DIS 2020 paqvam lIng lam 'aj Se'vIr malja'

2020 paqvam lIngmeH DIb © DoQ DeSDu'. Hoch lIngmeH DIb luQanlu'.

bemI'jI tlhapragh

ramvetlh ... ben law' qaSba' ramvetlh. tlhoDtaH ramvetlh bopbogh wov'onmeywIj'e'. jInep chaq 'e' boHar 'ach jIvItchu' 'e' vInID 'e' vI'Ip. Qatlh neH Qu'wIj. ben law' qaSpu'mo' wanI'meyvam vIrIchrupbogh. DIS law' qubbID qaSpu'bogh wanI'mey vIyaj 'e' vInID 'ach jIluj. jInIDDI', jIluj 'ej DI'ruj Hoch vIHonchoH. lutvam vItaghmeH jIbaw'Ha'. chay' vIlIHlaH? ramvetlh nungbogh wanI'mey vIbuSHa'laH 'e' vIHar. potlhbe' nungbogh pem 'e' vIDam. taghlaw' lutwIj, bemI'jI DuSaQ'a' vImejDI'. wejHa' mIneSo'ta monDaq Qoyje'wIj wa'DIch vISuqta', mIneSo'ta vIDabchoHpa' 'a yabwIj vIDubmeH meqmey Sar vIHaD ngugh 'e' vItIvbej. vabDot DaHjaj meqmey chu' vIghoj 'e' vItIv. Sov SuqwI' jIH. ramvetlh bemI'jI DuSaQ'a'Daq 'amerI'qa' SepjIjQa' ghop Hol ghojmeH mIw vISIQ.

loS qelI'qammey 'aD DuSaQ'a', juHwIj je joj 'a jIyIt 'e' vImaS. reH loQ jIror. SeDmeH mIw ngeD law' yItmeH mIw ngeD puS 'ach jIpIvtaHmeH 'ej loQ SomrawwIj vIlo'meH jIyIt 'e' vIwuq.

DaH 'ISjaH paqwIj ngo' vInuD. ramvetlh jeywIj vInuD. wa'maH Hutvatlh rep rIn ghojmeH mIwwIj 'e' vIghItlh. teH De'vam 'e' vI'Ir. DubwIjDaq buqwIj vIHuS. 'ughqu'be' 'a loQ 'ugh; 'oHDaq cha' ghop Hol ghojmeH paqmey, wa' ghop Hol mu'ghomwIj je tu'lu'. HaDmeH raSwIjDaq mu'ghomvetlh vIpoltaH. ghIq 'ev vIghoSchoH. bemI'jI ngeng HeHDaq jIyIt.

ram chal vel 'engmey jeD. yav nIS Sormey tIn QIbmey. QumwI'wIj vIQIq 'ej 'ul Sech lo'Daj vIchu'. Irvine tawDaq jIyIt 'ej SIbI'Ha' Birchmont Beach taw vIpaw. pa' puSchoH puH Dujmey. qImbe' Hoch puH Duj SeDwI'pu' 'e' vIQepchoH. wepwIjDaq HIr qoSta' boch, vaj vIleghlu'meH ngeD Qu' 'ach jIyepqu' 'e' vIwuq. taw vIDoH 'ej QIbmeyDaq jIyItchoH.

much Qe' vIjuStaHvIS, loQ vIH 'engmey 'ej maS So'Ha'chu'. ngem Hoch wovmoH maS botbogh pagh. Sormey vIqImchoH. jenqu'; tayqeq loq chalqachmey tIQ rur. HeghwI" veng vItol 'e' vIjemchoH.

