tangqa' targhmey

wejleS tera' vIchegh 'e' vInab. jImejpa' vIqoplu' 'e' vInabbe'. qaStaHvIS wej Hogh bID je targhoy machDaq jIvumlI'. ghIbralDaq loghvergh tach 'oH targhoy mach'e' neH. Hoch ram cha' much poQ ghIghwIj, 'ej Saturjaj latlh vImuch. Sunjaj jIvumnISbe'. tlhoS rap wa' ghIbral jaj, cha'maH loS rep je. 'ach Hogh lunI'moH chorgh jaj. jaj 'Iq qImpu'be' tera' Dabbogh DuywI'. Sutlhta'DI' ghaH, Hoch Hogh'e' vIDIllu' 'e' wuq. vaj ghIbjaj cha' muchmey DIllu'be'. jIvumnIStaH 'ach jIbajbe'taH.

qach 'emDaq maq mu'mey: «qanroy Dun, vongwI''a'.» nuvpu' qImmoH 'e' nIDmeH nguvchoHtaH mu'mey wov. Qapbej. yap bejwI'pu' ghom mach, 'ej tach buy'moH bejwI'pu' ghom tIn. le'be' ghIbral; Hopmo', reH muchwI' buSqang. Huch bajlaHbej muchbogh vongwI'.

wa' meqmo' ghIbralDaq chaHtaH mubejbogh Hoch Humanpu''e'. tangqa' targh malja' lutoy'. ghIbralDaq wa' Sup neH tu'lu', 'ej tangqa'Hom 'oH. nIteb nuvpu' qem. mID yuQ 'oH ghIbral'e', 'ej mIDmaj 'oHbe'. SeH 'arqon 'ej wa' qelI'qam 'aDbogh waw' mach neH luDan Human. chutmey chenmoH 'arqon. ghajmo' ghIbral 'ej neHmo' tera', DIpabchu'. meqvammo' vIqoplu'.

povvetlh tangqa' targh HIjwI' luqoppu' 'arqon. nIHpu' ghaH 'e' lupum. tamey QaghHom neH pIch tera' jojlu', 'ach vIt noch Da 'arqon QoghIj. tugh vItna' lutu'. nom DIch chav 'arqon ruv. rInpa' 'uQ muchwIj, nIHwI' ghIpDIjpu', HeSDaj 'olbejpu', 'ej DIvwI' muHqu'pu'.

wanI' pIm buSnIS Hoch, 'ej wanI'vetlh vImoj jIH. Hoch vIngojHa'moH 'ej vIjotchoHmoH vIneH, vaj muchwIj vIlIHmeH qIDmey puS vIjatlh. roD bejbogh 'op bItmoHlaw' vongwI'. loQ Hajlaw'. Huy'wIj vIpepDI', pegh'a'mey 'angmeH loD vIraDlaH, pagh jIHvaD nob'eghmeH be' vIraDlaH, chaq 'e' Har. va, qaSjaj. vatlh ben ta'laH 'anton meSmer net joS. ghaytan DuyDaj po' law' DuywIj po' puS neH. vongmeH SoQ vaQ vIpoQ jIH, 'ej qaStaHvIS vagh tup tamnIS retlh...'ej Qapbe'chugh nab, Hay'beH DujwIj 'e' vIpoQ. lutDaq Dajbej voHDajbo' parmaqqay joq Suqbogh vongwI', 'ach yInDaq nabbogh nuv QaD law' Deghbogh nuv QaD puS. rut jIreH 'e' vIchID, 'ach not qaS jImuchtaHvIS. rIntaHvIS much, pIm ghu'. jImuchtaHvIS reH vongqa'meH chu'wI' vIjom. Hoch 'ebmey tIjon, qar'a'? Hogh pIq mu'mey le' vItlhuplaH, 'ej toH! Davongqa'lu' 'ej chupwI' mu' Dalajrupchu'. nuq vIjatlhlaH; Dunqu'bej Qu'wIj.

Hoch ram raS law' Dan bejtaHbogh 'arqon. pImbe' ramvetlh. qaStaHvIS vaghmaH muchmey, not Hagh vay'. not mon vay'. monlaH 'arqon; tlhoS DIch vIghaj. wochbogh Human 'ej langbogh rur 'arqon. jIHvaD SIla' taQ luqawmoH. chIS DIrDaj; rut wa' Hurgh law' latlh Hurgh puS, pagh wa' wov law' latlh wov puS, 'ach chISbej. qIjqu' pobDaj; nagh beQ Submey rur. nuj wuS Ho' je ghaj, 'ej lo'maj rurba' lo'Daj, 'ach not monpu' chaH 'e' vIlegh. much tIvba'; yajlaHbe' neH. pIch ghaj vIt chovmeH laHDaj. vIttaH vay' pagh vItbe'taH reH 'e' luSov 'arqon. not wa' 'arqonvaD nep latlh. qItbe' neH. mach ngoD, 'ach qech DanuDchoHDI', Human qun tebqu' nepwI' to net tu'bej.

tlhoS HeS Hutlh 'arqon nugh. nongwI' HeSmey lutu'lu'bej -- nurur -- 'ach HeS nab pagh. nIDchugh vay', SIbI' vIt Sovlu', yu'DI' noHwI'. Human qIHpa' 'arqon, neplaHbogh vay' qelpu'be'. chaHvaD maDajchu'. mataQchu'. bIQ tlhuHlaH ghotI' 'e' rur Sovvetlh. SoHvaD lI'be', 'ach DuHmey Dajqu' qItmoH.

ngebba'bogh ngoDqoq luHar nuvpu' 'e' qaSmoHlaHbogh vongwI' lulegh luneH 'arqon law'. Hoch ram Human yoSDaq leng 'arqonmey 'ej muchwIj lubej. ram wa'DIch, ram cha'DIch je 'arqon puS vIvong. vongmeH ngeD; Human rur. 'uSgheb ghogh jachqang; qay'be'. 'ach teHbe'bogh ghu' vIchupDI', lajlaHbe'. 'uSgheb mojpu' 'e' HarlaHbe'. qech ngeb qellaHbe'chu'. much DalmoHbej, 'ej Sap 'arqon 'e' vIlaj 'e' vImev.

