lut jatlhwI'

ben law' yIn voDleH. lutmey parHa'qu'. wo' HochDaq leng voDleH toy'wI'pu' 'ej lut jatlhwI'pu' nej, Hoch jaj lut chu' poQmo' ghaH. 'ej wejHa' lut Qoypu'chugh voDleH, lut jatlhwI' mong pe'lu' 'e' ra'. 'ach lutmey'e' Qoypu'bogh voDleH loylaHbe' vay'. 'ej vaj Hoch jaj lut jatlhwI'pu' volchaHvo' pum nachDu'.

mIwvammo', wa' jaj voDleHvaD lutmey jatlhqangbe' vay'. tIngvo' 'evDaq chanDaq qet voDleH toy'wI'pu' 'ej Doy''eghmoHchu', 'ach voDleHvaD nachDaj jab neH pagh. QeHchoH voDleH 'ej toy'wI'vaD ja':

– lut jatlhwI' boSambe'chugh, Hoch mongDu'raj lupe'lu' 'e' vIra'.

ngugh nargh qajunpaQ chIwbogh loDHom 'ong 'ej lut jatlhqangbogh.

– Ha', jISap, ja'. – Qob vISaHbe', che'wI'vaD lut vIjatlhbej.

Quchqu'choH voDleH, vaj loDHomvaD quS qem 'ej ja':

– wIj jup, yIjatlh.

tagh loDHom:

– ben law' nItebHa' HuDyar luchenmoH vavnI'wI', vavnI'lI' je. qachvetlh tIq law' Hoch tIq puS. wa' qa'rI'vo' latlh qa'rI'Daq qetqu'taHvIS qorvIt, qaS pem Hoch. Dunqu' HuDyarvetlh, qar'a'. DaQoypu''a'?

– ghobe', vIQoypu'be', chID voDleH.

– DaQoybe'pu'mo', jajvamvaD yap lut vIjatlhpu'bogh, jatlh loDHom. – wa'leS jIghoSqa'.

jaj cha'DIch ghoSqa'. ghaHvaD quS qemqa' voDleH: lut Qoy neHqu' 'ej loSlaHbe'.

– toH, tugh yItagh.

jatlhchoH loDHom:

– HuDyar'e' luchenmoHpu'bogh vavnI'wI', vavnI'lI' je Daqaw'a'? toH. ghIq tangqa' tInqu' luSep. wa' pu'vo' latlh pu'Daq puvqu'taHvIS cha'bIp, qaS pem Hoch. DaQoypu''a'?

– ghobe', jIQoybe'pu', jatlh voDleH.

– DaQoybe'pu'mo', jajvamvaD yap lut vIjatlhpu'bogh. wa'leS maruch.

'ej ghIq mej. «to-oH», HIt voDleH, «bI'ongba', 'ach SIbI'Ha' qayuqlaH! nachlIj DaweS je SoH.»

po Hoch yaSpu'Daj rIt voDleH 'ej ra':

– lut jatlhmeH pawDI' loDHom, naDev yIghoS 'ej yI'Ij. 'ej peqawchu': lutmey jatlhbogh tISaHQo', wejHa' boQoypu' nItebHa' 'e' neH yImaq.

jaj wejDIch ghoSqa' loDHom 'ej ja'choH:

– cha' wo'meyDaj che'taHvIS vavwI', vavlI' je, vavwI'vo' loSmaH qol'om qeghmey ngIp vavlI'. boQoypu''a'?

nItebHa' jach yaSpu', jatlh:

– wIQoybejpu'!

– toH, boQoypu', jatlh loDHom, – vaj yIDIl, voDleH, chowelmo'!

'ej ghIq loDHomvaD qol'om nobnIS voDleH. wel ghaH 'e' woq Hoch. qol'om lIqchoHlu', Hoch pa'mey lunuDlu'chu', 'ach wa' qegh neH Samlu'.

qol'om tlhap loDHom 'ej mej. qaSDI' jajvetlh, not lutmey chu' 'Ij neH voDleH.