DIS 2020 paqvam lIng lam 'aj Se'vIr malja'

2020 paqvam lIngmeH DIb © DoQ DeSDu'. Hoch lIngmeH DIb luQanlu'.

jav jav

vemlI' …

vemlI' …

vemta'. per mI': wa'-pagh-jav-jav. DaHjaj: DIS 2851 jar 11 jaj 1. 12v02r. muDechbogh Daq: pa' Hurgh. raS SumDaq De'wI'mey, baS SIrghmey je tu'lu'. jIH tlhopDaq quSDaq ba'taH HumanHey. chu'wI'HeywI': yIngu'.

«HerIy jaStan jIH, wa'-pagh-jav-jav. qachenmoHta'.»

Daqmaj yIngu'.

«marIS mID. Deb puHley' 'oH vengHommaj pong.»

De'vam vIpol, chenmoHwI'wI'.

«chenmoHwI' HIpongQo'. jaS HIpong neH. jIHvaD jaS pong Hoch.»

lu', jaS. chay' chora'?

«Huuu jISovbe'. qachu'pa' Qu' le' vIqelbe' 'e' vIchID. nuq wIta' DaneH, wa'-pagh- jav-jav?»

neH?

«neH! DubelmoH nuq?»

belmoH?

«Ha'! qa'ang. bIHu' 'e' vIra'.»

lu' qaH. jIQamchoH. QamlI' … QamlI' … Qamta'.

«DaH HItlha', jav-jav.»

pa' mejlI' Human …

…

…

pa' 'elqa' Human.

«chotlha'Qo''a'?»

chora'be'pu', jaS.

«qara'bejta'! ‹DaH HItlhej, jav-jav› jIjatlh.»

perwIj 'oH be' jav-jav'e'. wa'-pagh-jav-jav 'oH perwIj'e'.

«SoHvaD pongqoq vInob.»

qatlh pongqoq Dalo'? perwIj chu' 'oH'a'?

«qaparHa' 'e' 'oS pongqoq. perna'lIj qa'be'. latlh per 'oH neH.»

'ej potlh parHa'ghach qar'a'?

«qarbej.»

lu'. jIHvaD jav-jav DapongDI', jIlob, jaS.

«tlho'. DaH HItlha'.»

tlha'lI' … tlha'lI' … ghur tamghay … ghur tamghay … qach wI'elHa'lI' … HurDaq maHtaH. Deb. Do'ol Doq. chal Doq. Sum HuDmey.

«bIlugh. ghangwI' yIqel. 'IH qar'a'?»

'IH?

«'IH! Doq Debmaj. tera'Daq Doq 'op Deb 'e' vIjal. 'ach naDev Doq Hoch. vabDot joqwI'maj yIqel. Doq je!»

joqwI'raj?

«joqwI'maj! yIqIm! qachvetlhDaq joq joqwI'maj! Daleghbe''a'?»

legh.

chovlI' … chovlI'.

«Doq 'ej botlhDaq wovbogh Dotrar SuD tu'lu'. yuQmaj 'oS joqwI'vam.»

'ej Deghrajmo' SuHem qar'a'?

«qarbej!»

jaS?

«qa'Ij, wa'-pagh-jav-jav.»

qatlh chochenmoHta'? ngoQwIj nuq?

«toH! pIj jImob. meqvetlhmo', rut jI'ub. 'ach mutlhejchugh vay', jI'ubbe' 'e' vI'Ir. chotlhejmeH qachenmoHta'. qoqmey vIchenmoH 'e' vItIv je.»

vaj qatlhejmeH 'ej chotIvmeH chochenmoHta' qar'a'?

«qar. qay''a'?»

jIHvaD qay' pagh.

«maj.»

chay' ngoQwIj vIchavlaH? nuqDaq qatlhej, jaS?

«Hu'ma … nItebHa' HuDvetlhDaq mayIt vIneH.»

luq.

«maj! Ha'!»

yItlI' … yItlI' … yItlI' …

14v17r.

Deb … HuD … tawHom … yItlI' … yItlI' … nagh toSlI' … nagh toSta' … nagh toSlI' … nagh toSta' … tawHom … yItlI' … pawta'. HuD yorDaq SaH van Hew.

16v58r.

nuq quvmoH van Hewvam, jaS?

«yuQmaj mID cherwI' 'oS. chorghvatlh ben HuDvamDaq Saq 'ej tayqeq chu' taghta'. Saqta'DI', chImchu' yuQvam. rewve' lutlhuHlaHbe' Humanpu'. 'ach vumqu'ta'mo' chaH, marIS muD luchoHta'. yInSIp yap ngaS muDmaj 'ej QIt Satlhmaj wIturmeH HurDaq tImaj wIpoch. Heghvo' chen yIn … meqvetlhmo' le'chu' marIS. pawbe'chugh Humanpu', chaq not yIn QutlhlaH yuQvam.»

tlhom chum buSchoH jaS … tam … tam … tam …

19v46r.

jaS, bIpIv'a'? qaStaHvIS repmey bIvIHbe'taH. SoHvaD Qel vIrI'beH.

«jIpIv, jav-jav.»

qaghelqa' 'e' Dachaw''a'?

«yIruch, jav-javoy.»

jav- … jav … -oy?

«latlh pongqoq 'oH.»

De'vam vIpol, jaS.

«yIruch. HIghel. nuq Daqel?»

qatlh perwIj chonob? vay' 'oS'a'?

«wa'-pagh-jav-jav?»

qar.

«Daj mI'vam 'e' vIHar. qunQeD vIHaD 'e' vItIv 'ej muvuQ DIS wa'-pagh-jav-jav.»

qatlh? tera' DIS wa'-pagh-jav-jav qaSpu' nuq?

«chal yIqel.»

chalDaq SIqchoH jaS. chal qellI' … chal chovlI' … Dotrar ngu'lI' …

«wovmoHwI'vetlh SuD Dalegh'a'?»

legh, jaS.

«tera' 'oH wovmoHwI'vetlh SuD'e'. 'ej DIS wa'-pagh-jav-jav tera'Daq 'ewropDaq qaS wanI' potlhqu'. bIQ'a' lang chIqta' wIlyam charghwI'. noghmanDIyngan ghaH 'ach 'Inglan mIv'a' DoQ je. 'ach mIv'a'vetlh DoQ net bot net nID. vaj 'InglanDaq mangghomDaj Devta' 'ej 'Inglan ta' HoHta'. ghIq 'Inglan quS'a'Daq ba'choH. noghmanDIyDaq ghaHvaD charghwI' Damlu'. 'InglanDaq ghaHvaD Qovpatlh Damlu'. ghaH parHa' 'op. ghaH par 'op. mIgh ghaH 'e' Dam 'op 'ej quvchu' ghaH 'e' Dam latlh. 'ach Daj 'e' HarnIS Hoch 'e' vIHar. muvuQ yInDaj. wIlyam charghwI' bopbogh paq Dojmey'e' vIlaDta' 'ej jIHeghpa', ghaytan latlh vIlaD 'e' vIHar.»

Daj.

tam … tam … tam …

jaS?

«qa'Ij, jav-jav.»

latlh pongqoq vIneH 'e' vIHar.

«teH'a'? nuq 'oH?»

wIlyam HIpong … jIDaj je vIneH.

«lu'.»

21v30r.

Ha'. bIDoy'choH 'e' vInoH. bIQongnISchoH. wa'leS latlh HoqHom wItur.

pItlh