Hogh Qav much motlh vInabta'. jItagh. qaSpu'DI' wa'maH tup, much choQDaq mumuvpu' cha' boQDu' Qup, wa' chelwI' qan, wa' Hung yaS nen je. Hoch vIvongchu'ta'. 'arqon gharwI'pu' chaH boQDu''e' 'e' luHar, vIja'pu'mo'. Human nugh 'ItlhmoHbogh 'arqon nab luQIj, vIra'pu'mo'. nabvam tu'lu'be'ba', 'ach jIvmo' boQDu', nabqoq luQIjchu' 'ej Dap lu'oghchu'. 'Ilqu'bejmo' chaH, vaqqu' 'ej Haghqu' bejtaHbogh Humanpu'.

SoQchaj luvan boQDu' 'ej boQDu' naD bejwI'pu'. gharwI'pu'qoq vItlho' 'ej tlhop quSmeyDaq vIcheghmoH. 'arqon rIvSo' 'IHDaq ba'taH 'e' luHar, vIponta'mo'. chaH vIQongqa'moH. Dunqu'pu' SoQchaj. val 'ej vaQ. pe'vIl wanI' veb luloS bejwI'. be' ghaH Hung yaS'e'. ghaH vIqImchoH. bejwI'pu'vaD jImon ghIq be' vIra'choH.

«Su', qortar char,» vIja'meH jItlhup. much muvDI' ghaH vIvongmeH mu'meyvetlh vIjomta'. lolchoH ghaH. vIHbe'; loSlaw' neH. leSchu'taH ghaH 'ach pe'vIl ghuHqu'. bejwI'pu'vaD jImonqa' 'ej chaH vIqImmoH.

much ghoghwIj vIlo'. jot 'ej HoS. be' vIja'. «ghIbralDaq bIboghpu'. bIval 'ej bIjatlhchu'. bIghojta' 'ej bISIj.» quSDaq wochchoHlaw'. jot qabDaj 'ej jeQ. SoQtaH mInDu'Daj. vIja'qa'. «'eH, maHvaD ghIbral yIDel, potlhmo' ghu'lIj le'. juja'qang qar'a'?»

HeQrup 'e' 'ang be'. wuSDaj yIQmoH jatDaj 'ej SalchoH ghopDaj.

«maj. mI' wej vItoghDI' bIruch.» vIja'taH. «'eH, latlh: Human SoHbe'. tangqa' targh SoH. wa'...cha'...»

«mev!» raS HopDaq Qamta' 'arqon loD. ghaH vIghovbej; Hoch jaj wa' muchwIj bejpu'. reH raS rapDaq ba', much buStaHvIS. ghaH vIvongmeH Sappu' 'ej ghaH QaQ law' latlh 'arqon SapwI' QaQ puS. ghaHvaD loyoq ponglu', 'ej jIHDaq nuQ Qeq. Hagh HochHom bejwI'pu'; much 'ay' 'oH wanI''e' 'e' lupIH. jaS jISov.

«muchDaq Hoch vIqop.» ja'taH. «pevIHQo'. Suyeqchugh SurIQchoHbe'.»

much choQ ghoS loyoq. choQ toSchu' 'e' luchaw' DeSDaj tIq. 'uD'a' HIch vIleghpu'DI' jItaD. Hung yaS ghoS. leghchuqmeH mInchaj tor. be' ghel. «tangqa' targh SoH'a'?»

Haghqa' bejwI'pu'. much 'ay' 'oHtaH 'e' luQub HochHom. jangbe' be'. janglaHbe'. ghoghwIj neH Qoy'laH. nom yajchoH loyoq. muja' «jatlhchu' ghaH 'e' Damaq. qatlh jatlhQo'?»

«jItoghlI' 'e' vIrInmoHbe',» jIjatlh. «jIta'pa' HeQQo' ghaH.»

«wej!» jatlh 'arqon, Hung yaS buSchu'taHvIS. qaS pagh. Haghqa' bejwI'pu'. muja'. «yIjatlh SoH.» nachDaj tlhe'be'.

«wej.» QIt jIja'. mInDu'Daj poSmoH yaS. 'arqonvaD monqu'. Sumqu' qabchaj.

jatlhqa' loyoq. «tangqa' targh SoH'a'?»

«HIja', HIja'.» ja' yaS. «naDev ghIbralDaq jIboghpu'. peHar, ngeDbe' yInwIj. naDev jIratlhtaHmo' jIyay'. loj be'nI'meywIj. loj loDnI'meywIj. loj naH jajwIj jupmey. yuQmey HopDaq bIH boHIjpu', 'arqon. va, jumawbej.»

jatlhtaH 'ej jatlhtaH. Ha'DIbaH nov bopbogh qun naQ 'ogh. yab machqu' ghajbogh Ha'DIbaHvam Dachu'. yay'qu' 'arqon 'IjtaHvIS. Hoch jatlhtaHbogh Harchu' be' 'e' Sov loyoq. DIch nob QoghIjDaj. ram Human porgh; tangqa' targh ghaHqu' be''e'.

qaSpu'pa' wa'maH tup mujonta' 'arqon 'ej bIghHa'Daq jIHtaH. vemchu'pu' loS SapwI'pu'wI', 'ej ghaytan Hoch luyu'lI' je 'arqon 'avwI'pu'. Hovtay' vImejmeH chaw'wIj tlhaplu'pu'. Huq targhoy mach net tuch, ghu' nuDlu'taHvIS. DuywI' rI' targhoy mach loHwI' 'ej bep. 'uy' muchwI'pu' boq rI' je 'ej vIQIHta' 'e' maq. Sengvam'e' vI'omchugh, ghaytan not logh ghIgh vIHevqa'. ghaytan tera'Daq neH jIvumlaH. 'ach DaH Sengvam qay' law' DuHvetlh qay' puS.

qaS repmey law'. qaStaHvIS wej rep yabwIjDaq much vIqelqa'taH. 'arqon QeHmoHpu' nuq? 'ach jIjang'eghlaHbe'. vaj loQ jIQong. pay' jIvemchu'. tagha' poSchoH pa'wIj lojmIt. 'el loyoq, cha' latlhpu'. quSHom run qeng Hoch. quSHommeyDaq ba'; ravDaq beQ qamDu'chaj, SIHtaH 'uSDu'chaj tIq, 'ej tlhoS volchaHchaj Hot DeSqIvDu'chaj. QongDaqwIjDaq jIba'taHvIS, rap mInmaj patlh. mubuSqu' Hoch 'arqon mInDu'.

ja' nIH 'arqon. «maHvaD...yInep.»

jImIS. «jInep'a'?» vIja'. wa' qab Saghvo' vebwI'Daq jIbuSchoH. Human mInDu' rurchu' mInDu'chaj 'ach jIjotHa'taH.

muja'. «HIja', qanroy. vay' DaHarbe'bogh yImaq. DaH yIruch.»

chImchoH yabwIj. much ghanglu'pu'bogh neH vIqellaH.

