop SIch ghopDu'wIj. nuq? jIH tlhopDaq chaHtaH 'e' vIHar'a'? jI'ergh'a'? ghIq nachwIj gho' vay 'ej jIvulchoH. qIjchoH Hoch.

jIvemDI', chImchu' taw'a'. ratlh puH Duj lulonlu'pu'bogh, vulpu'wI'pu' je. jItach. chalDaq jIQeq'egh. qaStaHvIS poH 'ar jIvultaH? jISovbe' 'ach ... Doq 'ej Hurgh chal 'e' vIleghDI', ghaytan qaStaHvIS 'op rep jIlvultaH 'e' vItlhoj. jIghughugh. 'ej yIQ qevpobDu'wIj 'e' vItlhoj. jISaQ. jIjach. «yInwIj vInatlh! vIlo'Ha'pu' jay'! 'ej jIQIvmo', vabDot qaStaHvIS tera' tupmey Qav qorDu'wIj vIleghqa'ta'be'!»

ngugh jI'ubchu'. jISuvpu' 'ach yapbe' nIDpu'ghachwIj. vIvonlu'. vIjeylu'. Qom yav. jIjel. pay' mughIj pagh. jIyoHchoH. jItu. jI'enchoH.

-pItlh-