paq'batlh
lutvaD ghotvam luDalu'
jachwI'na'qanjIt
qeylIS qanjIt puqloD
moratlh qanjIt puqloD
molor
molor Duy
qanra' qamchIy qup'a'
luqara' qanra' puqbe'
SuvwI' qan
qortar ghe'tor che'wI'
paq'yav
lut cherlu'
jachwI'na'
naDev Sughompu'
'ej Qo'noS SuvwI'pu' Hem tlhIH
qeylIS tIghmey'e'
'ej Qo'noS SuvwI'pu' Hem tlhIH
qeylIS tIghmey'e'
DaH tIQoy
teH tIghmey
'ej bIH bolIjlaHbe'
teH tIghmey
'ej bIH bolIjlaHbe'
naDev Sughompu'
yIn lutDaj'e'
Hegh lutDaj'e' je
yIn lutDaj'e'
Hegh lutDaj'e' je
DaH tIQoy
ghaytanHa' QapDI' SuvtaH
Qunpu' Suvpu'
ghaytanHa' QapDI' SuvtaH
Qunpu' Suvpu'
naDev Sughompu'
Suto'vo'qor wIghoSmeH ngoQmaj'e'
DaH tIQoy
Suto'vo'qor wIghoSmeH ngoQmaj'e'
DaH tIQoy
pa' qeylISma' wIvan
nItebHa' maSuv
Hochlogh maSuv
nItebHa' maSuv
Hochlogh maSuv
nItebHa' maSuv
Hochlogh maSuv
nItebHa' maSuv
Hochlogh maSuv
nItebHa' maSuv
Hochlogh maSuv
pa' qeylISma' wIvan
Hochlogh wItlhej
pa' qeylISma' wIvan
Hochlogh wItlhej
1. wam
jachwI'na'
ghoS ghoqwI' tam 'e' yItu'
yoHHa'wI' Sop ghaH
Hub'eghbe' targh
yoHHa'wI' Sop ghaH
Hub'eghbe' targh
gheDlIj DaHoHHa'pu' moratlh
'ej gheDDaj charghHa' molor
Qob qo' qeylIS yIqIm
'ej gheDDaj charghHa' molor
Qob qo' qeylIS yIqIm
DaqtaghlIj yIQIq qeylIS
ngemvamDaq Ha'DIbaHmey tIHoH
wa' targh cha' tlhInganpu'qoq je
ngemvamDaq Ha'DIbaHmey tIHoH
wa' targh cha' tlhInganpu'qoq je
2. tuH
qeylIS
loDnI'wI' bIHoHta'be'
popwIj 'oH nach'e'
juHDaq porgh Daqem
popwIj 'oH nach'e'
juHDaq porgh Daqem
vaj
bItuHqu' SoH
tuqlIj tuHmoHlu'
bItuHqu' SoH
tuqlIj tuHmoHlu'
moratlh
qeylIS loDnI'
'opleS chovan
tuqmaj vIDevmo'
'opleS chovan
tuqmaj vIDevmo'
qeylIS loDnI'
'opleS bIHaghbe'
'opleS 'opleS 'opleS
'opleS bIHaghbe'
'opleS 'opleS 'opleS
3. nobqang
moratlh
qatlh ngemDaq ghaHtaH
molor Duy'e' marqagh puqloD'e'
Hop juHlIj nov
molor Duy'e' marqagh puqloD'e'
Hop juHlIj nov
Duy
bIjatlhDI' bIchul
Hem SaqSubnganpu'
DevwI'chaj SoHmo'
Hem SaqSubnganpu'
DevwI'chaj SoHmo'
tugh
'Ipvetlh Dapab
DaneH'a'
'Ipvetlh Dapab
DaneH'a'
maHvaD lojmItmey tIpoSmoH
SoHvaD tuqlIj vInoblaH
batlh Hegh pal'arpu'lI'
SoHvaD tuqlIj vInoblaH
batlh Hegh pal'arpu'lI'
moratlh
qech Dachupbogh vIqel
jIHvaD tuq Danobchugh
'Iw leghbe'lu'
jIHvaD tuq Danobchugh
'Iw leghbe'lu'
Duy
jachDI' qa'rol yIwuq
nIteb bIwuqnIS
ngeD Qu'vam
nIteb bIwuqnIS
ngeD Qu'vam
4. Heghrup loSlI'
jachwI'na'
ghoStaHvIS tam 'ej So''egh
molor QaS HoS
ram Ha'DIbaHmey rur
molor QaS HoS
ram Ha'DIbaHmey rur
Hoch
SaqSubDaq pagh Qoylu'
Qong SuvwI'pu' puqpu' rur
Heghrup loSlI'
Qong SuvwI'pu' puqpu' rur
Heghrup loSlI'
juH qachchajDaq juH qachchajDaq
Heghrup loSlI'
Heghrup
Heghrup loSlI'
Heghrup
jachwI'na'
ghIq jach qa'rol
maQ 'oH
HemHa'choH 'ej cho'choH moratlh
maQ 'oH
HemHa'choH 'ej cho'choH moratlh
pal'arpu'Daj lon lojmIt ngaQHa'moH
SumchoH mangghom 'Iw largh
moratlh wanI'vam DaSov
SumchoH mangghom 'Iw largh
moratlh wanI'vam DaSov
Hoch
SaqSubDaq pagh Qoylu'
Qong SuvwI'pu' puqpu' rur
Heghrup loSlI'
Qong SuvwI'pu' puqpu' rur
Heghrup loSlI'
juH qachchajDaq juH qachchajDaq
Heghrup loSlI'
Heghrup
Heghrup loSlI'
Heghrup
jachwI'na'
SaqSub qach tIQ beb bIngDaq
pay' qul'a' tu'lu'
HochvaD pung Hutlh qul
pay' qul'a' tu'lu'
HochvaD pung Hutlh qul
Dogh ghaH 'e' Sov moratlh
'etlh DoQDI'
meQchu'pu' wo' che'rupbogh
'etlh DoQDI'
meQchu'pu' wo' che'rupbogh
chay' 'etlh DoQ nuch
QongtaHbogh qup 'etlh nIH
vaj nIHpu' vaj nIHpu' vaj nIHpu'
QongtaHbogh qup 'etlh nIH
vaj nIHpu' vaj nIHpu' vaj nIHpu'
qanjIt qan vemmoH moratlh
vavDaj ghaH qanjIt'e'
puj tIqDu'Daj 'ach Hem
vavDaj ghaH qanjIt'e'
puj tIqDu'Daj 'ach Hem
Hoch
SaqSubDaq pagh Qoylu'
Qong SuvwI'pu' puqpu' rur
Heghrup loSlI'
Qong SuvwI'pu' puqpu' rur
Heghrup loSlI'
juH qachchajDaq juH qachchajDaq
Heghrup loSlI'
Heghrup
Heghrup loSlI'
Heghrup
5. vav puqloD je
moratlh
yIjegh vavwI'
bIjeghlaHtaHvIS
bIjeghbe'chugh vaj maHegh
bIjeghlaHtaHvIS
bIjeghbe'chugh vaj maHegh
qanjIt
SuvwI' DameH puqloDwI'
vIghojHa'moH DaH 'e' vItlhoj
bIQ lungaS 'aDDu'Daj
vIghojHa'moH DaH 'e' vItlhoj
bIQ lungaS 'aDDu'Daj
nuch SoH moratlh
jIHvaD 'etlhwIj yInob
ghIq yImej
jIHvaD 'etlhwIj yInob
ghIq yImej
HIqaDQo' puqloDwI'
SuvchuqDI' vav puqloD je
wanI' Do'Ha' law' Hoch Do'Ha' puS
SuvchuqDI' vav puqloD je
wanI' Do'Ha' law' Hoch Do'Ha' puS
moratlh
loD qan
nuq DaSov
qaghobnISchugh maghobchuq
nuq DaSov
qaghobnISchugh maghobchuq
qanjIt
bIQ lungaS 'aDDu'lIj
yInob
qara'
yInob
qara'
moratlh
not
vay'
Dara'qa'
vay'
Dara'qa'
6. Hegh vav
jachwI'na'
qaStaH nuq
ghobchuq pal'arpu'wI'
muvemmoH may' wab
ghobchuq pal'arpu'wI'
muvemmoH may' wab
qanjIt
puqloDwI' jIlujpu'
bInenchoHpu' 'ach quv DaHutlh
yIghoS yImej
bInenchoHpu' 'ach quv DaHutlh
yIghoS yImej
'ej loDnI'lI' yIjon
molor DaQapbe'nISmoH
yIghoS yIghoS yIghoS
molor DaQapbe'nISmoH
yIghoS yIghoS yIghoS
qeylIS
quv vIHutlhbe'
nuch jIHbe' 'e' vItob
DaH ghe'tor yIghoS
nuch jIHbe' 'e' vItob
DaH ghe'tor yIghoS
quvlIj vIchoq
qachvam vIcheghDI' charghwI' jIH
yay yay yay
qachvam vIcheghDI' charghwI' jIH
yay yay yay
moratlh
qaSambej