«'arqon gharwI' jIH. Human nugh 'ItlhmoHbogh nab vIghaj.»

berghchoHlaw' cha' 'arqon chu'. much mu'mey ghov loyoq 'ej loQ Sal nujDaj me'ghan 'er'In je. monlaHqu'.

«bIneptaH.» ja' poS 'arqon. berghqu'choHlaw'.

«jInep tura'mo' neH.»

«qar. 'ej bInep 'e' wISov. bImuchtaHvIS latlh Humanpu' Dara'. Dochmey ta'. ngebbe' Dochmeyvam.»

jImIStaH. «jIQoS. jIQatlh vIneHbe' 'ach ngoQraj vIyajbe'taH.»

«nIHwI' SoH'a', qanroy?» mughel loyoq.

«nuqjatlh?»

«tangqa' targhmey DanIH'a'? ghojang: HIja' ghobe' ghap.»

«ghobe'!» QIt jIHajchoH.

«'ach be'vetlh Dara', 'ej...» Hoqra'Hom nuD loyoq. «tangqa' targh moj be'vetlh, qarla' 'eSpInSa'. vItna' 'oH. yabDajDaq vIlegh.»

«'ach tangqa' targhna' ghaHbe'ba'!» jImon. qIDtaH, qar'a'? jImon 'e' vImev. Saghchu' chaH.

«Qo'. vIt vIleghpu'. tangqa' targh ghaH. chaw' Hutlhbogh tangqa' targh, qanroy.» QeHchoHlaw'; DaH rurchuq Hoch. «HeS'a'vam Dayaj'a'? tera'Daq yatlhlaHbogh tangqa' targh 'ej nIHlu'pu'bogh DaHIjtaH 'e' DanID 'e' maq 'op.»

jIQublaHbe'chu'. ghIbral Sung bIH tangqa' targh'e', latlh puSqu''e'. 'u'Daq bIH pIm law' Hoch pIm puS. tera' tangqa' machqu' rurchu'. chaq cha' vatlhvI' tera' tangqa' 'ab tangqa' targh. 'IHqu'. tun jIbDaj. SuD jatDaj; chal rur. Haghlaw' ghoghDaj, 'ej HaghtaHvIS jeq jatDaj. Hoch SoplaH. Hoch'e' SoplaH 'ej QuchlaH. 'ej wa' laH le' law' Hoch le' puS: yInSIp watlh ruq. yInSIp law'qu' lIng, vaj yuQ jonwI'pu'vaD lI'qu'. 'ej tera'Daq veQ tar je qay'Ha'moHlI'.

targhoy machDaq, muchwIjDaq, HIjwI'pu' chaH cha'maH vagh vatlhvI' bejwI'pu''e'. Duj vebDaq mejrup Hoch HIjwI'. wa' ghopDaq QaymeH chaw'mey 'uch.latlhDaq tangqa' targh 'uch. Ha'DIbaHmey Hal luSeH 'arqon. yatlhlaHbe'bogh tangqa' targh ngevqang...HevDI' wa'maH 'uy' DeQ. law'qu'mo' Huch, tlhu'choH nIHwI', 'ej SeplaHbe'bogh tangqa'Hommey puS lunIHlu'pu'. vaj pe'vIl vang 'arqon qum 'ej pagh mer. tangqa' targh Hat malja'mo' qum DapIHmoH neH, DumuHlaH qum. jISotbej.

«'ach tangqa' targhna' ghaHbe'qu'!» jImorghtaHvIS jIQamchoH. «ghaHbe' 'e' 'angchu' porghDaj.»

volchaHwIjDaq 'uy loyoq ghop 'ej jIba'qa'. «yabwIjDaq ngoD vIleghbogh vISov. tangqa' targh ghaHqu'. ghIbralDaq, tangqa' targh ghajchugh Human, nIHwI' ghaH pagh HIjwI' ghaH. yablIjDaq vIt vIleghlaH, qanroy. nIHwI' SoHbe'.»

yev 'ej bejchuq ghaH, latlh 'arqon je. rom tam chav 'ej QamchoH Hoch.

«nubItmoH ghu'vam, qanroy. nuqImmoH je HeSHey neH. pIweghtaHvIS, Hoch Suy qachmey DInuD. Dach pagh. pIpumbe'; nIHwI' SoHbe'. chut cha'DIch DabIvpu'be' je, wa' meqmo' neH: yatlhchoHlaHbe' qarla' 'eSpInSa'.»

jum, Huj, taQ. vIghel. «chay' DaSov?»

qabwIj qImbe' loyoq. «ghaH wInuDchu'. yatlhlaHbogh tangqa' targh ghajchugh Human, SIbI' DIv 'ej SIbI' muHlu'. 'ach yIqaw, yatlhchoHlaHbe' ghaH. SeplaHbe'bogh tangqa' targh luplaH chaw' ghajbogh HIjwI''e'. vaj tamey DIlughnISmoH neH. qarla' 'eSpInSa' wIperta' 'ej chaw'lIj malja'mab wIgherta'.»

jIHvaD toch De'wI', ghItlhwI' je nob 'arqon cha'DIch. loQ ghItlh vIlaD 'ej vIqI'. chaw'wIj vIDIlmeH, HochHom Huch vIbajpu'bogh tlhapta', 'ej cha'logh Huch rap'e' pIq vIbajbogh DoQta'. DaH HIjwI' mub jIH.

«majQa', qanroy. tangqa' targh DaSuqta', 'ej wa'maH 'uy' DeQ DaSuqHa'pu'be'.» qIDbe'taH ghaH. 'Ilbej.

«'ach DaH tangqa' targh ghaHbe', qar'a'?» vIja. «vempu' 'ej Sov'eghqa'.»

bItqu'qa'law' wej 'arqon. mej cha'; quSHommey qeng. ratlh loyoq 'ej muja'. «laHmeylIj DIyajchu'be' 'e' wIchID. tangqa' targh ghaHbej 'e' Sovbej SapwI'lI', 'e' vIbej. 'ach tangqa' targh ghaHbe' je. maHvaD chu' ghu'vam, qanroy. bItlheDpa', naDev DaSuchtaHvIS, pIbuS. qaqeS: yIyepqu'.»