DaH wan taw 'ach jIH tlhopDaq HuDHommey lutu'lu'. jen taw ghIq 'eSqa' 'ej SIbI'Ha' ghangwI' HurghDaq ngab. qaStaHvIS poH nI'qu' mujuS pagh puH Duj pay' 'e' vItlhoj. vaj jItlhuHmeH jIyev 'ej jIH 'em vI'ol. pagh. paw pep'en Qey' 'ej mujelmoH. pIj HevamDaq jIyItpu' 'ach DaH jIbItqu'choH. pem muSIvmoH 'ej mupIlmoH Hevam 'ach ram ... DaH nargh 'obmaQ Qangbogh chotwI''e' 'ej pe'vIl muHoH tlhoS 'e' vIpIHlaw'. chaq ngemDaq vogh ghachlI' 'ej qImbe'taHbogh juSwI' wun loSlI' chotwI'vetlh 'e' vIHar. Daq vIloylaHbe'bogh vIjuSDI', Sor 'emvo' Sup 'ej nachDaj DungDaq 'obmaQDaj pep 'ej muHIvqu' ghaH. nachwIj chev. muHoH. mutap. jIHeghDI', ngem botlhDaq mumol 'ej not vIleghqa'lu'.

jIDogh neH 'e' vIwuq DorDI' poH ngaj. mughIj Daq Hurgh 'e' vIchaw' neH. SaH DachwI' 'e' vIjem 'e' qaSmoH puq Dujvam. jIvIHqa' vIneHbe' 'ach cheghmeH lengHomwIj vItenqa'.

DaH Hop juH qachwIj mach, wa' qelI'qammo' neH. juH qachwIj ghoS tawna' neqbogh lam tawHom'e'. jItlhe' 'ej nIH vIjaHchogh. ngem'e' vI'el.

jIH DungDaq chal So'chu' Sor bartIqmey; pa' beb lurur. bartIqHommey jojmey puS neH DuQ maSwov HoS.

lang juH qachHomwIj ghoSbogh tawHom (juH qachna' 'oHbe' juHwIj'e'. tlhoy mach 'ej tlhoy SubHa'.) rut jaQ. qaStaHvIS qImroq yIQ, pIj SoD chal bIQ 'ej juHwIj vImejmeH jIyItnISchu', tawHom 'ay'mey puS chIqlaHbe'mo' puH DujwIj. DaH QaDchu' tawHomvam. qaStaHvIS nungbogh jajmey SISbe'chu'taH.

SaH naSqu'wI' vIleghbogh 'e' vIjemqa'. nom lam tawHomvetlhDaq jIyIttaHvIS, 'oplogh jIyev 'ej muDechbogh wabmey vI'Ij. 'ach ghugh lIrmey 'ej qet qorvItmey mach 'ej loQ vIH ngeng Sum bIQ 'e' neH vIQoy. muHIvrup pagh SIbI'Ha' 'e' vIHarqa' 'ej tagha' jIyItqa'. jIjotnISba'taH neH.

tlhapraghmey DuH vIHaw'moHmeH bom tIQ vIbomchoH: «HoSqu' SuS! Dat jaH SuS! HoSqu' SuS! murIttaH bangwI' ...» taH taH taH. jIbomtaH 'ej juH qachHomwIj vIleghDI' neH jImev. HuDyar Qop rur. 'oH vImuSHa'laH jIH neH. DuSaQ'a' Qoyje'wIj vISuqta'DI', Sepvam vIghoS 'ej ngemDaq jo'ley'Daq jIQong qaStaHvIS jarmey puS. bemI'jI vIpawDI' ngeng HeHDaq jo'ley'wIj vIcher 'ej qachvam moH vItu'. bovvetlh, latlh juH qach vIje'laHbe'. juH Hoy vIje'meH Huch vIHutlh. vabDot juH qach Qopbe' vIje'laHbe'; vey'Ha' HuchwIj. 'a qay'be'. jIHvaD moHbe' juHwIj mach. 'IH. wontoymeywIj 'oS. yIn nap chIw. qaSpa' lutvam wanI'meyvam, Huch vey' vIvI'ta' 'ej ghaytan juH qach Hoy vIje'laH ('ej tagha' ngengDaq, bemI'jI DuSaQ'a' bIQ ghaywI' pa'Daq ghap jISay''eghnISmoHbe') 'a juHwIj vImuSHa'qu'. vIlon vIneHbe'. loy'.