petaQ petaQ petaQ
qaSambej
petaQ petaQ petaQ
7. tlha'
jachwI'na'
juHchajvo'
qet loDnI'pu'
taH chaH
qet loDnI'pu'
taH chaH
HuDqIjDaq
qet
ghIq Hechaj bot QIStaq
qet
ghIq Hechaj bot QIStaq
8. Suvrup
qeylIS
moratlh
DaH bIHaw'laHtaHbe'
puj 'uSDu'lIj
DaH bIHaw'laHtaHbe'
puj 'uSDu'lIj
bIQ lungaS
tIqDu'lIj
loj 'Iw luHutlhbej
tIqDu'lIj
loj 'Iw luHutlhbej
pItlh
'etlh HInob
'etlhwIj 'oH 'etlh'e' 'e' DaSov
'etlh HInob
'etlhwIj 'oH 'etlh'e' 'e' DaSov
9. ghobchuq loDnI'pu'
Hoch
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
jachwI'na'
SuvtaH SuvtaH
qamDu'chaj bIngDaq
letchoH lam nagh rur
qamDu'chaj bIngDaq
letchoH lam nagh rur
Hoch
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
jachwI'na'
tujqu'choHmo' QeHchaj
nagh tetlaH tujvam
QIStaq HoS rur
nagh tetlaH tujvam
QIStaq HoS rur
Hoch
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
jachwI'na'
ghIq HoSHa'choHpu' moratlh
QIStaq qul bIQtIqHomDaq
'etlhDaj vo' nuch
QIStaq qul bIQtIqHomDaq
'etlhDaj vo' nuch
Hoch
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
jachwI'na'
'urwI' HoHmeH ghopDu'Daj neH lo'meH qeylIS
'etlhDaj chagh
tugh Hegh 'e' Sov moratlh
'etlhDaj chagh
tugh Hegh 'e' Sov moratlh
Hoch
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
jachwI'na'
nuch ghaH moratlh'e'
quvHa' moratlh 'ej jeylu'pu'
'etlhDaj tlha'
quvHa' moratlh 'ej jeylu'pu'
'etlhDaj tlha'
Hoch
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
wa'maH cha' pem wa'maH cha' ram
jachwI'na'
mob qeylIS
ngeng HeHDaq yIt
SanDaj buS vaj 'It
ngeng HeHDaq yIt
SanDaj buS vaj 'It
qul ngeng HeHDaq
ba'taHvIS qeylIS
ghoS SuvwI' qan
ba'taHvIS qeylIS
ghoS SuvwI' qan
10. qeylIS SuvwI' qan je
SuvwI' qan
tlhIngan loDnI'wI'
qatlh naDev SoHtaH
naDev taHbe' tlheng'IQ
qatlh naDev SoHtaH
naDev taHbe' tlheng'IQ
tlhIngan Do'Ha' vIQaHlaH'a'
jIba' 'ej qatlhej 'e' Dachaw''a'
jIleS 'ej qatlhej 'e' Dachaw''a'
jIba' 'ej qatlhej 'e' Dachaw''a'
jIleS 'ej qatlhej 'e' Dachaw''a'
qeylIS
wIj jup
SengmeywIj vIja'laHbe'
jIHvaD ratlh pagh
SengmeywIj vIja'laHbe'
jIHvaD ratlh pagh
SuvwI' qan
qaQaH DaneHbe'chugh
vaj qul wIchenmoH 'ej matlhutlh
'Iw HIq yItlhutlh
vaj qul wIchenmoH 'ej matlhutlh
'Iw HIq yItlhutlh
qeylIS
vaj matlhutlhjaj
ghe'torDaq ghaHtaHbogh vavwI''e' wIquvmoHjaj
Heghbogh loDnI'wI' wIquvmoHjaj!
ghe'torDaq ghaHtaHbogh vavwI''e' wIquvmoHjaj
Heghbogh loDnI'wI' wIquvmoHjaj!
SuvwI' qan
ta'mey Dun Data'meH naDev SoHtaH
bIve' net lIjbe'
quvqa'meH vavlI' yIvang
bIve' net lIjbe'
quvqa'meH vavlI' yIvang
chalDaq DapawmeH
wutlhDaq bInejnIS
qaleghqa'DI' charghwI' SoH
wutlhDaq bInejnIS
qaleghqa'DI' charghwI' SoH
11. ghe'tor 'el qeylIS
jachwI'na'
mej loD qan
qaS jajlo' wovchoH chal
ghe'tor DInDaq ghaHtaH qeylIS'e'
qaS jajlo' wovchoH chal
ghe'tor DInDaq ghaHtaH qeylIS'e'
DaH
loD qan mu'mey chul
yaj
loD qan mu'mey chul
yaj
ghe'tor 'el qeylIS
qul bIQtIqDaq ghoS
QIStaq qoD ghoS
qul bIQtIqDaq ghoS
QIStaq qoD ghoS
ghe'tor 'el nuv qoj ghe'tor mej ghaH
'e' tu'be'chugh neH veqlargh
ghe'torvo' cheghlaH nuvvam
'e' tu'be'chugh neH veqlargh
ghe'torvo' cheghlaH nuvvam
not Qapta' vay'
QIStaq qoD 'el qeylIS
bIQtIq HeHDaq yIttaHvIS
QIStaq qoD 'el qeylIS
bIQtIq HeHDaq yIttaHvIS
DIS 'elpu' 'e' tlhoj
DISvam veghlu'chugh
yInbogh nuvpu' Hutlhbogh qo'Daq pawlu'
DISvam veghlu'chugh
yInbogh nuvpu' Hutlhbogh qo'Daq pawlu'
12. betleH chenmoH qeylIS
qeylIS
ta'mey Dun vIta'rup jISeH'eghnIS
muDechbogh Dochmey vISeHnIS
Hoch vISeHnIS
muDechbogh Dochmey vISeHnIS
Hoch vISeHnIS
Hoch
jIbDaj lumeQmoH
jIbDaj lumeQmoH
qul bIQtIq qulHommey
jIbDaj lumeQmoH
qul bIQtIq qulHommey
qeylIS
jIyoHqu'
jInaS jImupDI'
jImeq jInab
jInaS jImupDI'
jImeq jInab
Hoch
jIbDaj lumeQmoH
'ej bejtaHvIS
baS moj jIb
'ej bejtaHvIS
baS moj jIb
qeylIS
ghe'torDaq lengbe'meH
pal'arpu'wI' vIQan
muyonmoH bortaS neH
pal'arpu'wI' vIQan
muyonmoH bortaS neH
paq'raD
lut cherlu'
jachwI'na'
qeylIS qeylIS qeylIS
DaH betleH yIchenmoH
batlh nuH yIchenmoH
DaH betleH yIchenmoH
batlh nuH yIchenmoH
Hoch
yIghIr qeylIS yIghIr
betleHlIj yI'uch
'IwlIj Devjaj
betleHlIj yI'uch
'IwlIj Devjaj
jachwI'na'
DaH QIStaq botlh juStaH qeylIS
nuHmey ghaj
'ej Suvrup ghaH
nuHmey ghaj
'ej Suvrup ghaH
bIQtIq qa'rI'Daq pawDI' qeylIS
qojDaq Qam
bIngDaq Qo'noS SuqSIv legh
qojDaq Qam
bIngDaq Qo'noS SuqSIv legh
Hoch
yIghIr qeylIS yIghIr
betleHlIj yI'uch
'IwlIj Devjaj
betleHlIj yI'uch
'IwlIj Devjaj
jachwI'na'
'ej pum qeylIS
pumtaH HurghtaH
pumtaH HurghtaH
pumtaH HurghtaH
pumtaH HurghtaH
ghIq pum 'e' mev
bIQtIq Doq legh
bIQtIq nguvmoH 'Iw
bIQtIq Doq legh
bIQtIq nguvmoH 'Iw
ghe'tor lojmIt'a'Daq
'Iw bIQtIq ghoS
naDevvo' chegh pagh
'Iw bIQtIq ghoS
naDevvo' chegh pagh
Hoch
yIghIr qeylIS yIghIr
betleHlIj yI'uch
'IwlIj Devjaj
betleHlIj yI'uch
'IwlIj Devjaj
1. veqlargh toj
jachwI'na'
qeylIS qeylIS qeylIS
ghe'tor lojmItDaq
SoHtaH
ghe'tor lojmItDaq
SoHtaH
nuv 'umHa' leghchugh veqlargh
ngoS nuv 'umHa'
jatlhlu'
ngoS nuv 'umHa'
jatlhlu'
Sovbej pagh
'elta' nuv law'
cheghta' pagh
'elta' nuv law'
cheghta' pagh
'Iw bIQtIqvo'