«DaH bImej net chaw'.» muja'. jIHvaD lojmIt poSmoH. «yaH beq yIja'. Hovtay' DamejmeH chaw'lIj tatlh 'ej tangqa' targh DaHIjmeH chaw' navmey nob. pa' qarla' 'eSpInSa' DaSuqqa' je.» nIHDaq SIq 'ej mumejmoH. poSDaq ghoS 'ej qa'rI'Daq ngab.

vaSDaq ba'taH qarla' 'eSpInSa'. quSDaH wa' quS Dan. loQ chIS qabDaj 'ach rIQbe'law'. nIHDaj qoghDaq HuS mep gho Doqqu'. HIjlu'meH perlu'pu'. QeHba'. jIchollI' 'e' tu'DI', nom jIH mubuS QeHDaj. machDI' chupmaj, muQoy'laHDI', jItlhIjchoHtaH.

«'eSpInSa' joH, qarla', jIQoSneS. ghu'vam vIpIHbe'chu'neS, choHarnIS.»

QamchoH 'ej muDuQ QeHDaj. ghaH run law' jIH run puS, nachmo', 'ej ghaH qan law' jIH qan puS, cha'maH DISmo'. Hung Qu'mey law' gheSba'ta'. jIH vagh cheb je ngI', 'ej Somraw'mo' HoSba'. matlhaSchugh, mujeghchu', 'ej Doy'choHbe' ghaH.

Sal ghopDaj. qoghDaj mep gho je luH. gho rarHa' 'ej jIHDaq wob. «tera'Daq maHtaHchugh, SoH wej puq poHlIj je vIrupchu'. Hoch boghajbogh vIDoQ.» muja'.

«bIDo'; naDev chut QorwI' chaw'be' 'arqon.»

mep gho vItlhap 'ej SutwIj qoDDaq vIlan. wagh qawmoHwI'Homvam. ghaHvaD DeQ QebwIj vInob. «ratlh Huch puS, 'ach DaghajlaH. chaw' luDIlmeH HochHom tlhappu' 'arqon.»

ja'. «chaw' luDIlmeH?»

loQ jImon. «tangqa' targh vIghajmo', 'ej nIHwI' jIHbe'mo', HIjwI' jIHba' 'e' wuq. vaj HIjwI' chaw' vIDIlmeH muraD.»

SIbI' QeH ghaH 'e' mev 'ej Hagh. ghIbralDaq yap poHDaj 'ej waghqu' HIjwI' chaw' 'e' Sov. yonlaw'taH. DeQ QebwIj pol. «wanI'vam vIlIjrup, qaleghqa'be'chugh.» jatlh. «qaleghchugh, qabechqu'moH. bI'oy'qu'mo' meQtaH DIrlIj 'e' DamaS. yaj'a'?»

«yajchu'.» jInoghbe' 'e' vInID. muDuQqa' mInDu'Daj ghIq pe'vIl mej ghaH. vaS reDDaq bejpu' yaH beq, tamtaHvIS. Hoch leghpu'. chIS ghaH -- chIS Hoch 'arqon qab net Sov 'ach tlhoy chIS qabDaj'e'. yapqu' meq. be' mu'mey Qoy'pu' 'ej vItchu' 'e' Sov. navmeywIj vISuq 'ej vImej.

chalDaq jen ghIbral Hov. tugh qaS DungluQ. ghIgh vIHutlh. Huch vIHutlh. jey vIHutlh. tlheDpa' DujwIj qaS jaj Hoch 'e' vIloSnIS neH. loghvergh botlh vIcheghchoH. chaq jItlhonglaH: vay'vam vongwI' muchHom vImuchchugh, Soj QongmeH pa' je vISuq 'e' vItul. SIbI' jIH retlhDaq yItchoH loD. chu'ba' malja' HIpDaj. qejtaH targhoy mach loHwI' 'e' vIpIH, loD vIleghDI', 'ach SIbI' vIpIHHa'. tlhoy mach loD. Hung yaS ghaHbe'ba'. tlhoy pup SutDaj. not butlh SIQba'law'. chelwI''a' neH ghaHba'. jIrotlhbe' jIH, 'ach jIH rotlh law' ghaH rotlh puS. pujwI' ghaH.

nom vIghov. muchDaq ghaH vIvongpu'. malja' SutlhwI' ghaH. tangqa' targh je'wI' ngevwI' je lIH. targhoy machDaq muchwIj wa'DIch lubejpu' ghaH, ghom tIn je. ghomDaq Sut pup tuQ Hoch. raSDaq bID nuv vIvongpu'. tIvqu' ghom. bel 'angmeH loDvam, pop tIn vIHev. mach vatlhvI''e' Suqbogh loD, 'ach machbe' Huch'e', Huch law'qu' lIngmo' ghIbral tangqa' targh malja'. mIpqu'. pop tIn noblaH 'e' baj. Sut chu' je'laH 'e' baj.

muja' mIpwI'. «qanroy quv, lutlhmo' qepvam jItlhIj, 'ach qajatlhnISqu'. 'eb'a' vIqem.»

'arghlaHbe' ghu' 'e' DaQubDI', nargh malja' weHwI'. wejpuH. «jIQoS, 'ach jIghung 'ej jI'oj 'ej jIDoy' 'ej vay' Dangevbogh vIje'qang 'e' yIpIHQo'.»

taH ghaH. «qanroy quv, pongwIj 'oH jenSen'e'. HIQoyneS neH. Ha', HatlhDaq raS wISuq. vIDIlba' jIH. megh DaSoplaH. bIleSlaH. SoQwIj DaQoypu'DI', tlhu'be'pu'chugh 'eb, vaj qay'be'.»

mumevmoH Qe' chupbogh. Dunchu' Hatlh. vengvamDaq 'oH Dun law' Hoch Dun puS. 'ovbe'laH latlh. Soj qob jab. waghqu'. ghemHom vIDIlmeH, qaStaHvIS Hogh'e' jIvumnIS. loD volchaH jI'uchchoH 'ej jImon. «jenSen quv, megh DaDIlchugh SoH, jI'Ijrupchu' jIH.»

Quchlaw' 'ej HatlhDaq muDor. jIHvaD cheSvel tuQmoH Qe' jabwI''a', 'ej tugh raS 'IHDaq jIba'taH. 'amyuStang nay vISoplI': chanDoq tlherDaq So''egh ghotI' mach. 'eng HIq vItlhutlhlI'. SengmeywIj vIlIjchoH, 'ach loD vIqImtaH. pumbeH waq cha'DIch.

neppu'be' ghaH. jIleS 'e' chaw', SoQDaj muchchoHpa'. nay'a' vISoplI': tIqnagh lemDu' Dech naH DeH. wepDajvo' toch De'wI' teq.