'oH qoDDaq wa' pa' neH tu'lu'. 'ach wa' pa'vetlh qoch Hoch vIneHbogh. wa' tajvajDaq QongDaqwIj tu'lu'. 'oH retlhDaq raSHom vImutlhta'bogh tu'lu'. raSHomDaq wovmoHwI' tu'lu' 'ej raSHom retlhDaq tIr paqmey law'. vIraS Hol paqmey, tulwI' Hol paqmey bIH HochHom'e' 'ach DIvI' Hol paqmey vIghajtaH je. DuSaQ'a' ghojwI' jIHtaHvIS vIraS Hol vIbuSqu'. mIneSo'ta monDaq tulwI' Hol ghom jeSwI' jIH. bemI'jIDaq Dach tulwI' Hol ghom 'ach juppu'wI'vaD nav QIn vIngeH 'e' vItIv 'ej rut jIHvaD paqmey chu' ngeH.

latlh tajvajDaq SaH vIncha'wIj. juH qachHomwIj tujmoH vIncha'vam mach qaStaHvIS mIneSo'ta jarmey bIrqu'. ngeng HeHDaq Summo' juHwIj, qu'bej rewve' bIr.

latlh tajvajDaq HaDmeH raS, wa' quS nap je lutu'lu'. aDmeH raSDaq tIr latlh paqmey. loQ bIH ghIHHa' HoS latlh paq Doj ghIHHa' puj.

tajvaj loSDIchDaq Sut DeSwar mach tu'lu'. DeSwar bIrDaq 'oHtaH 'ej 'oH qoDDaq bIH SojHom vIpolbogh.

lojmItwIjDaq Durghang HoS tu'lu'. nom vIngaQHa'moH. pe'vIl lojmIt vIpoSoH ghIq qoD vI'el, jImoDqu'taHvIS. jI'elta'DI', nom lojmIt SoQqa'moH 'ej vIngaQmoH, Durghangvetlh rap vIlo'taHvIS. ngaQDI' lojmIt, ravDaq jIDej. jItlhov pay' 'e' vItlhoj. joqqu' tIqwIj 'ej ngugh mev tIq tlhoS 'e' vIpIH.

qatlh jIbItqu'? ramvetlh jIHegh qatlh 'e' vIHarqu'choHlaw'? muchot vay' qatlh 'e' vIHajqu'? HaDmeH raSwIjDaq wab HevwI' tu'lu'. Qorwagh tlhopDaq 'oHtaH. wej Qorwagh ghaj juHwIj. HaDmeH raSwIj 'emDaq 'oH wa''e'. QongDaq retlh raSHom 'emDaq 'oH latlh'e' 'ej DeSwar bIr, Sut DeSwar mach je 'emDaq 'oH wejDIch'e'.

wab HevwI' vIchu'nIS pay' 'e' vIjem. jIHvaD jatlhlaw' DujwIj. latlh Human ghogh vIQoynISqu' 'e' vIyaj. jIHu' 'ej wab HevwI' vIghoS. chu'meH leQ vIjIrmoH. SIbI' rI'wI'vo' ghoS De' chu' much. pe'vIl jI'IjchoH. qaSchugh wanI' Huj, wanI' Qob joq, jISov vIneH. bIghHa'vo' narghta''a' qama'? qen yoSwIjDaq qaSpu''a' chotmeH wanI' mIr jum? qen ngablaw'pu''a' nuvpu'? qaS'a' poymar? jISIv. jISov vIneHqu'. mutlha' vay' 'e' woq vay' vIneH. jImaw'be' 'e' woq De' chu' much 'e' vItul.