toS SuvwI' yoH
puH QaDDaq paw
toS SuvwI' yoH
puH QaDDaq paw
Daq SumHa'vo' wab Huj Qoylu'
Hegh Dujvo' wab Qoylu'
DeghwI' ghaH qortar'e'
Hegh Dujvo' wab Qoylu'
DeghwI' ghaH qortar'e'
qortar qortar qortar
che'ronchaj QavDaq
SuvwI'pu'ma' tIDev
che'ronchaj QavDaq
SuvwI'pu'ma' tIDev
QaQ qeylIS Duj
ghe'tor 'elmeH
yapbe' may' 'e' Sovchu'
ghe'tor 'elmeH
yapbe' may' 'e' Sovchu'
qeylIS betleH bochvo'
'et Duj wovmoHwI'mey
tugh nab 'ogh qeylIS
'et Duj wovmoHwI'mey
tugh nab 'ogh qeylIS
ghe'tor lojmIt
lughoS Heghpu'bogh nuvpu' qa'pu'
chen wej tlheghmey
lughoS Heghpu'bogh nuvpu' qa'pu'
chen wej tlheghmey
QIt wa' qa' nuD veqlargh
QIt latlh qa' nuD veqlargh
Hegh lurur mInDu'Daj
QIt latlh qa' nuD veqlargh
Hegh lurur mInDu'Daj
qeylIS qeylIS qeylIS
Qob mInDu'vetlh
HoHbej bIH
Qob mInDu'vetlh
HoHbej bIH
lubejtaHvIS Heghna' mInDu'
betleHvo' veqlargh mInDu' mIghDaq
'et tamghay
betleHvo' veqlargh mInDu' mIghDaq
'et tamghay
qaStaHvIS poH ngaj leghlaHbe'
ghe'tor 'el qeylIS
rIQbe' ghaH 'ej QaD
ghe'tor 'el qeylIS
rIQbe' ghaH 'ej QaD
2. qeHHa' loDnI'
qeylIS
loDnI'wI'
bIQeHba'
chaq batlh bIvangqa'laH
bIQeHba'
chaq batlh bIvangqa'laH
QIStaqDaq cholonDI' jIyIn
DaH jIyIn je
SoHvaD jIchup
DaH jIyIn je
SoHvaD jIchup
yIntaHbogh nuvpu'Daq
HItlhej HItlhej HItlhej
'ej nItebHa' molor wISuv
HItlhej HItlhej HItlhej
'ej nItebHa' molor wISuv
bIHarghtaHvIS batlh bIHegh
vaj qortarvaD bInob'eghDI'
tlhIngan tuqmey Sub SoH
vaj qortarvaD bInob'eghDI'
tlhIngan tuqmey Sub SoH
moratlh
jIDoghqu'
vIghIjlu'mo' 'ej bortaS vIneHmo'
jIleghlaHbe' 'ach chovuvtaH
vIghIjlu'mo' 'ej bortaS vIneHmo'
jIleghlaHbe' 'ach chovuvtaH
vaj
qorDu'maj ruS HoS law'
Hegh HoS puS
qorDu'maj ruS HoS law'
Hegh HoS puS
loDnI' DaHjaj
batlh jIvang 'e' vI'Ip
molor vISuvtaHvIS jIHegh
batlh jIvang 'e' vI'Ip
molor vISuvtaHvIS jIHegh
3. ghomchuqqa' loDnI'pu' vav je
qeylIS
maghomchuqqa'DI' SuyInbejmeH
DaH moQbara' tonSaw'mey
Sa'agh
DaH moQbara' tonSaw'mey
Sa'agh
muvchuqqa'meH porgh qa' je
muvchuqjaj yabmaj porghmaj je
moQbara' tonSaw' DIlo'taHvIS
muvchuqjaj yabmaj porghmaj je
moQbara' tonSaw' DIlo'taHvIS
qanjIt, moratlh je
SuH
tayvam tIQ
wIlopchoHjaj
tayvam tIQ
wIlopchoHjaj
qeylIS
wa'DIch nach 'ay'
cha'DIch ghIv 'ay'
wejDIch burgh 'ay'
loSDIch bIng 'ay'
vaghDIch Dung 'ay'
tagha' tIq Hoch Dochmey qolqoS
Hochlogh Dat joqtaHjaj
cha'DIch ghIv 'ay'
wejDIch burgh 'ay'
loSDIch bIng 'ay'
vaghDIch Dung 'ay'
tagha' tIq Hoch Dochmey qolqoS
Hochlogh Dat joqtaHjaj
qanjIt, moratlh je
DaH mararchuq
mayIntaHvIS
muvchuqtaH qa' porgh je
mayIntaHvIS
muvchuqtaH qa' porgh je
qeylIS
moQbara' 'ay'mey
bota'ta'
batlh Daqvam boDab
bota'ta'
batlh Daqvam boDab
4. nargh
jachwI'na'
vaj porghchaj muvqa' qa'chaj
molor luqaDmeH
yInqa' cha' SuvwI'pu'
molor luqaDmeH
yInqa' cha' SuvwI'pu'
tlhoS lojmIt vegh
qeylIS pal'arpu'Daj je
'elDI' veqlargh
qeylIS pal'arpu'Daj je
'elDI' veqlargh
jach veqlargh jatlh
muqaD vay' 'ej ghe'tor 'el porgh
nuqDaq ghaH petaQ'e'
muqaD vay' 'ej ghe'tor 'el porgh
nuqDaq ghaH petaQ'e'
targh Darur
vaj qaSam 'ej qaHoH
ghIq cha' tIqDu'lIj vISop
vaj qaSam 'ej qaHoH
ghIq cha' tIqDu'lIj vISop
QeHqu'mo' veqlargh
Hegh Duj lu'el cha' qortar qa'pu' qeylIS je
'e' leghbe' veqlargh
Hegh Duj lu'el cha' qortar qa'pu' qeylIS je
'e' leghbe' veqlargh
qaSDI' wa'leS
SuvwI'pu' qa'pu' yIrmeH
'Iw bIQtIqDaq lengchoH Duj
SuvwI'pu' qa'pu' yIrmeH
'Iw bIQtIqDaq lengchoH Duj
5. QeH qortar
Hoch
qortar qortar qortar
DachchoH cha' qa'
'e' Dajem 'ach chay' qaS
DachchoH cha' qa'
'e' Dajem 'ach chay' qaS
qortar
veqlargh
qa'pu'wI' 'avwI'
Dutojta' ghotHom jubbe'
qa'pu'wI' 'avwI'
Dutojta' ghotHom jubbe'
Hoch
qortar qortar qortar
qempa'QeHlI' tIghommoH
ghe'torDaq qa'pu'vam Hem law' Hoch Hem puS
qempa'QeHlI' tIghommoH
ghe'torDaq qa'pu'vam Hem law' Hoch Hem puS
qortar
chutmey tIQ wemta'
SanDaj qaDta'
tuHbe' tlhInganvam jay'
SanDaj qaDta'
tuHbe' tlhInganvam jay'
Hoch
qortar qortar qortar
qempa'QeHlI' tIghommoH
ghe'torDaq qa'pu'vam Hem law' Hoch Hem puS
qempa'QeHlI' tIghommoH
ghe'torDaq qa'pu'vam Hem law' Hoch Hem puS
qortar
petaQvam vIqopbej
QIt ghaHvaD yIn Hegh je vIghojmoH
'ej 'oy' SIQ ghaH
QIt ghaHvaD yIn Hegh je vIghojmoH
'ej 'oy' SIQ ghaH
Hoch
qortar qortar qortar
qempa'QeHlI' tIghommoH
qa'pu'vam Hem law' Hoch Hem puS
qempa'QeHlI' tIghommoH
qa'pu'vam Hem law' Hoch Hem puS
qortar
qempa'QeH
'Iw bIQtIqDaq maleng
'ej 'urwI'vam wIjey
'Iw bIQtIqDaq maleng
'ej 'urwI'vam wIjey
6. 'omchoH chaH
jachwI'na'
loDnI'Daj vavDaj je ja' qeylIS
nIteb peghoS
HatlhDaq peve'
nIteb peghoS
HatlhDaq peve'
toDuj lutraj quv lutraj je
QoymeH tlhIngan tuqmey
tIja'
QoymeH tlhIngan tuqmey
tIja'
DaH peHarghchoH
DaH molor yISuvchoH
tIja'
DaH molor yISuvchoH
tIja'
molor luSuvmeH
nuHmeychaj Suq
'e' tlhob qeylIS
nuHmeychaj Suq
'e' tlhob qeylIS
tlhInganpu' Hemqa'moHmeH
tlhInganpu' tlhabqa'moHmeH
batlh Suv 'e' tlhob qeylIS
tlhInganpu' tlhabqa'moHmeH
batlh Suv 'e' tlhob qeylIS
wuv'eghlaH
boQ lupoQbe'
tlhIngan chaH
boQ lupoQbe'
tlhIngan chaH
7. Deb mojpu' yer