«qanroy quv, jIjaq 'e' yIchaw'. qen bIDo'Ha' 'e' luSov waDa DIvI' mochpu'wI'. ghu'lIj pIch Daghajbe' SoH 'e' luSov. pIQaH wIneH, juchaw'chugh. jutoy' 'e' wIje' wIneH.»

muja'DI' tlhoS muvoQ HIqwIj. HIvje'wIj vIroQ 'ej wuSwIj vIQaDmoH. «vongwI' DapoQ'a', jenSen quv?»

«ghobe', qanroy quv. HIjwI''e' wIpoQ. wa'leS DujDaq ghIbralvo' wejmaH cha' tangqa' targhmey Qay ghom wI'oSbogh 'e' nab. Hoch ngevlu'pu'. HIjlu' 'e' wIlay'chu'. wa' tangqa' targh neH HIj HIjwI' 'e' chaw' 'arqon qum. Do'Ha' DaH wejmaH wa' HIjwI' neH DIghajtaH.»

jImIS 'e' vI'angmeH jImonHa'. «vaj qatlh wejmaH cha' tangqa'Hommey Danab?» nujwIjDaq latlh Soj 'ey' vIlan.

tlhuHqu' jenSen. «rInpa' wa'Hu' pov wejmaH cha' HIvwI' DIghajmo', qanroy quv.»

toH, ngugh nIHwI' muHlu' 'e' vIqaw. jengva' vIbuSHa'choH. pay' jIghungbe'. tera'Daq targhHom wejmaH cha'DIch SuqmeH vay', wa'maH 'uy' DeQ nobta'. HIjbe'chugh jenSen ghom, vaghbIp DeQ poQ lay'Ha'ghach jIp.

«vongwI' jIH. tangqa' targhmey vISovbe'. HIjwI' Qu' vISovbe'.» vIja'.

«machqu' Sov 'ut, qanroy quv. tangqa' targh'e' Qorghlu'meH ngeDqu'. DujDaq Ha'DIbaH qeng neH HIjwI' 'ej pa'Daq tlhejtaH. tera'Daq qughtaHvIS Duj, pa' muD jIH 'ej 'IqchoH yInSIp 'e' bot. ghochDaq pawDI', Dujvo' qeng. yapbej laHmeylIj.»

vIghel. «qatlh latlhvaD chaw' DaSuq neH?»

«vagh DIS poQ chaw' mIw, qanroy quv. DaSuqmo' mayay' 'ach mabepbe'. ram meqmey -- HIjwI' SoH pay' 'e' lulaj 'arqon. tera'Daq tangqa' targhvetlh wejmaH cha'DIch wIHIjmeH, chaH neH DIQuchnISmoH.»

toch De'wI' vIleghmeH raSDaq 'oH tlhe'. 'ang'egh malja' mab. «maHvaD bIHIjmeH, SoHvaD wa'bIp DeQ wInobrup.»

law'qu'bej Huchvetlh. DaH Huch vIHutlhtaH, 'ej tugh Qu' vIHutlhtaH, 'ach...

«motlh'a' HIjwI' popvetlh?» qar 'e' 'ang ghaH. jIyev 'ej mab vIlaDtaH 'e' vIghet. muchwIj wa'DIch vIqaw pe'vIl 'e' vInID. jengva' tebbogh nay vItu' 'ej pay' vIqaw: vulqangan tlhorgh. qoghDajDaq vItlhup. «Su', Suraq tlhImqaH.»

quSDaq vulchoHlaw' jenSen. Soq mInDaj. wepDajDaq jInej 'ej navmeyDaj vISam. bIH vInuD 'ej malja' chaw'meyDaq pongDaj vItu'. malja' DeQ Qeb, ghot DeQ Qeb je De' vIlaD. law'qu' DeQmey nawlaHbogh qen 'e' vIlegh.

«choQoylaH'a', qen?»

«HISlaH, qaQoy.»

«maj. juppu' maHbej. maja'chuqDI' Hoch wIDIS. not mev peghmey, qen. pagh wIpeghmoH. yaj'a'?»

«HISlaH» ja'. tlhoS tam ghaH. pe'vIl vI'Ij.

«yIja': nuq 'oH HIjwI' pop motlh'e'? malja' ghomlIjvaD tera'Daq ghIbralvo' tangqa' targh HIjchugh?»

yevbe'chu'. SIbI' jang. «vagh bIp DeQ.»

«'ach jIHvaD wa' bIp DeQ neH Danob 'e' DanID, qen. juplI' DaSaHbe''a'? qatlh DanID?»

SoqtaH jenSen mInDu' 'ach tuHlaw' ghaH. «bIjIv 'e' wIpIH. bIDo'Ha'qu'mo' nom wa' bIp Dalaj 'e' wIpIH.»

«Sulugh, qen. DaHjaj jIDo'be'bej. 'ach jIDo'qa'lI'. mI' wej vItoghDI' bIwuqchoH, qen. choQorghHa' DaneHbe' 'e' Dawuq. quvlIj vItoDtaH 'e' Datlhoj, 'ej malja' mabvam DalIS. vagh bIp vIHevmeH DachoHmoH. 'ej malja' ghomlIj DeQ Qeb Dachel -- jItlheDpa' Huch vIghajnISba'. yaj'a'?»

«HISlaH, yaj.»

wepDaq navmeyDaj vItatlh. jIba'qa' 'ej jItogh: wa', cha', wej. pay' poSmoH mInDu' qen jenSen 'ej leSHa'. pe'vIl qIm. loQ Qonglaw'pu' 'e' tu' latlh 'e' SIvlaw' toch De'wI' vInuDlI'. mab vIbuSlI' 'e' vIghet. «jISovbejbe'.»

«HInobHa'» muja'. «chaq rom vIDublaH. ghu'maj DatoDbejtaH. vaj qatlh popvaD vagh bIp wItambe'?» malja' mab choHmoH 'ej jIHvaD nobqa'. toch De'wI'Daq 'oHtaH malja' DeQ Qeb'e'.