Do'Ha' pagh Daj much De' chu' muchwI'. wa'SIngtanDIySIy SuchlI' qa'naDa' Qang 'ej loS qaD Qapta' bemI'jI DuSaQ beSbal beq. Hoch weSpu' wIjwI' Sum 'ach tagha' vagh'uy' Da'lar Hevpu', 'echletHom Quj Qujpu'DI'. wab HevwI'wIj mach vIchu'Ha' 'ej QorwaghwIj vIbuSchoH. Qorwaghvetlhvo' juH qachwIj tlhop vIleghlaHchu'. puH DujwIj—DIS 2007 Jetta—tu'lu'. loQ ngem jorchan nIH So'. 'ach wa' jorchan botwI'vam vIqImHa'chugh, vaj Hoch'e' vIleghlaH Saja'laH, jIyuDHa'taHvIS. muDechbogh Daq vInuDqu'. maw'wI' vIrur. nom vIH mInDu'wIj. vay' vISam 'e' vInID. 'ach SaH pagh QobwI' tagha' 'e' vItu'. Qob 'ogh neH yabwIj.

QobHa' ghu' 'e' vISovbej, jImeqDI'. 'ach meqQo' yabwIj Hoch. vaj Qorwagh tlhopDaq tlhIm vIHoq. Hur jorchan bot tlhIm. loQ puq vIrur: muHIvlaHbe' vay', muleghlaHbe'chugh ngugh 'e' vIHarlaw'.

nom Qorwagh wa'DIchDaq tlhIm Hoq. ghIq QongDaqwIj retlh vIjaH 'ej pa' Qorwagh tlhopDaq tlhIm vIHoq je. ghIq DeSwar bIr retlh vIjaH 'ej pa' Qorwagh wejDIch tlhopDaq tlhIm vIHoq je. tagha' QongDaq vIchegh 'ej 'oHDaq jIba'choH. bovvetlh por vIpurchugh (bovvetlh rav DaH 'aqroS quvyaHvam vIturchoH 'e' vIchID), vaj ngugh tlhIch vIpurchoHbej. ngugh Marlboro tlhIch naQ 'aplo' vIlel 'ej jeltaHvIS ghopDu'wIj 'oHvo' wa' tlhIch naQ chISqu' vIvevHa' 'e' vIjal. 'ach ngugh por vIpurQo' 'ej pagh tlhIch naQ vIghaj.

jIjotqa' 'e' vInID 'ach joqqu'taH tIqwIj. not tIq joqqu'taHghachvam vItlh vISIQ.

'ach chaq meq tu'lu'. rut baw'Ha'choH vay', tlhoy 'IqchoH SengmeyDaj 'ej Sengmeyvetlh buSHa'taH neH. ghIq wa' jaj Dej neH vay'vetlh. maw'choH. Duy'choH yabDaj. chaq wanI'vetlh vISIQ—jISovbe'. jIQubchoH. qawwIj vInaw' 'ej mubaw'Ha'qu'moHlaHbogh vay' vIjal 'e' vInID. chaq jIQaghpu' 'ej jItuH. chaq muyonHa'qu'moH yInwIj Hoch 'ej ngoD vIqImHa'taH neH. chaq QepwI' HarqIn vIghovbe'bogh vISIQ.

'a jImeqlaHbe' 'e' vItu'choH. jISeH'eghbe'choH. yabwIjDaq SaH cha' 'ay'mey: 'ay' tlhab, 'ay' tlhay' je. qaStaHvIS yInwIj Hoch yabwIj qoD che'taH 'ay' tlhay'. 'ay' tlhab ghatlhtaH 'ej mupwI' 'uchtaH. HoSqu'. 'ach tagha' tlhab'eghmoHlaw'. 'ay' tayHa'. Hu' 'ej 'ay' tlhay' qaD. jach. Ha'DIbaH naS bey bach. jIjel. ro'wIj vIchop.