jachwI'na'
SaqSub'e' muSHa'bogh
pawmeH leng qeylIS
HuDmey Sal ghIq ghIr
pawmeH leng qeylIS
HuDmey Sal ghIq ghIr
Deb mojpu' vavDaj yer
'ej choSchoHlu'pu' 'e' tu'
'op ben pa' Dab ngan 'ej chep
'ej choSchoHlu'pu' 'e' tu'
'op ben pa' Dab ngan 'ej chep
puH lonlaw'ta'
yIn qa'
SanDaj SaH pagh
yIn qa'
SanDaj SaH pagh
ghIq juH qachDajDaq paw qeylIS
qachvam luchenmoHta' vavDaj ghopDu'
'ach DaH Qaw'lu' 'ej chIm 'e' tu'
qachvam luchenmoHta' vavDaj ghopDu'
'ach DaH Qaw'lu' 'ej chIm 'e' tu'
qeylIS Qaw' 'e' nIDmeH
yerDaj weH molor
'ej juH qachDaj meQmoH
yerDaj weH molor
'ej juH qachDaj meQmoH
'ach luj molor
vangmo' molor HoSghajchoHqu' qeylIS
'ej SuvqangmoHbej
vangmo' molor HoSghajchoHqu' qeylIS
'ej SuvqangmoHbej
Suvchu'meH Suvchu'meH Suvchu'meH
ghaH SuvqangmoHchu'
molor
ghaH SuvqangmoHchu'
molor
Qo'noSDaq boqwI'mey
nejmeH je ve' qeylIS
'ej chaHvaD lut jatlh
nejmeH je ve' qeylIS
'ej chaHvaD lut jatlh
Hoch
Hoch qImmoH mu'meyDaj
ghob 'agh 'ej chul
yIntaH 'e' luleghmo' chaH mer
ghob 'agh 'ej chul
yIntaH 'e' luleghmo' chaH mer
8. SaqSub chegh
jachwI'na'
pIraqSIS maS bIngDaq
pIgh rur SaqSub chIm
choSlu'pu'bogh
pIgh rur SaqSub chIm
choSlu'pu'bogh
'ach narghDI' jul
nargh je moratlh qanjIt je
HuDmeyvo' ghIr chaH
nargh je moratlh qanjIt je
HuDmeyvo' ghIr chaH
chaH neHHa' wovmoH jul
chaH 'emvo' ghoS
SuvwI'pu' mangghom yoH
chaH 'emvo' ghoS
SuvwI'pu' mangghom yoH
Sepvetlh latlh DopDaq
Hatlh ve'taHvIS qeylIS
lutlhej tlhInganpu' Hem mI' nIb
Hatlh ve'taHvIS qeylIS
lutlhej tlhInganpu' Hem mI' nIb
Hoch
Hoch tuqmey
Hoch puq poHmey
Hoch loDpu' be'pu' je
Hoch puq poHmey
Hoch loDpu' be'pu' je
HarghmeH yeq chaH
molor HI''a' luSuv
lughIjlu'be' 'ej pujHa' 'e' lu'aghmeH Suv
molor HI''a' luSuv
lughIjlu'be' 'ej pujHa' 'e' lu'aghmeH Suv
jachwI'na'
'ej Hoch vengHomDaq Hoch vengDaq je
Suchbogh ghaH qeylIS luQoy
woQ le'yo' je 'aghbej ghaH
Suchbogh ghaH qeylIS luQoy
woQ le'yo' je 'aghbej ghaH
le'yo'raj nIHlu'ta'mo' penoD jatlh qeylIS
nuHmeyraj tIQorgh
watlh 'Iwraj 'e' lu'aghmo' nuHmey jej
nuHmeyraj tIQorgh
watlh 'Iwraj 'e' lu'aghmo' nuHmey jej
Hoch
Hoch tuqmey
Hoch puq poHmey
Hoch loDpu' be'pu' je
Hoch puq poHmey
Hoch loDpu' be'pu' je
HarghmeH yeq chaH
molor HI''a' luSuv
lughIjlu'be' 'ej pujHa' 'e' lu'aghmeH Suv
molor HI''a' luSuv
lughIjlu'be' 'ej pujHa' 'e' lu'aghmeH Suv
jachwI'na'
jatlh 'e' mevDI' qeylIS, lop
chaq tugh batlh Heghmo'
'ej chaq tugh charghmo'
chaq tugh batlh Heghmo'
'ej chaq tugh charghmo'
9. pong ghoj qortar
jachwI'na'
Daq HopHa'Daq
qa'chaj nejlI'
qortar qempa'QeH je
qa'chaj nejlI'
qortar qempa'QeH je
Dung qo' lupawDI' chaH
qeylIS qorDu'Daj je ta''e' neH
bop bommey
qeylIS qorDu'Daj je ta''e' neH
bop bommey
veqlarghvo' narghbogh loD
chutDaj bIv 'e' ngIlbogh loD
DaH pongDaj Sov qortar
chutDaj bIv 'e' ngIlbogh loD
DaH pongDaj Sov qortar
QeHqu' qortar 'ach luvuQ
tlhIngan ghaHmo' 'ej qu'mo'
qeylIS Hem Delbogh lutmeyvam'e'
tlhIngan ghaHmo' 'ej qu'mo'
qeylIS Hem Delbogh lutmeyvam'e'
lut ja'taHvIS Hem rewbe'
'ej Dat SuchDI' qortar
Dach Hoch SuvwI'pu' Hem
'ej Dat SuchDI' qortar
Dach Hoch SuvwI'pu' Hem
ghobmeH qeylIS lutlhej
qeylIS qeylIS qeylIS
qeylIS bop Hoch'e' Qoybogh qortar
qeylIS qeylIS qeylIS
qeylIS bop Hoch'e' Qoybogh qortar
lojmItDaj veghta'DI' jubbe'wI'
yInqa'meH chegh 'e' botnIS qortar
qeylIS HoHmeH qortar qeylIS SamnIS
yInqa'meH chegh 'e' botnIS qortar
qeylIS HoHmeH qortar qeylIS SamnIS
qeylIS He tlha'meH
qamchIy veng ghoSlI' qortar
pa' jubbe'wI'vam HoH 'e' nab
qamchIy veng ghoSlI' qortar
pa' jubbe'wI'vam HoH 'e' nab
qamchIy HurDaq
SuvwI'pu'Daj ra' qeylIS
SaqSub yIjaH
SuvwI'pu'Daj ra' qeylIS
SaqSub yIjaH
pa' chaH ghomqa' ghaH
qamchIyDaq SuvwI'pu' Qav tu' qeylIS 'e' tul
'ej qeylIS lutlhej
qamchIyDaq SuvwI'pu' Qav tu' qeylIS 'e' tul
'ej qeylIS lutlhej
10. qamchIy 'uQ'a'
jachwI'na'
veng 'elDI' ghaH
pawpa' ghaH'e'
paw lutDaj 'e' Sov qeylIS
pawpa' ghaH'e'
paw lutDaj 'e' Sov qeylIS
ghaH rI' 'ej quvmoH
qanra' qamchIy qup'a'
'uQ'a' luvutta'
qanra' qamchIy qup'a'
'uQ'a' luvutta'
qeylIS
'Iw HIq qagh je chojabpu'mo'
qatlho'
wa'leS chaq maHegh vaj malop
qatlho'
wa'leS chaq maHegh vaj malop
qanra'
le'yo' lutmey juja'pu'mo' qatlho'
cha' puqloDpu'wI' puqbe'wI' je
qa'ang vIneH
cha' puqloDpu'wI' puqbe'wI' je
qa'ang vIneH
qeylIS
batlh SaqIH
qanra' puqloDpu'
'ej 'Iv ghaH nuvvam'e'
qanra' puqloDpu'
'ej 'Iv ghaH nuvvam'e'
luqara'
luqara' 'oH pongwIj'e' jupwI'
bIralqu' 'e' lu'ang mInDu'lIj
SoH ral law'law' Hoch ral puSlaw'
bIralqu' 'e' lu'ang mInDu'lIj
SoH ral law'law' Hoch ral puSlaw'
qanra'
luqara' yInuQQo'
Doy' ghaH 'e' Datu'laHbe''a'
qeylIS qatlhIjneS
Doy' ghaH 'e' Datu'laHbe''a'
qeylIS qatlhIjneS
qeylIS
lugh luqara' joH qanra'
le'yo' lutmey Saja'pu'
naDev vIpawta' 'ej DaH meqwIj Saja'
le'yo' lutmey Saja'pu'
naDev vIpawta' 'ej DaH meqwIj Saja'
jIH retlhDaq yIba'neS
'ej lutwIj yIQoy
choQaHlaw'
'ej lutwIj yIQoy
choQaHlaw'
11. HIv molor
jachwI'na'
ghIq lutDaj jatlh qeylIS
latlhpu' law' pIlmoHpu' lutvam