«jenSen quv, HIjwI'lI' jIH.» leSba' ghaH 'ej yonba'. Dotlh rap 'angbe' qabwIj 'e' vInID.

meghwIj vItIvlI'meH mumej jenSen. mejpa' nab QIj. 'arqon mo'qachDaq HIjwI' chaw'wIj vIcha'. ghIq targhHom vImaSbogh vIwIv net chaw'. Duj vItIjpa' chaw' vIcha'qa' 'ej muyu' 'arqon teptum 'avwI'. 'ej pItlh! tera'Daq vIpawDI', vagh bIp DeQ vIghaj.

QIt naymey veb vISoplI' 'e' vIchID. Soj qub naDlu'meH yapnIS poH. megh DIlta' jenSen 'ej jImejpa' jabwI' pop vIghurmeH QebDaj vIlo'. murI' Qu'wIj chu'. HIjwI' vIgheSchoH.

jIHvaD ram tangqa' targh Hal. motlh rejmorgh ghaH HIjwI''e' 'ach jISaHbe'. wa' vatlh rep tlheD DujwIj; wa'maH rep vItlhetlhnISmoH. jImoDbe'. QIt jIyIt 'e' vItIv, QIt jISoppu' 'e' vItIvmo'. puS yItwI'pu'. latlh HIjwI'pu' vIlegh. reH HIjwI'pu' ngu'laH vay', DeSqIvDaq targhHom 'uchmo'. tagha' mo'qach Hopqu' vISIch. yaH QorwaghDaq jImev 'ej qoDvo' muqIm 'arqon run. Hob ghaH; Dallaw' ghu'Daj.

«HIjwI' SoH'a'» mughel. tlhoS mubejbe'.

«HIja'» vIjang. jI'elmeH lojmIt Sen ghaH. jIvItba'qu' 'e' legh.

mo'meyDaq ghIr letlh. DInDaq chuSqu' pa' tIn. pa' botlh luteb tlhoy'mey mach. jojDaq reHtaH wej SaD tangqa' targhmey. jach 'ej qet 'ej ruq. meQqu'moHbogh muD maq Deghmey. Dat yIbmey wab Qoylu'. Quj tangqa'Hommey. tlhoy' toSlaHbe' 'ach retlh luleghlaH. SumDI' vay', Human 'arqon ghap, cholqangqu'. SaH wa'maH wej Human. HIjwI' chaHba'. Ha'DIbaH woH ghIq roQ 'e' vIlegh. wIvmeH HIjwI', tangqa' targh tlhap. qIvmeyDaq 'uch. mInDu' nuD. jat SuD chov. Huj tay, 'ach pablu'chu'. tagha' targhHom wIv Hoch HIjwI'. 'arqon SumDaq qeng 'ej rIn mIw 'e' loS.

wejlogh tay vIleghpu'DI' jIpab. tlhoy' vIghoStaHvIS mulegh wa' targhHom Quchqu'. muSIchmeH latlhmey ghomHa'moH. 'oH vIwoH.'IH. 'IHqu'. 'ach vagh bIp DeQmo', moHlaH 'ej Qu' vIta'. veqlargh Sa'Hut rurchugh qabDaj jISaHbe'.

«Ha', machwI'» vIja'. tlhoS 'oHvaD machwI'oy vIpong. «SoH yap law' Hoch yap rap.» yInSIp ruq 'ej jatDaj mach jeqmoH. SuD; bIQ Hurgh rur. maj. 'arqon vInej. be' mob vISam 'ej vIghoS.

«HIjwI' SoH'a'» mughel. tlhoS Hob. ghaHvaD Dallaw' je ghu'.

«HIjwI' jIH.» jIja'. «qanroy Dun, HIjwI''a'. jItoy'rup.» Haghbe' ghaH. jItlhaQbe'law'.

«'ej tangqa' targhvam'e' DawIvta''a'?»

«vIwIvbejta'» jIja'. «be'vam pong vIwIv'a' je?»

SaHbe'law' be'. «motlh mIwvetlh, qaH. permeyDaj vIgher, pIv 'e' vI'olDI' 'ej Sepbe'meH vIwojDI'.» ghopwIjvo' targhHom tlhap 'ej veDDaq noch yuv.

«vaj ghaHvaD luqara vIpong. luqara mara ghIlqa' voSpegh jej pach telun. chay' bIchov, 'Iq'a'?» nuq vIjatlhlaH. tugh bID 'uy' DeQ vISuqpu', DaH jISopchu'ta', 'ej jIQuchqu'taH.

mISchoHlaw' 'arqon. «loD pong Datam 'e' vIchup, qaH. loD DawIvpu'. pIvchu', 'ach be' DamaSchugh latlh DawIvlaH. latlh vI'ol 'ej vIwoj.»

«qay'be'. nuq 'oS pong'e'? yap loDvam. 'oHvaD luq vIpong neH. yIruch, yIwoj 'ej yIper.»

«Qo'. SoHvaD vIper, qaH, 'ach tangqa' targh be'mey neH luwojlu'.» jIHvaD targhHom tatlh. «HItlha'. luq permey vIgher.»

vagh tup pIq jImej, poSwIj DeSqIvDaq luq vIqengtaHvIS. poSDaj qoghDaq HuS mep ghoDaj chu'. 'IH per gho SuD. wa'maH tup neH natlhpu' mIw. tIq vergh He, 'ej rut mutlha'taH vay' 'e' vIQub. teptum yaH vIghoS. SIbI' 'avwI' vIghov. ghIbralDaq 'arqon'e' vIleghpu'bogh ghaH pI' law' Hoch pI' puS. qaStaHvIS muchwIj Hogh wa'DIch, ghaH vIvongmeH yap meqvetlh. nom vulchoHpu' 'ej wanI' tIvqu'pu'. rInDI' much muSuch 'ej muvan. roD vanbe' 'arqon. teptum lojmIt vISIchDI' muvanqa', 'ej mon. mon 'arqon, DaH cha'logh neH 'e' vIlegh.

«qanroy, Sengmey DaSIQpu'bogh vIQoyDI' jIQoS» muja'. vengvam machDaq nom leng joS; 'otlh rur. tangqa' targh joS vo'law' pIvghor. «'ach bIDo'qa' 'e' vItu'. qachaw'neSmo' jIbelqu'. HIjwI' lenglIj wa'DIch 'oH qar'a'?»

jIqawmeH jIqIm. qawmoHwI' mIwmo', wej SaD vongmeH mu'mey, nuvpu'chaj je vIqawlaH. «qatlho'. ghaytan HIjwI' lengwIj Qav 'oH je. vongwI''e' jIH. SerghIl, qar'a'?»