jIba'Ha'. jItor. QongDaqwIj bIngvo' vay' vIQIq: beH 'oH. beHmey vIpar 'e' vIchID. qaStaHvIS DISmey beHvam'e' vIQIqbogh vIlo'be'. ben law' wa'logh mIneSo'ta monDaq qajbogh ngopDaq mabach loDnI'wI', jIH je. nob 'oHpu' beHvam—vI'at HeghDI' vavnI'wI'. Dulutlh vengDaq je'pu' vavnI'wI', HojnIy neH ghaHtaHvIS. qaStaHvIS yInDaj nI' pIj wam. jIH'e', vavnI'wI' vIvuvmeH vIpol; jIwammeH qoj jIHub'eghmeH vIpol 'e' qa'. chon, Hub'eghghach je buSqu' loDnI'wI''e'. 'ej De' vIchel: qatlh loDnI'wI'vaD beHvam nobbe' vavnI'wI' HeghDI'? jISovbe' 'ej meqvam vISIv not 'e' vImev. DI'on law' DIlIn vavnI'wI', jIH je (chon, vI' je lubuSHa'lu'chugh neH.) vaj meqvetlhmo' beH Qejpu'bogh vIpol chaq 'e' maS neH.

nIch 'aplo' mach vIghaj je. beHDaq nIch vIvev. ghIq jIHu'. yopwaH buqwIjDaq nIch vIvevpu'be'bogh vIlan. lojmIt vIghoS. Hoch vIghuH.

Durghang vIngaQHa'moH 'ej juHwIj vI'elHa'. Qey' Hur rewve'. ngemDaq ghugh wa'SaD Ha'DIbaH tlhab. rewve' lu'ughmoH wabmeyvam 'e' vIjem.

'ang'egh ralwI' maw' tlhoS 'e' vIpIH. tor qISa'ruj 'ej muHIv 'e' vIpIHlaw' je. 'ach muHIv ghewmey neH. mongwIjDaq Saq 'ej 'IwwIj luremmeH muchop.

qIvwIjDaq jIDej. yavDaq beHwIj vIroQ. jImaw''a'? chay' jIngoy'Ha'qu'laH beH vIqengtaHvIS? jImeqHa'chu' chay' 'e' vIchaw'laH? 'Iv vImoj?

ghIq poSDaq lavDaq vIH vay'. wabHom lIng vay'vam. beHwIj vIwoHqa' 'ej vIbachrupchoH. lughlaw' DujwIj. mucholbej chotwI' 'e' vIHarqa'! jImaw'be'! pe'vIl muHoH ralwI' 'e' vIjalDI', tuch vIrItlaw'.

wanI' veb vIyajbe'taH.

vabDot DaHjaj wanI'vam vIqawlaHchu'be' ...

DujwIj neH vIqaw. 'IwwIj bey'e' vIqaw ... 'a DI'rujna' vIqawbe'chu'. jIHIv 'e' ra' yabwIj. jItaH 'e' poQ qa'wIj tlhay'Ha'.

ngavyaw'! jIQub.

maS vIleghqa'. So' pagh. wovqu'. pe'vIl 'aDDu'wIjDaq vIH 'Iw.

lavvo' nargh vay' ...

«tlhapragh!» jIjatlh jIjachtaHvIS.

tlhapraghHeyDaq jIbach.

pum tlhapraghHey. yavDaq Dej 'ej Doj lI'Ha' moj. vIchol. Human ghaH. vay' vIHoHpu'. beHwIj Qoypu' ghan'Iq yaS Sum. nom paw 'ej muqop. bIghHa'Daq vIweghlu'ta'. qaStaHvIS meqba' muHub 'e' nIDqu' chut qeSwI'wI'. maw'wI' ru' jIHpu' 'e' tob 'e' nID. mutlha' tlhapragh, chotwI''e' 'e' tob 'e' nID. 'ach Qapbe'. bo'DIj mIwwIj vIluj 'ej bIjwIj may vIHev. qaStaHvIS yInwIj Hoch bIghHa'vamDaq jIba'taH 'ej ramvetlh retHa' vIpaQtaH, porwIj vIpurtaHvIS. rut muSuch SoSwI', loDnI'wI' joq.

pIj ram DubwIjDaq jIQottaHvIS wanI'mey vISIQpu'bogh vImeSHa' 'e' vInID. chunwI' vIchotpu''a' pagh tlhapraghna' ghaH'a' vIHIvDI'? ngoDmey vISov vIneHba' 'a not vItna' vIghoj Do'Ha' 'e' vIHar.

-pItlh-