pa'Daq tamchoH Hoch tlhIngan
latlhpu' law' pIlmoHpu' lutvam
pa'Daq tamchoH Hoch tlhIngan
nom leng Hun nom lengqu' lut
vaj molor juH lupaw je
qeylIS lutmey
vaj molor juH lupaw je
qeylIS lutmey
ghaH ghIj Daw'vam
lulchoHlaHpa' chaH
qeylIS HoH 'e' wuq je molor
lulchoHlaHpa' chaH
qeylIS HoH 'e' wuq je molor
veng luweHmeH 'ej qeylIS luHoHmeH
qamchIyDaq vagh vatlh SuvwI'pu'
ngeH molor
qamchIyDaq vagh vatlh SuvwI'pu'
ngeH molor
vaj pa' SaH chaH
qamchIy lojmItmeyDaq
'el chaH 'e' luqap
qamchIy lojmItmeyDaq
'el chaH 'e' luqap
molor HoSghaj woQ
luDoQ
'el chaH 'e' lupoQ
luDoQ
'el chaH 'e' lupoQ
lojmItvo' molor neghvo' je
DoH
qamchIy Hoch negh
DoH
qamchIy Hoch negh
raSDaq toS qeylIS
rewbe'pu'Daq Qeq'egh
'ej mu'meyvam jatlh
rewbe'pu'Daq Qeq'egh
'ej mu'meyvam jatlh
12. luqara' joH
qeylIS
qamchIy SuvwI'
tlhIHvaD SuvwI'pu'vam vIDelpu'
muHoHmeH pawpu'
tlhIHvaD SuvwI'pu'vam vIDelpu'
muHoHmeH pawpu'
DIjeymeH tutlhej'a'
tutlhej'a'
tutlhej'a'
tutlhej'a'
tutlhej'a'
qatlh Sutamchu' tlhIH
SuvwI'pu' Hem boghIjlu''a'
tlhIH je qanra' puqloD pejatlh
SuvwI'pu' Hem boghIjlu''a'
tlhIH je qanra' puqloD pejatlh
vaSvamDaq
tuq veng je quvvaD
Heghqangbogh SuvwI' tu'be'lu''a'
tuq veng je quvvaD
Heghqangbogh SuvwI' tu'be'lu''a'
luqara'
qamchIy rewbe'pu'
batlhna' 'agh
SuvwI' boleghbogh
batlhna' 'agh
SuvwI' boleghbogh
'ach botlhejQo' SuSuvQo'
vItlhejbej jIH
Hur ghom'a' wIqaD
vItlhejbej jIH
Hur ghom'a' wIqaD
vaj jIHeghchugh
tlhIngan yoH retlhDaq jIHegh
'ej batlh jIHegh
tlhIngan yoH retlhDaq jIHegh
'ej batlh jIHegh
jachwI'na'
yerchajvo' Haw'
qamchIynganpu'
ngIq nuv luHoH
qamchIynganpu'
ngIq nuv luHoH
molor vaghvatlh
molor vaghvatlh
molor vaghvatlh
molor vaghvatlh
molor vaghvatlh
13. qamchIy may'
jachwI'na'
vaS'a'vetlhDaq
molor vaghvatlh
lul qeylIS luqara' je
molor vaghvatlh
lul qeylIS luqara' je
qaStaHvIS rep law' Hargh
vaS'a' teb
molor SuvwI'pu' 'Iw
vaS'a' teb
molor SuvwI'pu' 'Iw
Hoch
vaj ruS cher 'Iw
rap cha' ghot HoS rap cha' ghot vuD
chen yIn ruS
rap cha' ghot HoS rap cha' ghot vuD
chen yIn ruS
jachwI'na'
nItebHa' yIntaHmeH
Sanchaj luqaD
nItebHa' SuvlI'
Sanchaj luqaD
nItebHa' SuvlI'
ghIq QavwI'chaj DuQchu'
qeylIS betleH
chaH vel negh 'Iw ghaylu'pu'mo'
qeylIS betleH
chaH vel negh 'Iw ghaylu'pu'mo'
nga'chuq
nga'chuq
nga'chuq
nga'chuq
nga'chuq
Hoch
vaj ruS cher 'Iw
rap cha' ghot HoS rap cha' ghot vuD
chen yIn ruS
rap cha' ghot HoS rap cha' ghot vuD
chen yIn ruS
ghIq SIqralDaq
molor HoS waw' lupawmeH
bIQtIq HeH juS SuvwI' ghom
molor HoS waw' lupawmeH
bIQtIq HeH juS SuvwI' ghom
nIteb chegh molor ngIq ghoqwI'
joqwI''e' cha'bogh qeylIS
luDel 'e' ra' molor
joqwI''e' cha'bogh qeylIS
luDel 'e' ra' molor
jachwI'na'
lujang meQboghnom 'oH
yeqchu'taHghach Daw' je
'oS joqwI'
yeqchu'taHghach Daw' je
'oS joqwI'
nuH'e' qengbogh mangghomvam
Del 'e' ra' molor
lujang maS'e' loQ So'be'bogh QIb lurur
Del 'e' ra' molor
lujang maS'e' loQ So'be'bogh QIb lurur
Hoch
vaj ruS cher 'Iw
rap cha' ghot HoS rap cha' ghot vuD
chen yIn ruS
rap cha' ghot HoS rap cha' ghot vuD
chen yIn ruS
14. SIqral bIQtIqDaq ghom
jachwI'na'
ruS cherDI' 'Iw
SIqral bIQtIq lughoS cha' parmaqqay
pa' ghomta' SuvwI' 'ej pa' loS chaH
SIqral bIQtIq lughoS cha' parmaqqay
pa' ghomta' SuvwI' 'ej pa' loS chaH
mangghomvam DevwI'
luDel 'e' ra' molor
vaj ghaH lujang
luDel 'e' ra' molor
vaj ghaH lujang
mangghom luDev wej loD
wa' Doj law' Hoch Doj puS
'etlhDaj jeq vagh DuQwI'Hom
wa' Doj law' Hoch Doj puS
'etlhDaj jeq vagh DuQwI'Hom
molor vuQlu'
tu'taHmeH chalqach toS
qeylISvam legh neHmo'
tu'taHmeH chalqach toS
qeylISvam legh neHmo'
quqtaHvIS wanI'vam
raQDaq pawta'
qortar qempa'QeH je
raQDaq pawta'
qortar qempa'QeH je
bI'reS qeylIS vaq molor
ghIq qeylIS jo'ley' ghoS qortar
'ej qeylIS mong 'uchchoH
ghIq qeylIS jo'ley' ghoS qortar
'ej qeylIS mong 'uchchoH
may' lunungbogh repmey'e'
qeylISvaD mu'meyvam
ja'ta' molor qortar je
qeylISvaD mu'meyvam
ja'ta' molor qortar je
15. vaq molor
molor
qeylIS qeylIS qeylIS
ghIlab ghew neH SoH
nuQ wablIj 'ach bI'aw'laHbe'
ghIlab ghew neH SoH
nuQ wablIj 'ach bI'aw'laHbe'
nItlhejbogh petaQmey
tInuD chaHvaD
nIb yan wIjwI' jan je
tInuD chaHvaD
nIb yan wIjwI' jan je
'uQ'a' Sop neghwI' 'e' vIchaw'
ghaHvaD 'Iw HIq vInob
ghIq SIbI'Ha' QamlaHbe'
ghaHvaD 'Iw HIq vInob
ghIq SIbI'Ha' QamlaHbe'
ghIq po veb
may' ngajHa'moH
SuvwI'wI' ghobrupchu'be'ghach
may' ngajHa'moH
SuvwI'wI' ghobrupchu'be'ghach
qeylIS qeylIS qeylIS
wanI' vItaghbogh vIrInmoH
bIHeghqu'
wanI' vItaghbogh vIrInmoH
bIHeghqu'
16. lay' qortar
qortar
wejlogh choponlaHbe'chugh
vaj ghopvam vItap
'ej DaH naDev qaHoH
vaj ghopvam vItap
'ej DaH naDev qaHoH
qeylIS
qorDu'wIj quvmo' jImaghpu'
qorDu'wIj quvqa'moHlu'meH
jIvang vIneH
qorDu'wIj quvqa'moHlu'meH
jIvang vIneH
tlhIngan wo' nur ghob je
HoSmoH quvvam
che'DI' molor nur ghob je pujchoHpu'
HoSmoH quvvam
che'DI' molor nur ghob je pujchoHpu'
qortar
nablIj yIpab
molor yIqaD
nItlhej qempa'QeHwI'
molor yIqaD
nItlhej qempa'QeHwI'
bImej 'e' vIchaw'mo'
ghe'tor cheghDI' loDnI'lI' vavlI' je