Hemqu' ghaH. ghIbral ta' puq ghojmoQ mojmeH ghaH vInumta' 'e' Da. «qar, qanroy. choqawmo' choquvmoH. Ha', SIbI' qachaw'rup. qayu'DI' bIjaHlaH. Su': mub'a' HIjwI' chaw'lIj? tangqa' targhvam DaSuqmeH, bIpab'a'? 'ej tangqa' targhvam neH DaHIj'a'? HIjang: HIja' ghobe' ghap.»

wejlogh vIjang. «HIja'.» mInDu'wIj bej 'arqon 'ej wejlogh laj; yabwIjDaq vIt 'ol. jImon 'ej vIghel. «Ha'DIbaH wojlu'pu''a', choghel'a'?»

«ghobe', qanroy. 'utbe'.loD DaHIjtaH.»

«veDvam law'mo' chay' DaSov?»

«SuD per. SuD loD per; Doq be' per.»

vIja'. «lI' pat.»

mejmeH chaw'wI' qelqa' 'ej jey nuD. «wa' vatlh rep tlheD DujlIj, vaj yapbej poHlIj. vay' DapoQchugh, qaSpa' ramjep naDev jIvumtaH. qaleghqa'be'chugh...lenglIj yItIv, qanroy.»

tugh qughDuj buSevlaSDaq pa'wIjDaq jIHtaH. ghIbral vIghoStaHvIS wa' pa' mach wIwav jIH, wej latlhpu' je. DotlhwIj luDubta' jenSen, waDa DIvI' je. DaH tera' vIghoStaHvIS tIn pa'wIj 'ej jImob. HIjwI'vaD motlh pa'vam. jImobchu'be' -- mutlhej luq. tangqa' targh mo', 'uchmeH quS je ngaS pa'. Seng yInSIp ruqbogh luq 'e' botbeH muD SeHlaw.

vIqoplu'DI', targhoy mach weHlu'DI', tepwIj tlhaplu'. jItlhabqa'DI' tlhablaw' je tepwIj. naDev 'oH Qay'law'pu' jenSen 'ej pa'Daq pup Hoch. mo'Daq leSchoH luq 'ej beyHommey Quch tlhuD. quSwIjDaq jIleSchoH jIH 'ej jaj wanI'mey vIqelqa'. ghaytan jImuchqa' net tuch, 'ach tugh mIp vIHevbogh tIn law' mIp vIqotlhbogh tIn puS. muyIv ghu'. 'arqon vIja'ta'. «ghaytan HIjwI' lengwIj Qav 'oH. vongwI''e' jIH.» vagh bIp DeQ 'oSmo' Hoch targhHom vIHIjbogh, mutlhu'moH Qu'. «'ach vongwI''a'vaD yap'a' yInvam?» vIghel'egh.yabwIjDaq cha' DuHmey vIchov. chay' pIm? qaq nuq? narghchoH qech. ngIlbej. SuDqu'. 'ach cha' qo' DuHmey nIv DuD...vImuHlu'be'chugh. quSwIjvo' jIHu' 'ej luq Dotlh vI'ol. mo'Daq QottaH 'ej QongtaH. puchpa' machDaq vIQam 'ej neSlo'Daq qabwIj vIqel. vongmeH mu'mey chu' vI'ogh 'ej qechwIj vIta' 'e' vItagh.

ramjep wejmaH tup ret buSevlaS vImej. nom mo'qach Sum vIghoS. 'oH tIn law' latlh vISuchpu'bogh tIn puS. tangqa' targh vengHom rur; Dat vIHtaH Humanpu' 'arqonpu' je. jIbItbe' 'e' vIghet. jInepbe'chugh Qobbe' ghu' 'e' vIpIH. lojmItDaq yaSvaD navmeywIj vI'ang, HIjwI' jIH 'e' vI'ol, 'ej jI'el. ngaj poH 'ej wIvwIj vISaHbe'. mIchmey mach chev tlhoy'mey, 'ej rurchuq targhHommey ngaSbogh mIch. targhHom vItlhap. 'oH tIn law' luq tIn rap. mo'mey 'emDaq loD mob vISam 'ej vIghoS.

«HIjwI' SoH'a'?» mughel. lugh 'e' vI'ol. «tangqa' targhvam'e' DawIvta''a'?» vI'olqa'. «maj, HInob.» targhHom veDDaq noch yuv, De' cha'bogh nuD, ghIq jIHvaD buSqa'. «bIwIvchu'ta'. pIv be'vam. vIwojDI' Dange'laH.»

«be' 'oH'a'?» jIbelbe' 'e' vInID. «va, loD vIneH. be'vaD Do'Ha' jajvam net Sov. vItatlh neH.»

muqImHa'choH 'arqon. SaHbe'law'. ghaytan meqmey Hujqu' Qoypu'. mo'meyDaq targhHom vIqengtaHvIS mubejbe' ghaH; law'ba' Qu'Daj. mo'mey vIjuS. be' vItatlhbe'. lojmIt vIghoS. jImoDbe' 'e' vInIDqu'. vImevlu'be' 'ej tugh lojmIt vIveghta'. nIHwI' vImojta'.

tIqbe' vergh cheghmeH leng 'ach nI'qu'. vItlha'lu' 'e' vIHajqa'. SIH He 'ej cha' 'arqon Hop vIlegh. loQ chu'wI' mu'mey le' vIQubchoH, 'ach tlhoy 'eq. rInpa' ramjep, lI'be' mu'mey. vaj per Doq vIlel 'ej tangqa' targh qoghDaq vIHuSmoH. qarla' 'eSpInSa' 'oH 'e' maq per. loghvergh vI'elDI' tach mach vISam. muD pat Qatlh ghaj tach. jIba' 'ej latlh tlhutlhwI' vItu'. HIjwI' chaH HochHom'e'; DeSqIvDaq tangqa' targh qengtaH. motlh HIq tIv HIjwI', tera' Duj tIjpa'.

