pem, ram je

bov tIQ, chu'chu'taHvIS 'u' 'ej pagh yoq tu'lu'taHvIS, wa' Qun neH tu'lu'. tI'yan 'oH pongDaj'e'. chenmoHwI''a' ghaH. jatlhDI' ghaH, chen vay' 'ej QeHchoHDI' Qom 'u' Hoch HoSghajqu'mo' ghoghDaj.

wa' jaj yIttaH 'ej QubtaH tI'yan. yIt pay' 'e' mev 'ej jatlh « tlhoy Hurgh. jIyIttaHvIS HewIj vIleghlaHbe'. vabDot tochDu'wIj, chapDu'wIj joq, cha'neHDu'wIj joq, qamDu'wIj joq vIleghlaHbe'chu'. »

vaj valqu'mo' tI'yan tamghay chenmoH 'e' wuq.

jatlh « tamghay, yInargh. »

'ej SIbI' tI'yan tlhopDaq nargh tamghay.

jatlh tI'yan « tamghay, jIleghmeH qachenmoH vaj reH tlhopwIj DawovmoH. SoHmo' HewIj vISovlaHtaH. »

jang tamghay. jatlh « lu', qaH. reH qatoy'taH 'e' vI'Ip. »

vaj tI'yan wovmoHwI' gheS tamghay 'ej qaStaHvIS poH nI'qu' chenmoHwI''a' Dev, wo'Daj vaS nuDtaHvIS. qaStaHvIS poH nI' matlhchu' tamghay 'ej ra'DI' pIn'a'Daj lob 'ej not tlhIv. 'ach qej tI'yan 'ej leS tamghay not 'e' chaw'. SIbI'Ha' ghalchoH 'ej qeHchoH bay'eS 'ej pIn'a'Daj lumoHmeH QuSchoH.

wa' jaj DumtaHvIS tI'yan So''egh tamghay. vemDI' chenmoHwI''a' Dach tamghay nom 'e' tlhoj 'ej QeHchoH. tamghay SammeH 'u' HurghDaq Dat nej 'ej yuQ 'emDaq So''eghtaH tamghay 'e' Harmo' yuQ law'qu' Qaw'chu'.

qettaH 'ej jachtaH 'ej raltaH. SIbI'Ha' qetqu'pu'mo' 'ej jachqu'pu'mo' 'ej ralqu'pu'mo' Doy'qu'choH 'ej Dej pe'vIl tlhuHtaHvIS.

ngugh So'Ha''egh tamghay 'ej pIn'a'Daj HIv. pe'vIl nachDaj qIp. logh'obDaj pup. tIch. pum tI'yan 'ej 'oy'ba'taH porghDaj naQ. jeyta' 'e' Har tamghay vaj baqmeH jeqqIj lel 'ej tI'yan ghoS. 'ach DuQrupchoHDI' nom pay' Hu' tI'yan 'ej tamghayvo' jeqqIj tlhap. pung SuqmeH qoy' tamghay SaQtaHvIS.

jatlh « joHwI', SoHvaD jIyI'chu': jIQoS. jInguqmo' qaHoH 'e' vInID 'ach DaH QaghwIj vIyaj. DuHoHlaH pagh. bIHoSghajchu'. punglIj vItlhob. SoHvaD jIlI'laHtaH. choHoHnISbe'. HIHoHneSQo'. »

qaStaHvIS lup puS jangbe' tI'yan. tamchu'. QeH mInDu'Daj; pe'bIl lurur. Doj HoSDaj; vIghro''a' rur.

SIbI'Ha' jang chenmoHwI''a'. jatlh « DaHjaj qaquHchu' 'ej 'u'Daq Dat 'ay'lIj vIghomHa'moH. reH bIHeghtaH 'a not bIHegh. reH 'oy' neH DaSov 'ej HewIj DawovmoH not 'e' DamevlaH. »

ghIq tamghay ghorchu'. 'ay'Daj woH 'ej buqDaq lan. ghIq wo'Daj Dat leng 'ej lengtaHvIS Dat bIH ghomHa'moH. vaj toy'wI'Daj matlhHa' HupmeH pem, ram je chenmoH tI'yan, Qun wa'DIch.

pItlh