chaH DatlhejnIS
ghe'tor cheghDI' loDnI'lI' vavlI' je
chaH DatlhejnIS
ghIq Heghpu'wI'pu' qo'Daq
jIH chomuv SoH
Daqna'lIj 'oH
jIH chomuv SoH
Daqna'lIj 'oH
qeylIS
ghu' Dachupbogh vIlaj
'ach wa' ghu' vIchupbogh
Dalajchugh neH
'ach wa' ghu' vIchupbogh
Dalajchugh neH
yIntaHwI'pu' vImIlHa'moH jIH
Heghpu'wI'pu'
DamIlHa'moH SoH
Heghpu'wI'pu'
DamIlHa'moH SoH
SoHvaD quvwI' qem Hegh 'e' wIvDI' Hegh
pop Hevchugh quvwI'
'ej 'e' DaqaSmoHchugh jIlaj
pop Hevchugh quvwI'
'ej 'e' DaqaSmoHchugh jIlaj
17. SIqral bIQtIq may'
jachwI'na'
ghu'vam qellI' qortar
ghIq pagh jatlhtaHvIS
qeylIS 'uchHa' 'ej ghaHvo' yIt
ghIq pagh jatlhtaHvIS
qeylIS 'uchHa' 'ej ghaHvo' yIt
SIqral wej bIQtIqHommeyDaq
Hargh
cha' mangghom
Hargh
cha' mangghom
Hegh SuvwI'pu' law'
may'mo'
bIQtIq teb 'Iw Doq
may'mo'
bIQtIq teb 'Iw Doq
Hoch
Hegh wa' ghIq Hegh latlh
tIqDu' luDuQlu'
nachDu' luteqlu'
tIqDu' luDuQlu'
nachDu' luteqlu'
jachwI'na'
yoDmey pe'ta' betleHmey Qob
wa'logh mup betleH
'ej 'uSDu' teqta'
wa'logh mup betleH
'ej 'uSDu' teqta'
wa'DIch Hegh moratlh
wej SuvwI' SuvtaHvIS
mongDaj DuQlu' 'ej Hegh
wej SuvwI' SuvtaHvIS
mongDaj DuQlu' 'ej Hegh
ghIq Hegh qanjIt
qeylIS retlhDaq Suv
wa' jagh HoHta' HeghtaHvIS
qeylIS retlhDaq Suv
wa' jagh HoHta' HeghtaHvIS
Hoch
Hegh wa' ghIq Hegh latlh
tIqDu' luDuQlu'
nachDu' luteqlu'
tIqDu' luDuQlu'
nachDu' luteqlu'
jachwI'na'
pum vavDaj 'e' legh qeylIS
HemmoH
che'ronDaq Qam 'ej jach
HemmoH
che'ronDaq Qam 'ej jach
Hoch
qortar qortar qortar
nIghoS cha' SuvwI'lI'
ghe'tor luleng
nIghoS cha' SuvwI'lI'
ghe'tor luleng
jIlay'ta' 'ej batlh jIpabta'
vaj choDanIS
reH batlh SuvtaHjaj chaH
vaj choDanIS
reH batlh SuvtaHjaj chaH
jachwI'na'
vIHbe'choH latlh SuvwI'pu'
bey HoS QoymeH
'IjmeH QamtaH
bey HoS QoymeH
'IjmeH QamtaH
juSmeH qochpu'chaj
jachtaHvIS je chal luSIch beychaj
'ej Qo'noS yav luQommoH
jachtaHvIS je chal luSIch beychaj
'ej Qo'noS yav luQommoH
Hoch
qortar qortar qortar
nIghoS cha' SuvwI'lI'
ghe'tor luleng
nIghoS cha' SuvwI'lI'
ghe'tor luleng
jIlay'ta' 'ej batlh jIpabta'
vaj choDanIS
reH batlh SuvtaHjaj chaH
vaj choDanIS
reH batlh SuvtaHjaj chaH
18. molor chalqach
jachwI'na'
molorDaq He ghoStaHvIS
yoHbogh SuvwI' law'
pummoH qeylIS ghop
yoHbogh SuvwI' law'
pummoH qeylIS ghop
molor
ghobbe'
chalqachDajvo' QaSDaj bej
ghobbe'
chalqachDajvo' QaSDaj bej
may' bI'reS bejtaHvIS mon
ghIq pum QaSDaj law' 'e' legh
ghIq qempa'QeH legh
ghIq pum QaSDaj law' 'e' legh
ghIq qempa'QeH legh
SuvwI'pu'vam qu'
not may' lupay chaH
'ej qul lungaS mInDu'chaj
not may' lupay chaH
'ej qul lungaS mInDu'chaj
DaH molor chalqach 'avlu'bogh
qappam lupawta'
qeylIS qempa'QeH je
qappam lupawta'
qeylIS qempa'QeH je
yor lunej qeylIS mIn 'ej
qIHchuq cha' loD mIn
'ej jach qeylIS
qIHchuq cha' loD mIn
'ej jach qeylIS
19. qeylIS vaq molor
qeylIS
Qo'noS 'urwI'
SaqSub 'urwI'
Seghmaj 'urwI'
SaqSub 'urwI'
Seghmaj 'urwI'
chalqachlIjvo' yIghIr
QuchwIj vIl Suvjaj QuchlIj vIl
'etlhwIj Suvjaj 'etlhlIj
QuchwIj vIl Suvjaj QuchlIj vIl
'etlhwIj Suvjaj 'etlhlIj
molor
yImej qeylIS
toy'wI''a' SuvwI'
qa'pu' mIgh DevwI'
toy'wI''a' SuvwI'
qa'pu' mIgh DevwI'
petaQ'a' SoH
bIlay'DI' qaHarbe'
jIHvaD quv yIjatlhQo'
bIlay'DI' qaHarbe'
jIHvaD quv yIjatlhQo'
jIlay'mo' 'ej batlh jIpabmo'
Qapla' vIchavta' 'e' DaHar'a'
quv vuv nuv pagh ghajchugh neH
Qapla' vIchavta' 'e' DaHar'a'
quv vuv nuv pagh ghajchugh neH
20. pe'vIl mupmeH betleH Qach
Hoch
molor molor molor
SanlIj DanarghlaHbe'
chalqachDaq bIQaDbe' je
SanlIj DanarghlaHbe'
chalqachDaq bIQaDbe' je
jachwI'na'
qeylIS QeH DavemmoHpu'
SomrawDu'Daj teb qajunpaQ
qImchoHlaHchu' yabDaj
SomrawDu'Daj teb qajunpaQ
qImchoHlaHchu' yabDaj
chalqachlIj rachlu'ta'bogh tutDaq
mol'egh betleH
muptaHvIS tay''eghmoH QeHDaj Hoch
mol'egh betleH
muptaHvIS tay''eghmoH QeHDaj Hoch
Hoch
molor molor molor
SanlIj DanarghlaHbe'
chalqachDaq bIQaDbe' je
SanlIj DanarghlaHbe'
chalqachDaq bIQaDbe' je
jachwI'na'
pa' bIQam bIHIvDI'
QIncha' Darur qu' 'ej run
Qobbogh may' nI' jun
QIncha' Darur qu' 'ej run
Qobbogh may' nI' jun
'ach DaH Qom chalqachlIj
'ej qamDu'lIj bIngvo'
tugh ngabchu' 'oH
'ej qamDu'lIj bIngvo'
tugh ngabchu' 'oH
Hoch
molor molor molor
SanlIj DanarghlaHbe'
chalqachDaq bIQaDbe' je
SanlIj DanarghlaHbe'
chalqachDaq bIQaDbe' je
jachwI'na'
DaH yavDaq Dej
qach rachlu'ta'bogh
tlhej le'yo'lIj
qach rachlu'ta'bogh
tlhej le'yo'lIj
HughlIj 'uch qeylIS
DaH rolIjvo' tIqDu'lIj lellaH
'ach DuQammoH
DaH rolIjvo' tIqDu'lIj lellaH
'ach DuQammoH
Hoch
molor molor molor
SanlIj DanarghlaHbe'
chalqachDaq bIQaDbe' je
SanlIj DanarghlaHbe'
chalqachDaq bIQaDbe' je
21. qaD
qeylIS
mInDu'wIj tIbuS molor
SoHvaD jIlay'ta'
'ej batlh jIpab
SoHvaD jIlay'ta'
'ej batlh jIpab
chalqachlIj Damejpu' 'ej bIyIn 'e' vIchaw'
DaH yISuvrupchu'
'etlhlIj yIjejmoH wa'leS HIghom
DaH yISuvrupchu'
'etlhlIj yIjejmoH wa'leS HIghom
ramvam yIQongqu' ram veb bIyInbe'
may'luchlIj nIv yItuQmoH
pujwI' HIvlu'chugh quvbe'lu'
may'luchlIj nIv yItuQmoH
pujwI' HIvlu'chugh quvbe'lu'
SoHvaD HoS vI'agh
SoHvaD 'Iw vI'agh