'arqon vIt laH naDnISlu': nom Qapchu' teptum. mapuSbe' 'ach ghaytan wa'maH tup neH poQ Hoch chaw'meH mIw. toH, chaq Hoch'e' chaw'lu'be'. wej qaSpu' ramjep 'ej vumtaH SerghIl, jupwI' ror. mughovbej. wornagh wagh vIDIlmeH waDa DIvI' Qeb vIlo' 'ej bID rep vIloSchoH. wornagh cha'DIch vItlhutlhtaHvIS, tach lu'el loS 'arqon. wa' ghaH loyoq'e'. «tangqa' targh woD 'ej tachvo' Qam!»

pa'Daq jotchu'law' latlh HIjwI'pu'. targhHommeychaj woDlI' 'ej tachvo' nechlI'. jIHeQ je; QuchtaHmeH qarla' 'eSpInSa' rolDaj bIngDaq naHletmey vIlan. vIHtaH gho...«HoSDo' ngal» jIja''egh. pay' jIDachlaw' 'ej tlhoS jIpum jIngaDqa'pa'. qaSpu' vay' 'ach wanI' vIngu'laHbe'.

jIH mughoS loyoq. latlh HIjwI'pu' buSHa'. «qaja'pu' pIbuS, qanroy. tangqa' targhlIj 'oH'a' Ha'DIbaHvam?»

«HIja'» vIjang. mInDu'wIj buStaHqu' mInDu'Daj. «jIqarmeH, waDa DIvI' tangqa' targh 'oH. HIjwI' neH jIH.»

«waDa DIvI' toy'pu' nIHwI' ghaHbogh HIjwI''e'. waDa DIvI' rap Datoy'. nub ghu' 'e' DaQub'a', qanroy?»

«ghobe'» vIja'. «HIjwI'vetlh muHlu'. nom latlh lupoQ 'ej naDev jIH. nub 'e' vIQubbe'chu'.»

mujuS 'ej tachDaq tangqa' targh woH. qoghDaq per nuD. beyHom mIS jatlhlaw' targhHom, naHletmeyvo' peptaHvIS loyoq.

«'ej qarla' 'eSpInSa' 'oH'a' Ha'DIbaHvam?» bejqu' mInDu'Daj.

«HIja', lugh.» vIja'. jISIv 'e' lu'ang mInDu'wIj'e'.

«qaStaHvIS wa'Hu' ram muchlIj choQDaq mutlhejbogh be' 'oH'a' Ha'DIbaHvam?»

jIHagh. «ghobe', mo'qach motlhDaq tangqa' targhvam vIwIv. 'oHvaD be'vetlh pong vInob neH.»

«toH» ja' 'ej DeSwIjDaq tangqa' targh yuv. «vaj teptum yaHDaq pIDor, qanroy. tlheDDI' DujlIj bIratlh SoH vIneHbe'bej.» latlh 'arqonpu' SIq. muDech 'ej matay'taHvIS teptum yaHDaq mayIt.

qaSpu' ramjep. runbogh 'arqon be' 'ej 'IHbogh ghaH teptum 'avwI''e'. tlhoS Human rur. tlheghDaq jIloStaHvIS jIHvaD chup'egh pong SerghIl, 'ach meq vIngu'laHbe'. not maqIHchuqbej; muchmeywIj bejpu'be' 'op 'arqon. chaw'wI' lojmIt vISIchDI' HIjwI' chaw'wIj vI'ang.

chaw' qIm ghaH. ghIq jIH muqIm. ghIq loyoq jupDaj je qIm. muleghchu'meH loyoq be' Dop QamchoH. chaw'Daq pongwIj laD be'. muja'. «qanroy, Su': mub'a' HIjwI' chaw'lIj? tangqa' targhvam DaSuqmeH, bIpab'a'? 'ej tangqa' targhvam neH DaHIj'a'? HIjang: HIja' ghobe' ghap.»

«HIja', mub HIjwI' chaw'wIj. HIja', targhHomvam vISuqmeH jIpab. 'ej HIja', tangqa' targhvam neH vIHIj.»

mubuS loyoq. poSqu' mInDu'Daj. ghaH merlaw'pu' mu'meywIj; yay'qu' ghaH 'e' 'ang qabDaj. jIvegh 'e' chaw'rup teptum 'avwI' 'ach mubot loyoq. ghaH vIleghqa'meH DeSwIj 'uchchoH ghopDaj 'ej mutlhe'moH.

«SoHvaD latlh qaDHom vIghaj, qanroy, Dachaw'chugh.» mInwIj buSchu' mInDaj. «nIHwI' SoH'a'? HIjang: HIja' ghobe' ghap.»

jIHvo' ghopDaj vIyuv. jIbergh. «choghelta'qu'. nIHwI' jIHbe'.»

merqa'law' mu'meywIj. latlh 'arqonpu' qIm loyoq. loQ vIH nachDu'chaj 'ej mubuSqa' ghaH. «jItlhIj, qanroy. qachovHa'law'pu'. qamawpu' 'e' vIHechbe'.»

«qay'be'. Qu'lIj Data'lI' neH. maj. marIn'a'?»

«marInchu'. bIlengtaHvIS bIQaDjaj, qanroy.» tlhe' 'ej mej; lutlhej wej latlhpu'. mubej teptum lojmIt 'avwI', mISlaw', ghIq nuv veb buSchoH. jIyIt, 'ej qarla' 'eSpInSa' vIqengtaHvIS, Duj vItIj.

pa'wIj vIghoch 'ej jI'el. SIbI' muj DaqwIj 'e' vIQub, pagh chaq bong pa'wIj Danpu' latlh HIjwI'. meq vISovbe' 'ach pa' vI'elpa' mo' DanbejtaH latlh tangqa' targh.

'uchmeH quSDaq baghlu'. jI'elHa'meH jItlhe' 'ej lojmIt 'emDaq mu'mey ghItlhpu'bogh vay' vIlegh.«HoSDo' ngal» vIlaD. jIyIt 'e' vImev 'ej tlhoS jIpum. nom jIngaDqa' 'ej lughqu' DaqwIj 'e' vItlhoj. lojmIt vIngaQmoH 'ej muD SeHlaw vIlIS.

jajlo' ngabpu' wa' targhHom 'e' tu' ghIbral tangqa' targh mo'qach. rep law' ret tlheDpu' buSevlaS. tera'Daq qughlI'. tIvchuqchu'taH luq qarla' je. ghIbralDaq boghbe'bogh tangqa'Hom puqghom wa'DIch lulIngmeH vangtaH. HIjwI'vaD vagh bIp DeQ baj luq. nIHwI'vaD wa'maH 'uy' baj tangqa'Hom cha'DIch. 'ach vongwI' jIH, 'ej tera'Daq tangqa' targh le' vIqengtaH. yatlhlaH 'ej tugh yatlhbej. jIHvaD DeQmey bajbogh 'oH vIwuqlaH jIH. 'oy' vISIQjaj.

rIn

PDF yIlaD