SoHvaD quv vI'agh
SoHvaD 'Iw vI'agh
SoHvaD quv vI'agh
22. ghom gholpu'
jachwI'na'
molor qIpmeH
wa' chap lo' qeylIS
'ej ghaHvo' yIt
wa' chap lo' qeylIS
'ej ghaHvo' yIt
Hoch
QIStaq 'emDaq jenchoH jul
yor DungDaq Salta'DI'
tagh HarghchuqmeH poH
yor DungDaq Salta'DI'
tagh HarghchuqmeH poH
jachwI'na'
pa' Qam cha' jaghpu' naS
Suvchuqrupchu'
cholchuq chaH
Suvchuqrupchu'
cholchuq chaH
Qam mangghomchaj 'ej bej
nuHmey lonta' 'ej Hop
noHvam charghwI'pu' wuq cha' SuvwI'
nuHmey lonta' 'ej Hop
noHvam charghwI'pu' wuq cha' SuvwI'
Hoch
QIStaq 'emDaq jenchoH jul
yor DungDaq Salta'DI'
tagh HarghchuqmeH poH
yor DungDaq Salta'DI'
tagh HarghchuqmeH poH
23. Hay' chaH
Hoch
qeylIS molor je
Sanmaj chenmoH
tIqDu'raj HoS
Sanmaj chenmoH
tIqDu'raj HoS
qaStaHvIS wej rep
pan qeylIS betleH
'ej jach molor 'etlh HoS
pan qeylIS betleH
'ej jach molor 'etlh HoS
jachwI'na'
Hay'chu' luneHqu'
vaj pe'vIl joqqu'
cha' tlhIngan tIqDu'
vaj pe'vIl joqqu'
cha' tlhIngan tIqDu'
qaStaHvIS rep wa'DIch
molor rol chIpchu' qeylIS 'ej teq
tuH molor 'ach ghur QeH 'ej pe'vIl HarghlI'
molor rol chIpchu' qeylIS 'ej teq
tuH molor 'ach ghur QeH 'ej pe'vIl HarghlI'
Hoch
qeylIS molor je
Sanmaj chenmoH
tIqDu'raj HoS
Sanmaj chenmoH
tIqDu'raj HoS
qaStaHvIS wej rep
pan qeylIS betleH
'ej jach molor 'etlh HoS
pan qeylIS betleH
'ej jach molor 'etlh HoS
jachwI'na'
Doy'choH cha' porgh
'oy' cha' porgh
'ach Hay'chu' luneH neH tIqDu'chaj
'oy' cha' porgh
'ach Hay'chu' luneH neH tIqDu'chaj
qaStaHvIS rep cha'DIch
molor 'etlh bID wItlh qeylIS
tuH 'e' mev 'ej ghIjlu' 'e' lu'ang molor mInDu'
molor 'etlh bID wItlh qeylIS
tuH 'e' mev 'ej ghIjlu' 'e' lu'ang molor mInDu'
qeylIS molor je
Sanmaj chenmoH
tIqDu'raj HoS
Sanmaj chenmoH
tIqDu'raj HoS
qaStaHvIS wej rep
pan qeylIS betleH
'ej jach molor 'etlh HoS
pan qeylIS betleH
'ej jach molor 'etlh HoS
Hoch
tugh qaStaHvIS rep wejDIch
molor cha' tIqDu' DuQchu' qeylIS
'ej lel
molor cha' tIqDu' DuQchu' qeylIS
'ej lel
ngIq tonSaw' lo' 'ej tIqDu' lel
ngIq tonSaw' lo' ‘ej quvqa'moH
ngIq tonSaw' lo' 'ej rIn may'
ngIq tonSaw' lo' ‘ej quvqa'moH
ngIq tonSaw' lo' 'ej rIn may'
jachwI'na'
qeylIS molor je
Sanmaj chenmoH
tIqDu'raj HoS
Sanmaj chenmoH
tIqDu'raj HoS
qaStaHvIS wej rep
pan qeylIS betleH
'ej jach molor 'etlh HoS
pan qeylIS betleH
'ej jach molor 'etlh HoS
Hoch
ngIq tonSaw' lo'
SaD law' San chenmoH qeylIS
wej boghbogh nuvpu' San chenmoH
SaD law' San chenmoH qeylIS
wej boghbogh nuvpu' San chenmoH
SIqral bIQtIqDaq
joqtaHbogh molor tIqDu' qem qeylIS
bIQ DoqDaq tlhabmoH
joqtaHbogh molor tIqDu' qem qeylIS
bIQ DoqDaq tlhabmoH
24. molor tlhabmoHlu'
qeylIS
tIqDu'vam tuHqu'
Say'moHchu'jaj
bIQtIqvam
Say'moHchu'jaj
bIQtIqvam
matlhHa'lu'chugh vaj Doghlu'
'e' yajmeH molor
'ej batlh vangchoHmeH molor
'e' yajmeH molor
'ej batlh vangchoHmeH molor
qa'Daj vupjaj qortar
puj ghaH
'ach batlh Heghpu' tlhInganvam
puj ghaH
'ach batlh Heghpu' tlhInganvam
paq'QIH
1. tlheD qeylIS
Hoch
'o
qeylIS qeylIS qeylIS
qanjIt puqloD
qeylIS qeylIS qeylIS
qanjIt puqloD
tlhIngan vav
bIchul 'ej bIyoH
bIQapta'
bIchul 'ej bIyoH
bIQapta'
jachwI'na'
vaj molor HoHta' qeylIS
'ej quv tIghmey
'aghpu' mu'meyDaj ta'meyDaj je
'ej quv tIghmey
'aghpu' mu'meyDaj ta'meyDaj je
Qo'noS tuqmey muvchuqmoH qeylIS
'ej chaHvaD batlh chutmey nob
tlhIngan wo' voDleH moj Sughlu'
'ej chaHvaD batlh chutmey nob
tlhIngan wo' voDleH moj Sughlu'
Hoch
'o
qeylIS qeylIS qeylIS
qanjIt puqloD
qeylIS qeylIS qeylIS
qanjIt puqloD
tlhIngan vav
bIchul 'ej bIyoH
bIQapta'
bIchul 'ej bIyoH
bIQapta'
jachwI'na'
che'taHvIS chul qeylIS 'ej yoH
Qapqa' tlhIngan tuqmey
'ej yaymey Dun chav
Qapqa' tlhIngan tuqmey
'ej yaymey Dun chav
ghIq Qo'noSDaq Qap rIntaH 'e' Sov
qeylIS
qortar lIjbe'
qeylIS
qortar lIjbe'
Hoch
'o
qeylIS qeylIS qeylIS
qanjIt puqloD
qeylIS qeylIS qeylIS
qanjIt puqloD
tlhIngan vav
bIchul 'ej bIyoH
bIQapta'
bIchul 'ej bIyoH
bIQapta'
jachwI'na'
qaStaHvIS ram, maS So'lu'chu'DI'
nuHmeyDaj may'luchDaj nIv je
yIr qeylIS
nuHmeyDaj may'luchDaj nIv je
yIr qeylIS
tlheDDI' quvmoHmeH
veng HeHDaq lutlha'
SaD law' nuvpu'
veng HeHDaq lutlha'
SaD law' nuvpu'
Hoch
'o
qeylIS qeylIS qeylIS
qanjIt puqloD
qeylIS qeylIS qeylIS
qanjIt puqloD
tlhIngan vav
bIchul 'ej bIyoH
bIQapta'
bIchul 'ej bIyoH
bIQapta'
2. qeylIS mu'mey Qav
qeylIS
reH tlhIngan tlhIH 'e' yIqaw
pewuv'egh
qortar vImuv pal'arpu'wI' vImuv
pewuv'egh
qortar vImuv pal'arpu'wI' vImuv
qa'lI' quv yIpab
'ej tIghmeylIj bolIjchugh
SaqSub SuvwI' Qup yIqaw
'ej tIghmeylIj bolIjchugh
SaqSub SuvwI' Qup yIqaw
ta'meyDaj boqawDI' SuHemjaj
mu'meyDaj bojatlhDI' Suchuljaj
not ta'meyDaj mu'meyDaj joq bolIjjaj
mu'meyDaj bojatlhDI' Suchuljaj
not ta'meyDaj mu'meyDaj joq bolIjjaj
3. qeylIS Heghbat
jachwI'na'
mu'meyvam Qav jatlh
qeylIS lIjlaHbogh pagh
pawpa' qortar bIQ Duj
qeylIS lIjlaHbogh pagh
pawpa' qortar bIQ Duj
qortarvaD lay'ta' ‘ej batlh pabta' qeylIS
jatlh 'e' mevDI' nuvpu' mejmoH ghaH
ratlh be'nalDaj luqara' neH
jatlh 'e' mevDI' nuvpu' mejmoH ghaH
ratlh be'nalDaj luqara' neH
yatlh luqara' puqloD wa'DIch qenglI'
Qu'Daj yajchu' ghaH
qeylISvaD ma'veq nob
Qu'Daj yajchu' ghaH
qeylISvaD ma'veq nob
vanchuq luqara' joH qeylIS je
'ej Hemey pIm ghoS
qa' qo'Daq ghomqa' chaH
'ej Hemey pIm ghoS
qa' qo'Daq ghomqa' chaH
'ej nItebHa' Suv chaH
'e' Sov luqara'
qa' qo'vam Dun law' ghe'tor Dun puS
'e' Sov luqara'
qa' qo'vam Dun law' ghe'tor Dun puS
DaH wanI' potlh taghlu'
tIqDu'Daj DuQqu'meH qeylIS
ma'veq cha' 'etlhmey jop
tIqDu'Daj DuQqu'meH qeylIS
ma'veq cha' 'etlhmey jop
porgh HoH wa' 'etlh
qa' tlhabmoH wa' 'etlh
tlhIngan choHlu' rIntaH
qa' tlhabmoH wa' 'etlh
tlhIngan choHlu' rIntaH
'Iw teqmeH tlhayDaj lo' luqara'
'ej qa' qo'Daq paw qeylIS 'e' maqmeH
qortarvaD jach
'ej qa' qo'Daq paw qeylIS 'e' maqmeH
qortarvaD jach
qortar qortar qortar
DughoS SuvwI'lI'
ghe'tor leng
DughoS SuvwI'lI'
ghe'tor leng
jIlay'ta' 'ej batlh jIpabta'
vaj choDanIS
reH batlh SuvtaHjaj ghaH
vaj choDanIS
reH batlh SuvtaHjaj ghaH
Hoch
qeylISvaD jach 'ej beyDaj luqImmo'
yuQDaq ghaHtaHbogh Hoch tlhIngan'e'
Qomqa' Hoch Qo'noS nuvpu'
yuQDaq ghaHtaHbogh Hoch tlhIngan'e'
Qomqa' Hoch Qo'noS nuvpu'
lojmItDaq SuvwI'pu' Hem qIHmeH
qeylIS lIjlaHbogh pagh
ghe'tor chegh
qeylIS lIjlaHbogh pagh
ghe'tor chegh
4. Suto'vo'qor chenmoH qortar
jachwI'na'
pawDI' Hegh Duj
DeghDaq Qam qortar
qortar retlhDaq Qam qanjIt moratlh je
DeghDaq Qam qortar
qortar retlhDaq Qam qanjIt moratlh je
muvchuqqa' vav puqloDpu' je
'Iw bIQtIqDaq ghe'tor leng
'e' Har qeylIS
'Iw bIQtIqDaq ghe'tor leng
'e' Har qeylIS
mu'meyDaj qawta' qeylIS
'ach qamchIyDaq lay'ta' qortar
'ej pabta' je
'ach qamchIyDaq lay'ta' qortar
'ej pabta' je
qa' qo' chu' 'el Duj
'oHvaD Suto'vo'qor pong qortar
'oH nuD qeylIS 'ej Hem
'oHvaD Suto'vo'qor pong qortar
'oH nuD qeylIS 'ej Hem
nagh jem'IH rachlu'ta'bogh 'oH Suto'vo'qor'e'
Suv 'e' mevDI' tlhutlhmeH SopmeH lopmeH
pa' chegh SuvwI'pu'
Suv 'e' mevDI' tlhutlhmeH SopmeH lopmeH
pa' chegh SuvwI'pu'
Doj chalqachDaj veHmey Hutlh
pa' 'elDI' Duj
'Iw HIq pIw qagh pIw je lularghlu'chu'
pa' 'elDI' Duj
'Iw HIq pIw qagh pIw je lularghlu'chu'
Suto'vo'qor botlhDaq
pe'vIl joqchu'taH
quvbogh 'ej chulbogh tIqDu' tIQ
pe'vIl joqchu'taH
quvbogh 'ej chulbogh tIqDu' tIQ
Honbogh nuch tIqDu'vaD
juH moj ghe'tor
pujwI'vaD nuv quvHa'vaD je Daq moj
juH moj ghe'tor
pujwI'vaD nuv quvHa'vaD je Daq moj
pa' QeHHa'choH qortar veqlargh je
quv Hutlhbogh qa' HoH
quv Hutlh ngoQ Hutlh San Hutlh
quv Hutlhbogh qa' HoH
quv Hutlh ngoQ Hutlh San Hutlh
ghe'tor vegh Duj
Suto'vo'qor lojmItmey 'el Duj
qeylIS vanlu'chu' ‘ej naDlu'chu'
Suto'vo'qor lojmItmey 'el Duj
qeylIS vanlu'chu' ‘ej naDlu'chu'
'uQ'a' lutIv
molor luHarghbogh SuvwI'pu'
qeylIS pal'arpu'Daj je
molor luHarghbogh SuvwI'pu'
qeylIS pal'arpu'Daj je
rInDI' 'uQ'a' Doy' qeylIS
mu'meyDaj ta'meyDaj je qaw
'ej qaStaHvIS wej jaj Qong
mu'meyDaj ta'meyDaj je qaw
'ej qaStaHvIS wej jaj Qong
qeylIS vemmoH
qortar ghogh
qIm neH
qortar ghogh
qIm neH
5. qeylISvaD Suto'vo'qor nob qortar
qortar
qeylIS lIjlaHbogh pagh
Suto'vo'qorDaq qavan
bIyIntaHvIS bIchul 'e' Da'agh 'ej batlh bIvang
Suto'vo'qorDaq qavan
bIyIntaHvIS bIchul 'e' Da'agh 'ej batlh bIvang
bIleghlaH jIlay'ta' 'ej batlh jIpabta'
qa' qo'Daq SuvwI'pu'ma' HemvaD
juH vIchenmoH
qa' qo'Daq SuvwI'pu'ma' HemvaD
juH vIchenmoH
pup jem'IH
'ach wa' Duy' tu'lu'
'avwI' wIvoqlaHbogh wIpoQ
'ach wa' Duy' tu'lu'
'avwI' wIvoqlaHbogh wIpoQ
ghe'tor Da'elta'
'ej lojmItDajvo' Damejta'
'ach bIrIQbe'mo' SoH neH
'ej lojmItDajvo' Damejta'
'ach bIrIQbe'mo' SoH neH
vaj SuvwI'wI' nIv SoH
vaj Suto'vo'qor lojmIt
Da'av
vaj Suto'vo'qor lojmIt
Da'av
qa' Hem qo'
lu'el qa' QIv 'e' Dabot
lu'el qa' quv 'e' Dachaw'
lu'el qa' QIv 'e' Dabot
lu'el qa' quv 'e' Dachaw'
tlhoy'mey jojDaq
chaHvaD Daq Danob
'ej chaHvaD 'uQ'a' lutIvbogh Danob
chaHvaD Daq Danob
'ej chaHvaD 'uQ'a' lutIvbogh Danob
yoHbe'chugh tlhIngan tIqDu'
'ej bIQ lungaSchugh tlhIngan 'aDDu'
ghe'torDaq mutlhej 'ej veqlargh lutlhej
'ej bIQ lungaSchugh tlhIngan 'aDDu'
ghe'torDaq mutlhej 'ej veqlargh lutlhej
pal'arpu'lI' DaSammeH
ghe'tor Da'elmo' 'ej Damejmo'
QeHchoH qa'pu' vaj lubIjlu'
ghe'tor Da'elmo' 'ej Damejmo'
QeHchoH qa'pu' vaj lubIjlu'
jachwI'na'
bertlham
vaj cha' qa' qo'mey
chenmoHta' qortar
vaj cha' qa' qo'mey
chenmoHta' qortar
'ej jajmeyvam taH ghu'vam
DaH vangta'mo' qeylIS
quv tIghmey Sov Hoch tlhIngan
DaH vangta'mo' qeylIS
quv tIghmey Sov Hoch tlhIngan
'ej puqpu'DajvaD lutvam jatlhqa'
tlhIngan tIgh yIpab
qun qon charghwI'pu''e'
tlhIngan tIgh yIpab
qun qon charghwI'pu''e'
quvmo' Hegh Hegh yInaD
qa' wIje'meH maSuv
qo'maj wISachmeH maSuv
qa' wIje'meH maSuv
qo'maj wISachmeH maSuv
'IwlIj ghogh yIQoy
batlh potlh law' yIn potlh puS
ghIj qet jaghmeyjaj
batlh potlh law' yIn potlh puS
ghIj qet jaghmeyjaj
tlhIngan SoH tlhIngan maH
yIqaw 'ej batlh yIyIn
yIqaw 'ej batlh yIHegh
yIqaw 'ej batlh yIyIn
yIqaw 'ej batlh yIHegh
De'mey
paq'batlh chap
qonta' vIlorIS Sonvel, latlh je
mughta' marq 'oqranD
DIS: 2022
mu'mey: 3468
qeylIS tIghmey'e' DaH tIQoy!